¹ Tam'taona fahatelo nanjakan'i Kyrosy mpanjakan'i Persia, de nisy hafatra nambara tamin'i Daniela, ze natsôvina kô hoe Beltesazara. Marina zany hafatra zany. Zany de momban'ny ady leibe. Nahatakatra an'le hafatra i Daniela rafa nahazo faharanitan-tsaina avy am'fahitana izy. ² Tam'zany andro zany, za Daniela, de nisaona nandritra ny telo herignandro. ³ Tsy nihinana hanina tsara za, tsy nihinana hena mihitsy, tsy nisitro divay mihitsy, ary tsy mba nagnosotra menaka tam'tavako mandra-pahavitan'ny telo herignandro manontolo. ⁴ Tamin'ny andro fahefatra amby rôpolon'ny volana vôlôny, raha teo ankekin'ny ogny leibe za (zany hoe, Hedekela), ⁵ niandrandra za ary nahita leilà nitafy lamban-drongony, miaraka am'fehikibo vita am'volamena tsy mifangaro avy aigny Ofaza magnodidigna ny valagnany. ⁶ Ny vatagny de ôtran'ny topaza, ary ny tarehiny ôtran'ny hazavana. Reo masony salan'ny fanilo mirehatra, ary reo sandriny sy ny tongony ôtran'ny varagna manganohano. Ny feony ôtran'ny feon'ôlà betsaka be. ⁷ Za, Daniela, rerika no nahita fahitana, fa ny ôlà ze teo aminà de tsy nahita ny fahitana. Na zany aza, tonga teo aminjareo ny horohoro leibe, ary nilefa nanitrika ny tegnany zareo. ⁸ Ka za rerika no sisa teo ary nahita an'le fahitana leibe. Tsisy hery nipetraka tao aminà; niharatsy nivaloarika ny andriko namiratra ary tsisy hery tavela tao aminà. ⁹ De naregny an'reo teniny za__ary raha naregny an'njareo za, latsaka tagnaty torimaso laligna za ary ny tarehiko teo am'tany. ¹⁰ Nisy tagnana nikasika anà, ary nampangitakitaka ny lohaliko sy ny felatagnako. ¹¹ Niteny taminà ny anjely hoe: "Ry Daniela, leilà nohindrahindraina fatratra, fantaro reo teny ze lazaiko aminao. Mitsangana mahitsy, satria nasian ho aty aminao za." Rafa avy niteny an'zany hafatra zany taminà izy, de nijoro am-pangitakitana za. ¹² De ozy izy taminà: "Aza matàtra, ry Daniela. Nanomboka tamin'ny andro vôlôny nahafantaranao an'zany tao an-tsaignanao ary nagnetrenao tegna teo alôhan'ny Andriamaitrao, de efa regny ny teninao, ary tonga za noho ny teninao. ¹³ Ny andriandahy akao am'fanjakan'i Persia nanohitra anà, ary nandigny ny mpanjakan'ny Persia za nandritran'ny iraika amby rôpolo andro. Fa i Mikaela, raika am'reo andriana leibe, no tonga nagnampy anà. (Fagnamarihina: Raha tokony hoe: "mpanjakan'i Persia", misy am'ro dikan-teny talô nagnano hoe: "Andriandahin'ny mpanjakan'i Persia) ¹⁴ Am'zao tonga za hagnampy an'nao hahatakatra an'ze hanjo ny vahôkanao amin'ny andro farany. Fa ny fahitana de ho an'reo andro mbôla ho avy." ¹⁵ Rafa nilaza taminà tam'fampiasana an'reo teny reo izy, natodiko tam'tany ny tavako ary tsy afaka niteny za. ¹⁶ Nikasika ny molotro ny ôlà raika ze salan'ny zanak'ôlà, ary nanokatra ny vavako za ka niteny taminazy nitsangana teo agnolônako hoe: "Ry Tompoko, noho ny fahitana de ao agnaty fahorena za; tsisy hery tavela akato aminà. ¹⁷ Mpanomponao za. Manakôry no ahafahako miresaka am'Tompoko? Fa am'zao tsy manan-kery za, ary tsisy fofon'aigna tavela akato agnatiko." ¹⁸ Nikasika anà ndre le niaka endrik'ôlà ary nankahery anà. ¹⁹ Ozy izy hoe: "Aza matàtra, ry leilà nahindrahindra fatratra. Fiadanana anie ho an'nao! Matanjaha zao, matanjaha!" Raha mbôla niresaka taminà izy, de nahery za. Ozy zao hoe: "Ôka ny tompoko no hiteny, fa nankahery anà anao." ²⁰ De ozy izy hoe: "Fantatrao ma nagnino za no tonga aketo aminao? Mbôla hiverigna hiady amin'ny andriandahin'i Persia za. Rafa mande za, de ho avy kô ny andriandahin'i Grisia. ²¹ Nefa ho lazaiko aminao ze vôsoratra akao amin'Ny Bokin'ny Marina. Tsisy ôlà mampiseho ny tanjaky ny tegnany aminà mba hanohitra an'njareo, afa-tsy Mikaela andriandahinareo.