¹ Fa haizo zao: amin'ireo andro farany la hisy reo fotoan-tsaratsy. ² Fotony gny olo ho tia tena, tea jala, ho mpieboebo, ho mpandoka tena, ho mpanevateva an-Dranagnahary, tsy manoa ray aman-dreny, tsy misaotsy, sady tsy masy. ³ Tsy hanam-pitea gny avorohotany rozy, mpanohitohitsy, ho mpagnendrikendriky, tsy hahafehy tena, hahery setra, tsy ho tea gny soa. ⁴ Ho mpamaliky rozy, tsy misy eritreritsy, mpanambony tena, tea fahafinareta mihoatsy noho reo tea an-Dranagnahary. ⁵ Hana gny toetsy manahaky gny an-Dranagnahary rozy, nefa la handietsy gny heriny. Miala amin'iregny olo regny. ⁶ Fotoa gny sasany tamin'ireo la reo johary zay militsy ao an-tokantragno sady manaitsy reo sevaky dala. Reo ro ampela zay tsy afaky amin'ny fahota voho voatariky amin'ireo fila samihafa. ⁷ Reo sevaky reo la mianatsy avao, nefa tsy avy amin'ny fahaia gny fahamarigna mihintsy. ⁸ Manahaky izay avao koa i Jana voho i Jambra nitsanga nanohitsy gnan'i Mosesy. Tamin'izay la nitsanga avao koa reo mpampianatsy sandoky reo hanohitsy gny to. Rozy la johary simba fisaigna, tsy nankasitraha tamin'ny finoa. ⁹ Fa tsy handroso lavitsy rozy. Fotony gny hadalany la ho vita mazava amin'ny olo iaby, manahaky gnan'ireo johary reo ¹⁰ Fa laha nareo koa, la fa nagnaraky gny fampianarako, gny fitondra, gny fikasa, gny finoa, gny faharetam-po, gny fitiava, gny fahareta, ¹¹ reo fagnenjeha, reo fijalia, sady zay nitranga tagnamiko tagny Antiokia, tagny Ikonioma voho tagny Lystra. Niharitsy reo fagnenjeha zaho. Bakamin'ireo iaby reo, la namonjy gnahy gny Tompo. ¹² Zay iaby te-hiay araky gny fomban-Dranagnahary ao amin'i Kristy Jesosy la ho enjehy. ¹³ Reo olon-draty voho reo mpisandoky la ho agny amin'ny raty avao. Rozy reo la hitariky reo olo hafa ho agny amin'ny lalan-diso. sady reo vatany la ho voatariky amin'izay. ¹⁴ Fa laha nareo koa, mipetraky ao amin'ireo raha zay fa nianaranareo voho fa ninoanareo mare hoe bak'aia ro fa nianaranareo. ¹⁵ Hainareo fa hatramin'ny fahazaza la fa nahay reo asa soratsy masy nareo. Regny la hahavita hampahendry gnanareo ho amin'ny famonjea amin'ny alalan'ny finoa gnan'i Jesosy Kristy. ¹⁶ Gny Soratsy Masy iaby la bakamin'ny tsindrimandrin-Dranagnahary. Izay la tombony ho gnan'ny fotom-pampiagnara, ho gnan'ny fanondroa reo diso, ho gnan'ny fanitsia, sady ho gnan'ny fampiofagna amin'ny fahamarigna. ¹⁷ Izay la mba hahavy gny joharin-Dranagnahary hahay soa, voho ho voaoma tanteraky amin'ny asa soa iaby.