¹ Njite Job shepani, lriaco cayo: ² ''Notaitá cadantja noanji coshodaca jlimiñaca jliaji njorrapitalri inaco; ¡notaita cantja nowica jlimiñaca jliaji njorrapitalri inaco! ³ Ima jamiña pjacana panaya naoya njaji caida macapawani lricoperri. Cayoshopa corrin noanji coajica caacoca njoa matsia ⁴ Jliaji Itaita kjeti iminalri iyawitaca njoa, nocafica irraca manjeti; njaji Dio jirrapiteta shopa pja nawacacawa papocotsa nokjoete. ⁵ ¿Capja matsi jlianjiacacawa jliaji maficalri burro lrirso cádanaco jliñjaopemalritsi? o ¿Jliemataca jliaji vaaca lrirso cádanaco lriñjaopemalritsi? ⁶ ¿Capja pataita paiñjaca iñjaodati mapiwacadalri? o ¿Coca lrijoica jliaji coamefe iitada jalramidalri? ⁷ Corrin noma nonotacana; iñjaoddati matsiperrimi shoca nocapaca narso. ⁸ Nooma Dio inaitjaca jliaji notatjalri lriinai, njaji nomalri lrinaitjaca norso: ⁹ ¡matsiantja Dio íinoca njoa papienirri, kjeyantja Lrinoca njoa wadee caafi catoa njoa! ¹⁰ Icatsantja njaji itaita icatimata njoa, catimantja njoa icaiyati mawayacacadalri ikjaote: ima corrica nomjepataca lriaco jliaji Mamatsicanadalritsa- ¹¹ ¿coca pjaotsa jliaji nowapalri caafi cádanacotoa njoa? ¿Coanjiotsa njoa, coadetsa nofá jalredaoca lrico? ¹² Corrin jiipadaca njoa. Corrin tsipalraca jliaji nodada. ¹³ Ajádalrica jliaji nocaiterri corriketsa kjaida njoa, njite corritsa norso noanjikje ima jliaji icadaacada norsoni oopi jlitani nooya ¹⁴ Njaji inaiki iwacapenatsa njaji wadepenatsa mayamica, njaji nakitsiñapenji narsotsa nacañjata nacapa coajica kjenaca nacapaca lrirso cayo cádanaco; njite corri cadetsa lria matsiadalri Dio irso, narsotsa nakitsindatacani. ¹⁵ Mitsa njaji nokitsiñape corrin namaca njoa, cayocanaji onipaokja sho iamarracadawa jalrapocolri ricó, mitsa miperri catsana, ¹⁶ njaji ooni cadaocaperri ima ima njepaacacao njaji ooni naicao, ima itamana jiwacawa nanaco. ¹⁷ Nacodo cádanaco njaji ooni tarraperrimi icamitsa neñacawa; nacodocawa jamolri sho naofacawa ioya. ¹⁸ Njite naapowa njaji inaiki jiyapacapewa niini pafe ricojle-nakja naawa lrioya naji capoa naoma a kjerreca naoketa ooni; mitsa naapowa njaji jiyapacapewa niini icamitsa nawayacacawa corri capoa matsia jliaji jiipai. ¹⁹ Njaji inaiki aimadan yacapewa nacapa Tema lrikjoite, njite njaji aimadan Saba lrikjoitepe nawapa naiketa ooni nirse. ²⁰ Nacada piatja nacaolre naoketaca ooni niini. Naatja nirse, mitsa corrin naoketa jliaji naomalri ima nacashata catsana. ²¹ Niini panaya sha nokitsiñapeji corritsa cocaca sha norso; ima ifietaacacawa icapa cádanaco coanjica njoa panaya. ²² ¡Capja notatjaca iinai apada iyarro inakjoite norsowao macoadatsa? ²³ o ¿Notatjaca iinai iyomjetácarro njoa nocoema ioya, o iyomjetacarro njoa naoya njaji jirrapitetacape njoa? ²⁴ Picananta njoa, njite njite corriotsa kerroacarroca njoa; picadaa noanji coancawaca nomatada. ²⁵ ¡Caiwica naaca panaco njaji yacoti ajádalri-perri! Mitsa, ¿Coaji notaita noanjica ajádalrica pimayacantaca kjaida sho nomatadanta naco? ²⁶ Corrin coadaca irso njaji yacoti nocaiterri irso; icadaa catsa jliyapacawa ioya lriaco jliaji jitacada icaolre ima corrica coadaca irso. ²⁷ Njite itopita apada maoñjerri naco, njite pjica apapeco irrirri pikitsiñapenji ipia pidawá carroni padawa capisho cocacan. ²⁸ Niini paya, pinaitja matsiacalri picapa norso, ima corrin notaita nocashataca yanji cayoyatsa. ²⁹ Ajena sha, notatja iinai caiwi ricotsa, macadatsa matsidalri jiwacawa inaco mikjapantsa. Ajena sha, ima niinica jliaji njorrapitalri ikjaote. ³⁰ ¿Capja niinica ishati noenené naco? ¿Capja corrica nonoma itaita yanjica matsiperri naco?