¹ Njite Job shepa jimao, lriaco: ² ''¿Coshoda pjenaotsa icadaa njorrapita njite imatsiketa njoa yaaco sho? ³ Die piapena caaco sha norso mapeyocanatsa; njite corrin capaimanica iicao cayo capoa caacoca sha jiidati ricó norso. ⁴ Ajádalri cadaa nomatadaca, njoatsaotsa icaoña jliaji imatsicanati nonaitjalri. ⁵ Ajádalri matsiaperri cadaa yanjiacacawa noya, njite icaite nonaitjandaca ikjaote njorrapita cayoji panaya sho, ⁶ niini pedaa yajintsa Dioca jliaji inaitjalri norso maatsi njite jliacatsa yanji coajica lrinaitjaca njoa. ⁷ Ima nowana mana coyoji: ¡Nanaitjaca norso maatsi! mitsa corrin coca shepa njoa. Nowana tja nakitsindatácarro njoa, mitsa corrin coca inaitja norso matsia. ⁸ Dio icadaa nodanawa inipolrico wadee njoyapacawa, njite Lricadaa cadaocádalri noapowa lrico. ⁹ Oopi Lripeco njoa naoya njaji icadalri pia caaconaca njoa, njite oopi Jlita noya jliaji noparramalreta njowida nacoda pia. ¹⁰ Corrin pacapa corricawa Pinaitja norso maatsi, njite oopi nowayacaacawa; oopi Piwayaketa noya pjiomi njaji matsiaperri nowapalri piatja. ¹¹ Kerroa matsinani nokjoete; Lricapa norso lricapacaji Lricoema. ¹² Papoco nanoca noikjaolre njaji Lritsolrodaonai aimadan; nawaketa jiipai apafetsa njerrácarro noyacalre iwai naco njite nanaitja naapana poco noopana iwaida naco. ¹³ Lricadaa teeco noya njaji nokitsiñape; njaji noajialrenai corrinatsa naoma nakitsindataca njoa. ¹⁴ Namatada norso njaji nokitsiñape; pjiomi njaji noajialre oopi namaodaca nooya. ¹⁵ Njapia njaji imacapem pia noopana lrico, njite njaji inaitjepe norsoperri nacapa njoa corrialri capisho nacapa njoa; apetarri shotsa nacapa njoa. ¹⁶ Nowana tja jliajinorsodalri, mitsa corrin jliepa njoa, nowana cadanani caiwi ricotsa. ¹⁷ Eeco roaji nonoma lrico rsoaji noino; njaji nokitsiñape jicoperri njodoa ioya nadofiá tsakja njoa. ¹⁸ Namenata tsakja njoa njaji yempetipe pamoyoaperri; caaco nokjoete pjiomina njonico cádanaco caacócarro njoa. ¹⁹ Maatsi nacapaca norso pjiomi njaji nokitsiñapeji, njepondataca njoa pjiomi njaji nopeyonipe. ²⁰ Meepetsa njoa, iñapiñatsa pjiomi njoa; midalritsa njoa cafirri toa. ²¹ Kjenaa icapa norso, kjenaa icapa norso, nokitsiñape, ¿coada pa' Dio inota njoa Lricaapi sho? ²² ¿Coada ioma icapaca coajica njoa Dio capisho sha? ¿Coada corrin metamina yajiacacawa icaitepe cádanaco nonaco ishati nacitsa? ²³ ¡Noomantja apada idanaca coajica caacoca njoa! ¡Nadana cantja paperra lrico pjiomi njaji nocaiterri! ²⁴ Nadana cantja jiipada naco padanashopa tsipalrefi sho o mocafena sho corripetsa shatawa! ²⁵ Mitsa noajintsa cafidalrica Jliaji Iwentacaita njoa, njite apapia watsa jalredaoca no-Minalri watsa icaite noacona coandalri piaca njoa, ²⁶ lriipa cadaotsa jliaji nodada atee noipe ipacapem jiwao nodada ioya, nocapjeniotsa Jliaji Dio. ²⁷ Nocapaotsa Dio notsji sho catsa, corrin apada itji sho cantjá. Mjaidenatsa njoa. ²⁸ Icaitecadaa: ¡Coajeotsa wapinetani! Icatsa imatsicanati jinirri, ²⁹ niini peda ifiowa matseta iwana, lrioya jliaji matseta Dio jirrapiteta shoda imatsicanati, niniotsa itaita yají niinica jliaji apada icaitecada paacona.''