¹ Njite Bildad suhita tairri sheepa, lriaco: ² ''¿Coancaojli pjenaotsa yami caacoca pjia? Piwaopia toa, njitenaotsa caaco fa. ³ ¿Coada piwada maficalri shoca fa; coada matsilri shoca picapaca warso? ⁴ Pjia iopatacalriwa pjiwacawaacatsa pirroa lrico, ¿Capa wamacacaotsa jliaji jiipai pikjaote o pacarsetaca njaji jiipada naofacawa ioya? ⁵ Mitsa, icamitsa yalrimi caotsa nacamarrana njaji inaiki matsiperri cayoperri picayosho; yalrimi caotsa cayoji payalriketa capisho tiyé. ⁶ Cadaoca caotsa piipana lrico; yalrimi caotsa jliaji camarrai icanacada pia pinaco. ⁷ Corrinatsaotsa pitaita piemajicawa ima mjaida kenaotsa pjia; piwaopiakje tsaotsa iino pjia. ⁸ Njatsa njaji pinaitjaji maatsi jipaotsa pjia; jliwacatsaotsa iawa lriowepi nacojle. ⁹ Pema owepi jipaotsan jliipa naco; njite pakja watsa ipapini. ¹⁰ Pakja jinorrotikja nadawanda jipai rico iwapani; njite pada owepi lripiawalre iwapani lriapowa lrico. ¹¹ Njaji cafainaperri icadaotsa lrifiocawa pjiomi a kjerrecawa catsa; a kjerrecawajle catsa lriawaji njaji cafainaperri napinetacaotsani. ¹² Kjenacaotsa jliaji ricodalri pia, njite caidalritsaotsa matsi catsa lrirso pjiomi. ¹³ Ipoati iñjacaotsa lridada; mayamicalri yenipe ipjerriti iñjacaotsa pafepena Iridada naco. ¹⁴ Corri tsakjaotsa lrimaodacá lriofacawa lripana lrico ima jlitaca lrioya jliaji imaodacakjeti lriipana lrikjoite njite natsoeta nadeni lriderse jliaji cafainadalri imatsiketacada italricanaa. ¹⁵ Lriofaotsawa lripanaita lrico cayoji corri capisho lriyadani njite napeco caotsa azufre lriipana naco. ¹⁶ Meta caotsa njaji lripalri jiipai ricope toa; njite meta caotsa njaji lriki tsakja. ¹⁷ Corri natsa cocaotsa iwadani jalredaoca lrico; corriotsa coca inomatani inipolrico. ¹⁸ Njetaotsani camarrai ioya cadaocadalri lricojle njite napeco caotsani lrioya jliaji jalredaoca. ¹⁹ Corriotsa lrirso carroca lrienipe, corrin tsakjaotsa lridakenai nainai njaji jalredaoca lricope, corri watsa pacapa apada lrinakjoitedalri lriofacawa lrico pia. ²⁰ Njaji iofacapewa jérri imotolri njiteo nafio watsa pekirritsa nama njaji jipalri lrinaco padaa nacotsa jécoapi; njite njaji iofacape jérri imotokemjete, nafio watsa pekirritsa lrikjaote. ²¹ Icatsa cayocaotsa njaji inaiki matsiperri, naofacawa njaji inaiki corriperri yanjí yanjí Dio''.