¹ Njite Job shepani, lriaco: ² ''Aimena njomi nanaco njaji cayoperri; pjiomi sha corrin yanjí coanjica icatimataca apjetsida. ³ ¿Capjaotsa pa' natsaotsa nawayacawa njaji yacoti mikjapamperritsa? ¿Coancao sha sheepá-carro cayoji sheepa capisho? ⁴ Notaita tsakjantja caacoca njoa cayotsaji icayosho, cayo cadantja jiyapawa njoa sho; noomantja coamperrica njaji yacoti caacocarro njoa ikjoete njite nodetsicantja njowida nocaacarro iicao. ⁵ Caaco cantjá njoa nocatimatácarro sha, Njaji yacoti nomotoitalri nonoma lrico lricadaa metaamica yanjiacacawa icaiya ioya. ⁶ Caaco njoa njite corrin yamica caiwica jliaji icaiyati. Mitsa corri cada caaco njoa, ¿coaji tsakja notaita nokitsindata? ⁷ Mitsa Dio, oopi Pimapjita nodada; Pjiatsa iwayaketa pjiomi njaji noopaneta. ⁸ Opi Piwayaketa njoa; Pjiatsa icadaa yacoti caacocarrona nokjoete; icamitsa picadaa mepeca njoa niini noapi imotoketsawa. ⁹ Dio, irroati ricó Pipinetaca njoa njite pimatsiketaca jliaji nodada; Pimjoaca Pietsa nokjoete; njaji nocoema nacapa kjaida noikjaolre, Pimatsiketa cádanaco njoa. ¹⁰ Njaji inaiki namjeco nanoma cacócarrona maatsi nokjoete; nañá nocacoda naco; njite nawacacawa padenirri nokjoete. ¹¹ Dio icada njoa narso njaji inaiki matsiperri, njite lripeco njoa naikjaolre njaji inaiki inaitjacape matsidalri minitsa. ¹² Irsocada pia pjiomi njoa, njite oopi kjenata njoa; Jlipa njoa nofeda nakjoite, njite lripeeco paitapenaita njoa; njite Lricadaa njoa Lriwiaca carronawa. ¹³ Njaji Lrirsoperri iyawitacape neema nowaida naco, oopi Dio icayaonita notepe; njite corrin kjenaa Lricapaca norso; oopi Lricadaa nopitirse iarrowa jiipai nacojle. ¹⁴ Lrinaitja noyaoniwa cadalripia catsa Lriomaca, njite Lríno nokjoete cayoji tsolrodao sheco capisho jliponda ikjaolre. ¹⁵ Nonaitja tsacowana notsayaniwa noitácarro nodada; njite njoeta njowida paalripoco lrico. ¹⁶ Camalrena kena noecoa noiyakje ima; notjimaca irroketsawa niini corrin notaita nocapaca matsia ¹⁷ corri cadanatsa nonaitja maatsi apada irso, njite ajádalri sho notatjaca Dio iinai. ¹⁸ Jiipai, madawatsaotsa noirrana; njite picadaa nanjí nonaco coajica njoyapacawa. ¹⁹ Eeno lricojle lriofawa jliaji yanjicada nonaco icaiterriotsa coajica; yenonrse Lriofawa jliaji cacolriotsa noikjaote. ²⁰ Necaacatsa noicao njaji nokitsiñapenji, mitsa njoa, noiyacayawa noma Dio. ²¹ Notatja dekja lrinaco jliaji cacolriotsa noikjaote Dio ipyalre eenolricojle, cayoji caaco capisho apada atsia lricodapidalri naco. ²² Njite aimawalriena shapodami, noawatsa apafe lricojle corricawenatsa pataita padiaca njiteo.