¹ Jliaji inaiki jiicodalri inarro ioya, kjeyatsa lriofacawa jalredaoca lrico njite pakjamicani matsirri sho. ² Lritaoñawa jiipai rikjoite potira itaoña capisho njite kjeyatsa mayamicani; icamitsa lriñacawa kjeyatsa cayoji jerri idanapiam sho. ³ Pinaitja matsiacalri macajitsa norso. Mitsa Picaite noacona coajica njoa. ⁴ ¿Coca itaita jitaca pada maopitjatsa pada caopitjadalri ioya? Cotsa coca. ⁵ Pjiatsa icadaa coshodaca nacafica njaji inaiki jalredaoca lricoperri; corrin coca itaita jiyapetaca njenana lrioya jliaji picadalri narso. ⁶ Macapatsa lrirso, Dio, lritaitácarro lriwafetacawa, lritaitácarro lricatimatacawa lrijalredaocate lrico Picadanda lrirso cayoji piinai capishotsa, lritaita cadaa tsakja. ⁷ Naoca cadaa jliaji apana jaico, lritorro imoto tsenakjawa lripocoda nakjoite wadee mayamica jliaji lripocoda. ⁸ Pekirri cadaa lripocoda jliaji jaico naocanda jiipai rico njite mayami lripocodam imotocadam jiipai ioya, ⁹ mitsa lrianjí cadaa tsomica ooni lrioya, icamitsantja lritsiwi imotoa njite lriki itaoñawa cayatsaji oopi sho. ¹⁰ Mitsa jliaji atsia icamitsa mayamicani; mjaidadi njite jliapodami yaami jlirsaca lricaolrewa, njitédalri corritsa panji a kjerreca lriawa. ¹¹ Cayoji meeta capisho jliaji apapji calrita njite meeta capisho jliaji apapeco ooni, ¹² icatsa cayo mayamica njaji inaiki njite corrinatsa nadia nacafiawa mayamicalri ioya tsenakja. A kjerrecaotsa eenocoma iwayacawa corriotsa njenicó carrocawa lrioya jliaji talricai jipalrina. ¹³ Nomantja Pidawaca njoa irrirriapji ricó teeco matsicalri ioya, Pidawa cantja njoa a kjerrekena yami kerroaca Pjia, Picadaa cantja njonaana coshoca lriwiaca nofacawa nirse njite Pidieta tsenakjantjá njoa njite Piwaopia cádanaco nonaco. ¹⁴ Mayami cadaa apada inaiki, ¿capja caafican lripieta? Cayo cadantjá, noomantja nowapaca a kjerreca njonaa iocawa lriwatacá-carro njoa cotsantja coadaca mapji cada njoa. ¹⁵ Pjiantja iwana njoa, njite njoantja sheepa Pjia. Njite Piomantja apada idejikjeti Pinaitjá-carro. ¹⁶ Piniweta cantja cadalripiaca nopjoaca piwapá-carro njoa; Njite corrintja Pidanaca nanaco njaji nomatsicana. ¹⁷ Pjietacantja tsaco lrico njaji nonaitjaji maatsi njite Pipapica taimi naicao; Piita cantjá naicao njaji nomatsicana. ¹⁸ Njewacawa njaji jiipana njite lriwayacacawa; njite nacarsacawa tsakja njaji jiipada naofacawa ioya; ¹⁹ njaji jiipada naijacacawa ooni sho; njite aima cádanaco ooni lricotsoca pjiomi jiipai italre. Icatsa cayo piwayaketaca pjiomi njaji nawapalri njaji inaikinai. ²⁰ Pjia manatsa shamana, njite mayamicana; Pipadameta lricapacana njite picadaa lriawa mayamícarroni. ²¹ Nanaitja cadaa matsia narso njaji lrienipe, corrinatsa lrianjí; nakjenata cadana, corrinatsa lricapa narso. ²² Icamitsa lrianjica icaiyati lridada nacó, njite lriiyaca lricaowaca tsa.