¹ Nocapjenina notji sho pjiomi njaji; njomi cádanaco nanaco noanji matsia coamishopaca. ² Njaji piajirri inaco, noanjin tsakja nanaco; corrin pjia pjaaca noya. ³ Mitsa njoa, matsia pjatoa norso caacoca njoa Itaitakjetinalri iinai; nooma caacoca njoa Dio inai catsa. ⁴ Mitsa sha, idawa ishati sho jliaji ajádalri; cayoca pjiomi sha nacayosho njaji itacape majicaperritsa itapeca. ⁵ Matsia pjatoa irso maco cadatsa sha. Canjikjeperri cantja sha corricadatsa coca icaite. ⁶ Panaya noma jimica coajica nocaiteca; iwapaotsa jimi njaji yacoti nomotoitalri nonoma lrico. ⁷ ¿Capja iwada Dio catsa inaa caacoca sha, mitsa caacoca sha ishati nacotsa Lrinaco? ⁸ ¿Capja icañjataca Lricapa kjenaca icapaca Lrirso? ¿Capja iwada shaaca caaco Lrinaco talricanati ipeyajle idanatá carroni Lricoema ioya? ⁹ ¿Capjaotsa matsiatsa irso Lrioma cádanacoatsa Lrianjíca ianco? ¿Capjaotsa itaita icashatacani cayoji icashata capisho njaji atsianai? ¹⁰ Ajádalrica jlirrapitetaca sha icaite capoa matsia apjetsida nacotsa njite icaite maatsi apjetsida naco. ¹¹ ¿Capja corri cantjá Lritalricanacatsa ifieta pjia? ¿Capjantja corrica pifio Lriwana? ¹² Njaji yacoti picaitenji picananta shopa icamitsa nawayacacawa palripokjoa iwayaca capishowa; Miperritsa njaji pidanaita ima caalri shoperri catsana. ¹³ Maacotsa sha, imaca njoa apadatsa, notaitá-carro caacoca njoa, coaji cadaotsa njoa, cayoenaotsa. ¹⁴ Prontoena njoa coanji cadaotsa njoyapawa; coanji cadaotsa njoa, cayoenaotsa. ¹⁵ Ima Lriino cadaotsa njoa, corrinatsa nowapá carroca matsiadalri; mitsa nooma nocaote Lrirso nanaco njaji nonaitjaji Jlimícarro. ¹⁶ Lrikjaotenaotsa Dio icaiteotsa nonaco corrica coca nomatsicana, ima corrica noawa Lrikjaolre atsia camatsicanadalri iá capisho. ¹⁷ Dio, piwapa pjimi matsia njaji nocaiterriotsa; picadaa naocawa pjinacolricojle njaji yacoti nocaiterri. ¹⁸ Picapa, nowaopjienina matsia coanji caotsa nocaite nonacowaca pipeyajle ima noanji corrica coca nomatsicana. ¹⁹ ¿Cocaotsa jliaji icaiteperriotsa nonaco talricanati iofacawa lrico ipeyajle? Dio, píno cadaa pjiacarro caaco, njite pioketa cadaa nomatsicana ima nomatadaca nocaite capoa corrica coca nomatsicana, icamitsaotsa maacoca njoa njite nocadacao piinócarro njoa. ²⁰ Dio, yamadatsa njaji nomalri pinaitjaca norso, niniotsa corriotsa nodawaaca carroca pioya: ²¹ ajena pjirrapitetaca njoa, njite ajena pifietaca njoa pifaina sho. ²² Niniotsa Piwana njoa, njite njoepaotsa pjia; o njoa watsa caaco pirso njite pjia watsa shepa njoa. ²³ ¿Coshoapao njaji nomatsicana njaji nonaitjalri maatsi? Picadaa noanji njaji nomatsicana nonaitjalri ikjaote maatsi. ²⁴ ¿Coada pidawacawa noya njite picapa njoa cayoji Pjiponda sho? ²⁵ ¿Capja Pjieco cantja panapje shapodam yarracadawa caolri ricó? ¿Capja cacoadaca Pirso njaji malritsi meetapemi papocope papapica? ²⁶ Mitsa Pidana yacoti jipitiperri nokjoete; Picadaa nodeeca nonacoa njaji imatsicanati noyempeti nakjoite-perri toa. ²⁷ Njite Pipresota njaji njoipa jaico naco; Piwapa tsomi njoa picapácarro coca njaji nonaitjalri; Piwapa picapa matsia pjiomi noanjicawape; ²⁸ ajádalri, noanjintsa ipacadam shoca njoa icodocadawa, tsaya camarra iñjandamina.