¹ Njite Job shepani, lriaco: ² ''Icatsa sha inaiki cajikjeperri; njite lriwayacawa lriajikje mayami cádanacona. ³ Mitsa njoa norso tsakja noajikje cayotsa icayosho; corrin njoaca macoadatsa ioya. Niini pjiomi njaji inaiki yanji lrinaco. ⁴ Cotsa midalrica njoa necaa carrontja noicao njaji nocodapiperri, ima njoa, apada iwanacada Dio, njite Dio sheepa njoa. Njoa, apada atsia mamatsicanadalri, njite panaya, icamitsa necaaca noicao. ⁵ Apada inaiki iofacada matsia corridalritsa jirrapita lrirsócarro lrinaaniwa, lrimenata jliaji inaiki jirrapitacadatsa iofacawa; lrinaitja pja lriwaopiakjewa njerrapitácarro pja njaji jirrapicapetsa iofacawa jalredaoca lrico. ⁶ Nayarroaji njaji inaiki cañaitéperri lritaoñacawa narso, njite njaji iemacape Dio ikjoete nawaada corrica coca itaita nakjoete; njite nacadaa nacaolre nanacotsa njaji nataitalri nadejica nacapi sho ima nadioteca njaji nacaapitsa. ⁷ Mitsa panaya, pitatja pjimio njaji maaficalri kerroaperri, njite njaa watsa icananta sha; itatja jimio njaji wipjiarro, njite njaa watsa icaite sha coajica. ⁸ O cácoca sha jiipai irso, njite jiipai watsa icananta sha; njaji copje lricoperri nacaite tsakjaotsa irso coajicaaca. ⁹ ¿Coajídalri pa nanakjoite njaji maaficalri yanjí Dio-ca ionaitja jliida sho pjiomi njaji? ¹⁰ Dio icaapi ricoca nacafica pjiomi njaji caafiperri njite jliaji caolri icadaacada caafi njaji inaiki jalredaoca lricoperri. ¹¹ Femi coajica nacaiteca njaji inaiki, njite wáwi wacapaona cayoji páwi capisho payanan. ¹² Njaji inaiki pekipenai narso yanjikjeti; njite njaji iomacape iofacawa aima jalredaoca lrico narsotsa njemica matsia naicao. ¹³ Dioca jliaji irsolri yanjikjeti njite njite itaitakjeti; Jliatsa irso yacoti njite kjeyapoa panjica. ¹⁴ Jliaji Lripecoji, corrin coca itaita idiaca jirretani tsenakja; Lripresota cadaa apada corrin coca itaita iwatacani lrioya. ¹⁵ Lridanata cadaa jliaji ooni yamarracada, icamitsa meetaca jliaji ooni; njite lricadaa cadantja lrimotoa lriamarracawa ioya, icamitsantja jlietacao jliaji jiipai. ¹⁶ Jliatsa irso jídati njite yanjikjeti; Lricaapi ricoca njaji cashaperri njite nacashataji. ¹⁷ Lridee téeco njaji icaitecapena, njite caiwica lriaca nanaco; njite lricadaa matsilrica njaji caconaperri icaitecape naacona. ¹⁸ Jlita njaida njaji talricanatinai wadee napresota catoa njaji inaiki; Lricadaa tsakja presó-carro tsakja njaji talricanatinai. ¹⁹ Lripeco téco njaji sacerdotenai, njite caiwi lriaca nanaco lrikjaote njite lriwayaketa njaji inaiki kjaidaperri. ²⁰ Lritecojleta nawaopiakje njaji inaiki caacoperri inaiki irso nacadaji nacaolre inaco njite lricadaa majicaca njaji pekipenai. ²¹ Lricadaa corricarro inaiki ioma njaji talricanatinai yenipe njite lricadaa mjaidaca njaji kjaidaperri. ²² Lricatjinata pjiomi njaji iofacapewa tjewaca cadaocacawa lrico, njite jlita camarrai cawa lricojle jliaji cadaocadalri naofacawa lrico njaji mayamperri. ²³ Jliatsa icadaa kjaidácarro njaji inaiki apacoa jiipai lricope, njite Jliatsa iwayaketana; Lricadaa caconácarro jliaji jiipai macacoepe, njite Jliatsa icadaa nadécarro presona. ²⁴ Jlita nawaopiakje njaji apapoco inaiki jiwidapo jalredaoca lricoperri; Jliatsa icadaa najicawa macadatsa jalrapocolri ricó maapowanacawa lricotsa. ²⁵ Natodaca njaipawa cadaoca cawa lrico ima macamarracana; Lricadaa natetjewa cayoji lritetjé capisho jliaji apada idewanacada.