¹ Njite Zofar naamanita tairri shepani, lriaco: ² ¿Capja apada irsotsa shepaca coanshopaca njaji yacoti picaiterri? ¿Capja parsotsa pjeepaca njaji yacoti lricaiterri jliaji atsia pakjamidalri yacoti sho? ³ ¿Capja pimacoitaca njaji apjetsida naikjaote njaji yacoti picaiterri? Picaa cádanaco nanaco njaji wacanantalri, ¿Capja corrica pacapa apada itaitalri ipaimanietaca pjia? ⁴ Ima piaco Dio irso cayoji: ''Matsiatsa cayoji nowaopia capisho, corritsa coca nomatsicana pipeyajle.'' ⁵ Mitsa caaco cadantja Dio pikjoete, ⁶ lricaitécarro pirso njaji lrianjikje corridalritsa pianji. Ima yajicadaca aima yanjikjeti naco. Niinintja corri pjatsa aima Jlirrapitetaca pjia pimatsicana ikjaote. ⁷ ¿Corriotsa pianjicarroca Dio naco piomajicada? ¿Capja pitaita pianji pjimica matsia lrirso Jliaji Itaitakjetidalri? ⁸ Aimadalri inaco jiaji nocaiterri cayoji yenon capisho jliaji eeno; ¿cocantja itaita inaitjaca? Tjewacadalri pjaaca irrirri ioya; ¿cocantja pitaita pianjica lrinaco? ⁹ Ima jalripadalri pjacani jalredaoca ioya, njite macaite pjacani manoa ioya. ¹⁰ Jliyapa cádanaco Lrimacoita coca catsan, Njite Lriwana coca catsa Lricaitécarro lriacona, niini ¿cocantja itaita yajica Lrinaco? ¹¹ Lriajintsa lricapaca njaji inaiki cashaperrimi; ¿Capja corrica lrinaco njaji icashata-captsani? ¹² Mitsa njaji inaiki matsilriperrimi corrin narsoca nawaopiakje; icamitsantja nataita najica njaji inaiki matsilriperrimi apana borro imotoita cadaa lrienipeo apada inaiki. ¹³ Mitsa pianji cadaa camatsicanaca pjia njite pipiajleta picaapi Dio ikjaolre; ¹⁴ njite pianji cadaa pinaitja piaca pimatsicanawa, mitsa opica yami pinaitjaca pimatsicanawa, njite corrin pioma pikitsiñape inaitjaca cayoji pinaitja capisho pimatsicanawa. ¹⁵ Niinintja pjirreta piecoa mapaimantsa; lrikjaotenantja corritsa coca iwana pifiowa. ¹⁶ Corrinatsantja piwada coaji piaca kjenaca pjia; icamitsantja piwadaca cayoji ooni omota capisho njite corrin lritaoña pjawa icamitsa lridiaca lriorrocowa. ¹⁷ Icamitsa matsia pjaca piofacawa njite matsia pjiomi njaji pirsolri cayoji matsia capisho jérri icanaca mayacan cádanaconi; cadaocadalri iocacadawa icamitsantja matsiacani cayoji jérri icana capisho piyompinaco toa. ¹⁸ Njite pimaodacatsa piofacawa ima niinica jliaji piwapanda; cayoshopa corriotsa matsidalri iocacarroca pinacojle, piofa catsaotsa pimaodaca. ¹⁹ Picoawa pimaodacatsa njite corrin coca ioca ifieta pjia; njitenakja naoma pjia pinaitjácarro narso matsia. ²⁰ Mitsa namatadacaotsa nacapaca njaji inaiki matsiperri iwaopiakje; njite corriotsa yomjécarro pjia naoya, icamitsa nawapalri mayamicalri.