¹ Mapjina nofacawa jalredaoca lrico. Nocaiteotsa mapaimantsa pjiomi njaji nomalri nocaiteca. Nomotoetaotsa njaji jipitiperri noanjirri nocaolre ricó. ² Nocaiteotsa Dio irso cayoji: ''Picadena njorrapita; mitsa picaite tsakja njoa noanjícarro coadaca ikjaote pjirrapiteta njoa. ³ ¿Capja matsiatsa picadaaca njorrapita, njite pimenata njoa pinaitjanda picaapi sho, njite picaa picapa cádanaco coajica nawaopiakje njaji inaiki matsiperri iwaopiakje nokjoete? ⁴ Corrin atsianai itji shoca njaji pitjí, corrin picapa cayoji nacapa capisho njaji atsianai. ⁵ ¿Capja cayocatsa piofacawa jalredaoca lrico nacayoshotsa njaji atsianai? o ¿Mayami tskja pjia cayoji mayami capisho njaji inaikinai? ⁶ Cayo noaco ima pianjica pioma pianjícarro pjiomi nomatsicana naco njite pianji tsakja pitatjetaca nanaco njaji nonaitjanji ianaco maatsi, ⁷ Pianji cadanatsa corrica coca nomatsicana njite corrin pacapa apada itaitacada iyomjetaca njoa Pioya. ⁸ Picapi sho pinaitja pjiomi nocapacana, nja inaitja njoa, njite caicaya toa pimatsiketa njoa. ⁹ Nooma pidiaca piwaopia caalri shoca pinaitja pia njoa; njite panaya pidietaca tsenakja njoa caalri ricojle tsenakja. ¹⁰ Piarro piaca njoa cayoji parro capisho vaaca inia, njite picadaa cayoji vaaca inia jipaaca capisho lrinaitjaaca carroa quesowa. ¹¹ Pinaitja noyawa njite noipewa tsakja notsayaniwa, njite picadaa notarracawa iñapi njite notarrapitewa. ¹² Pjiatsa iaa norso nocaficao njite tsakja norso yacoti corridalritsa pimaodaca ioya; Pikitsindata capoa njoa corrin picadaa mayamica njoa. ¹³ Mitsa, pidawa noya yacoti picaolre ricó. Noajintsa cayoca piwaopiakje nokjoete: ¹⁴ nonaitja cadantja nomatsicanawa, Picapatsantja njaji nonaitjalri; Corritsantja piyomjetaca njoa nomatsica ioya. ¹⁵ Matsidalri cadatsantja inaikica njoa!, ¡Kjenadalritsantja njoa! matsiadalri cadatsantja njoa, corrintja notaita njorretaca njowida nocapá-carro pjia, ima aimaca njaji njorrapitalri inaco njite picapa coajica njorrapitaca. ¹⁶ Njorreta cadantja njowida, ikenantja Pinoca njoa, cayoji yaawi iino capisho lriwiniwa; cayo cádanaco Picadaa nocapaca Pjia coajica kjaidadalrica pjia. ¹⁷ Pidee noikjaolre walriperri icapacape njoa njite ikena kerroa pjaca pjia nokjoete; piinocantja njoa walriperre tsolrodaonai aimadan iapiya. ¹⁸ ¿Coada tsakja, pjita pia njoa njodoa iwawa lrikjoite? Matsia pja piatoa mayamica njoa njitentja cayo corritsa coca yanjica njoa. ¹⁹ Niini cayontja njoa corri capishotsa coancaojli nomoto pia nocapa jalredaoca. Nomoto catsantja njodoa iwawa lrikjoite papienirri irrirri lricojle. ²⁰ Cotsa nofá carroca wia jalredaoca lrico. Niini ajena pjia nooya, pimakena njoa njowacatsa, notaitácarro nowafetacawa kjeyatsa ²¹ lripjeya noacawa corricawetsa notaita nodica njiteo, jiipai cadaoca cawa lricojle mayamicalri idanapia yapjitedalri, ²² jiipai cadaocádalri cayoji pamoyoa capisho deepi, jliaji jiipai iofacadawa mayamicalri idanapia yapjite, corricawatsa panji coajica, corricawatsa pacapa camarrai, icamitsa cadaocádalri cayoji deepi ipamoyoaca sho.