¹ Khandi nawona ekulu yaakha ne’syalo siyaakha, khuba ekulu lisokha nesyalo sisokha byali biweyewo, ne ali wawumawo khandi okhuwona okuyanja. ² Nawona esiko sikhuluutu esyolerefu, Yerusalemi mbyakha, yekha niyitula mukulu okhutula eyiri Weere, niyitekekhirwe ng’omweeya yibambasise wulayi nga bamwambasira wamwe. ³ Khandi nawulira ekono ekali niritula mu sisaala sy’Omwaami niriwoola liiti, “wunanu owikhalo wa Weere wuli nabaatu, khandi acha okhumenya nabo. Bacha okhuba baatu baye, khandi Weere mwene acha okhuba nabo khandi abe Weere wawe. ⁴ Acha okhubeeya wuli sika khu moni chaawe. Siwalibaawo okhufwa khwoosi oba okhulira oba esibeera oba owuchuuni, khuba entekekha nkhale y’ebiitu yakamire.” ⁵ Oyo owali kekhaye khu sisaala sy’owutuki kawoola atti, “Ndi khukhola wuli situla wuyakha!” awo kawoola atti, “wandika sino assi, khuba emboosi chino chesikiwa khandi ntufu.” ⁶ Kamboola atti: “Siweye. Nise Alufwa khandi Omega, Enjaka khandi Enjakamo. Eyiri oyo oli no’wuluwo nja okhumuwa okhutula mu nsulo ya’maachi ko’wulamu atasi amakusi. ⁷ Oyo owangula alisikhira bino byoosi, ni khandi ndiba Weere waye khandi aliba musoliri wange. ⁸ Ne abati, abatafukirira, abawalaba, abeeti, abadaamba, abakhola ebyamayiya bye’syalo, abenamira ebilongalonge khandi na’babacha boosi__ esifwo syawe siriba mu nyanja y’omuliro. Khuno nje okhufwa okhwo’khubiri.” ⁹ Mulala khuba malayika musaanfu owali na mabbakuli musaanfu amechufu ak’olumbe kecha kamboola atti, “Yicha, ese nja okhukhwekesa omweeya, omukhasi wa khakondi.” ¹⁰ Kamala kanginga kambira mu myoyo khu lugulu lwamaani khandi oluleeyi lukali, kanjekesa esiko sikhongo esyolerefu, Yerusalemi, nga situla mukulu ni siikha okhutula eyiri Weere. ¹¹ Syadukha no’luyaali lwa Weere, na makesi kamukulu kali nga amakina kebbeyi, nga egirasi yo’khu alitaari, eyimekhamekha. ¹² Yali nesida syamaani, esireeyi nebiriwa ekhumi nabibiri, nende ba malayika ekhumi nababiri khu biriwa. Khu miryango khwalikho ameeta ni kawandikiwakho ameeta k’ebikha ekhumi nabibiri ebya’Yisirayiri. ¹³ Yaliyo ebiriwa bidatu khu mukhono kwe’wutula lyuba, bidatu okhutula e’mukulu, bidatu okhutula emwaalo nende bidatu okhutula ewukwa lyuba. ¹⁴ Esida sye’siko sikhuluutu syali ne’misingi ekhumi nachibiri, khucho khwa wandiikiwakho ameeta ka batume ekhumi nababiri abakhakondi. ¹⁵ Malayika owalomaloma nange kali no’mudaya kwa sabbu okwokhukerera esiko sikhuluutu, ebiriwa byaasyo nebidda. ¹⁶ Esiko syali syakerewa mu wubambali no’wuleeyi okhwakanakana kakera esiko sikhuluutu nesikerero esyo kasyakana mbo siri emita 12,000 mu wuleeyi no wubambali nasirala khulooba no’khucha amukulu. ¹⁷ Kakera esidda syasyo syaba emikhono mikolole 144 mu khubala khwo mutu, malayika yikali nakhosesa. 18 Esidda syali syakholewa mu makina kebbeyi akalangiwa, “Jasipari” esiko sye saabu njerere, nga egirasi. ¹⁹ Emisingi che’sidda sye’siko chali chakholewa nende amakina ka nawuli mbya akebbeyi ngali lukali. Omusingi kusookha kwali okwa’makina akalangiwa Jasiperi, okwo’khubiri kwali nende akalangiwa Sapire, okwo’khudatu amakina kakwo kali kalangiwa Agate, naye okwokhune kwali nende akalangiwa, “Emeralidi” ²⁰ ne okwo’khutanu kali kalangiwa Onikisi, ne okwomukaga kali kalangiwa Kareneliyani, na’makina ako kwo’musaanfu kali kalangiwa Yelo Kuwarisi nako munana kali kalangiwa Berili amakina ko’musingi kwo’mwenda kali kalangiwa Topassi akokwe’khumi kali kalangiwa Chalisedoni okwe’khumi nandala Takwoyise naye okwe’khumi nachibiri kwaba kulangiwa Amesisiti. ²¹ Ebiriwa ekhumi nabibiri byali nibyo Parili ekhumi nachibiri. Wuli siriwa syali syakholewa mu Parili ndala. Engira ngali che’siko chali chakholewa mu sabbu njerere, eyiwonekherera nga egirasi. ²² Si nawona enyumba ya Weere mu siko, khulw,okhuba Omwami Weere okhira mu byoosi khandi omwaana wekoondi nje enyumba ya Weere. ²³ Esiko sisyali sidakha eryuba oba omwesi okhwadukhirakho, khuba oluyaali lwa Weere luyiwa owulafu walwo ne khandi Omwaana wekoondi etaara lyasyo. ²⁴ Ebyalo birikendera khu wulafu wasyo ne khandi aben’engo be’syalo syoosi bacha okhuleta ebyo’wuyinda byawe musyo. ²⁵ Awuma oludaalo atta lulala ebiriwa lubirikalwa, khuba aliwumawo esiro eyo. ²⁶ Oluyaali no’khukiniya khw’ebyalo biriretewa musyo. ²⁷ Yiwuma esiitu syoosi esitasi syolerefu esirisingiramo, atta wusa no’mutu yeesi okhola eby’ensoni oba eby’owubacha, okhutusakho abo boŋŋone ameeta kaawe akawandiikiwa mu sitawo syomwaana wekoondi esyo’wulamu.