¹ Olwo khandi malayika kanjekesa omwalo kwa maachi k’owulamu, amalafu nge’moni ya chumbi, nikakherengeta okhutula mu sisaala sya Weere ne’sya khakondi. ² Nikekhirira akati wengira ekhongo ey’esiko sikhuluutu. Khu nawuli luwande lwo’mwaalo waliyo omusaala kwo’wulamu, nikwiwula ebirime, ekhumi nabibiri eby’ebyamo, nibiwula ebyamo byakwo wuli mwesi. Namasafu k’omusaala nga kokhuwoniya ebyalo. ³ Aliwumawo lundi esikholimo. Esisaala sy’owutuki sya Weere ne syo'mwaana wekoondi biriba mu siko, nende abakhosi baawe balimukholera. ⁴ Baliwona oweeni waye, khandi erita lyaye liriba khu weeni wawe. ⁵ Aliwumayo khandi esiro. Aliwumawo lundi owetaafu we’tara oba owulafu w’eryuba, khuba Omwami Weere alibawa owulafu. Manu khandi nje abacha okhufuka endaalo nendaalo. ⁶ Malayika kamboola atti, “Chino mbosi cha masima khandi ntufu. Omwami, Weere w’emyoyo cha ba nabbi, katuma malayika waye okhwekesa abakhosi baye ebitu ebitekwa okhubawo mu bikha bitaasi bya aleyi.” Yesu keecha ⁷ “Wulirisa, ese ndi okhwicha mu wangu wene! Ali ne’nkhabi oyo odiira emboosi cho’wunabbi owe’sitawo sino.” ⁸ Ese, Yokaana, nise mulala owawulira khandi nawona ebiitu bino. Khandi ni nali nimbuliiye no’khubiwona, nakwa asi namwinamira mu makulu ka malayika owali nabekesa eyiri ese. ⁹ Ne kamboola atti, “Otasikhola! Ese ndi mukhosi wasyenywe nende abasyenywe ba nabbi naabo boosi abalinda emboosi ech’esitawo sino. Yinamira, Weere!” ¹⁰ Olwo kambolera atti, “Otawikha khu mboosi ch’owunabbi we sitawo sino, khu lwokhuba ebikha byolire. ¹¹ Lekha oyo okhola esibi ache mu moni no’khukhola esibi; khandi oyo omubi yesi akhoyire abe mubi; mulekhe oyo okhola wulayi ache wusa mu moni no’khukhola wulayi; khandi mulekhe oyo omwolerefu achanakane okhuba omwolerefu.” ¹² “Wulirisa, ndi okhwicha mu wangu weene! Esirawo syange siri nange, ne khandi ndiwa wuli mulala okhwema khu byaliba nakholire. ¹³ Nise Alpha nende Omega, Owamberi khandi Okhenerekha, Ochaka khandi Osembayo. ¹⁴ “Bali ne’nkhabi abo aboosa ensibiro chawe, kho banyale okhuba no’wunyala khumusaala kwo’wulamu khandi kho babe nga babita mu biriwa okhwiingira mu siko. ¹⁵ Erwanyi yiriyo embwa, abo abakhola ebyo’wulakusi, ebyo’wudaamba, abeeti, abenamira ebilongalonge nende nawuli mutu odakha khandi okhwoseresa ebyo’wubacha. ¹⁶ “Ese, Yesu, ntumire malayika wange okhubawa owujjulisi wuno eyiri amakanisa. Nise omusi khandi omwichukhulu wa Dawudi, khandi eηiniηini yadukha lukali echulichuli.” ¹⁷ Omwoyo no’mweya bawola baati, “Yicha!” lekha oyo owulira awole atti, “Yicha!” Omutu yeesi oli nduwo, mulekhe keche; khandi oyo yeesi odakha, mulekhe awukule esiyaanwa syawerere esya’maachi ko’wulamu. ¹⁸ Ndawula wuli muutu owulira emboosi cho’wu nabbi echesitawo sino: niwabawo omutu yeesi omeedakho khu mboosi esiitu syoosi khwebyo, Weere alimumeedakho olumbe olwalomwalomwakho mu sitawo sino. ¹⁹ Ni khandi ni aba omutu yeesi otusakho emboosi mu sitawo sino esyo’wunabbi, Weere alimutusakho omukawo kwaye khu musaala kwo’wulamu khandi no’mu siko syolerefu, ebyalomwalomwakho mu sitawo sino. ²⁰ Oyo yeesi owa owujjulisi we bitu bino awoola atti, “Yee, ndi khwicha wangu wene.” Amiina, yicha/ Omwami Yesu. ²¹ Abaatu Essisa sy’omwami Yesu sibe na’baatu ba Weere. Amiina.