¹ Khandi nawulira ekono elyamukulu okhutula mu nyumba ya Weere nirowoola ba malayika musaanfu liiti, “Muche, muchukhe amabbakuli musaanfu ake’tima lya Weere khu syalo.” ² Malayika osokha kacha kachukha ebbakuli yaye khu lukerekha, amakonjo kachuna lukali kadiira abaatu abali nakhawonero kho kusolo nga benamira esifwanani syakwo. ³ Malayika wo’khubiri kachukha ebbakuli yaye khu kuyanja, yakalukhana mabaanga nga’komusaacha mufu, nawuli silamu syali mu kuyanja syafwa. ⁴ Malayika wo’khudatu kachukha ebbakuli yaye khu myalo n’omunsulo cha’maachi, kafukha mabaanga. ⁵ Awo nawulira malayika olabirira amaachi nawoola ati: “Muli wusa mu khukhengerwa chino misaango, enywe abali nende aballi, abo abolerefu, khulwokhuba mukhengire mutyo; ⁶ khuba bedisa amabaanga kabolerefu bawo nende ba nabbi , khandi enywe mwabawa amabaanga okhunywa nga lubakhoyera.” ⁷ Khandi nawulira khu olutaari niyikowolamo yiiti: “Yee, Omwami Weere owamaani amasima no’khwakaniya, nje enkhenga yawo.” ⁸ Malayika wo’khune kachukha ebbakuli yaye khu lyuba, ne’ryuba lyawewa amaani okhusamba abaatu no’muliro. ⁹ Basambiwa no’woki wo’wubafu khandi bawaaba eriita lya Weere, owali no’wunyala khu lumbe luno, ne bakaana okhweyolobya no’khumufumiya. ¹⁰ Malayika wo’khutaanu kachukha ebbakuli yaye khu sisala syo’wutuki syo’kusolo, no’wenengo wo’kusolo wakwa musireema. Abaatu bekukuna enimi chawe mu wuchuuni ¹¹ khandi bawaaba Weere wo mukulu khu lwa’machuuni kawe namakoonjo, ne bakaana okhweyolobya khu ebyo bibali nibakholire. ¹² Malayika wo’mukaaga kachukha ebbakuli yaye khu mwaalo mukhongo Yufureeti, khandi amaachi kakwo kecha komerera okhutekekha engira Ya’bene’ngo batulira ewutula lyuba. ¹³ Olwo nawona emisambwa chidatu echali chifwana namakhere; chatula mu munwa kw’okuyokha, omunwa kw’okusolo, no’mu munwa kwo’mu nabbi mubacha. ¹⁴ Chali emyoyo che’misambwa echikhola owuwonero wa mayiya, nichitula erwanyi okhucha mu benengo be’syalo syoosi okhubawuusa alala mukhulwana eye khu ludaalo lukhuluutu olwa Weere wo wunyala woosi. ¹⁵ “Mwekhalirise, nicha ngo’mwibi! Ali ne’nkhabi oyo osikala namoka khandi nga asikala ne’nguwo chaye, akhaye khusikala sichula nikanulukhire munsoni.” ¹⁶ Khandi bawuusa Abene’ngo alala mu sifwo silangiwa mu lwe’bbulaniya baati Arumagedoni. ¹⁷ Malayika wo’musaanfu kachukha ebbakuli yaye mu’bbanga, khandi mu nyumba ya Weere mwatulamo ekono khongo okhutula khu sisala sy’owutuki, niriwoola liiti, “Siweye!” ¹⁸ Awo echawo okhumyesukha khwo’wulafu, okhududuma, no’khumyesukha khwenkhubba khandi nende embukuma yitisya ey’esyalo ey’amaani. Ali awumakhowo embukuma yitisya okhutula abaatu babe khu syalo, okhutengerekha khwali okhwa’maani akabitiriye. ¹⁹ Esiko sikhuluutu sya’kawukhanamo ebitundu bidatu, n’ebiko by’ebyalo byawungulukha. Weere kakhewulira Bbabbilooni eya’maani khandi kayiwa esikombe esichuuye amalwa mululu ne’tima lyaye. ²⁰ Wuli sisinga syerukhayo n’engulu wakhaya okhuchakanawo. ²¹ Okhutula khukulu amakina kenfula masito akeratiri emya wuli litula kakwa khu baatu. Khandi bawaaba Weere okhwema khu lumbe olw’amakina kenfula, khu lwokhuba olumbe olwo lwali lw’amakana.