¹ Mulala khu ba malayika musaanfu owali ne’bbakuli musaanfu kecha kambola atti, “Yicha, nja okhukhwekesa esiwonereso sya’malaya owa’maani, owikhala khu maachi mangi. ² Nende abene’ngo bo khu syalo abakhola owudaamba khandi abatu bosi abo’khu syalo bameera amalwa ko’wudaamba waye.” ³ Khandi malayika kanginga kambira mu mwoyo khu sibbarara. Eyo nawonayo omukhasi owikhaye khu sisolo sifwana mabaanga esyalikho ameeta kafwotokheresa nga ali ne’mitwe musaanfu ne’njika ekhumi. ⁴ Omukhasi kali kambaaye enguwo cho’mudowa kwa rabboki khandi nga mabaanga, khandi nga ffesa yimekhamekhana , namakina kebbeyi ako’wuyiinda. Kali adiiye esikombe sy’efeesa mu mukhono kwaye, nikwichuye ebiitu by’owuwemu ne’byowukhwe, nga bitula mu wudaamba waye. ⁵ Esiwandiiko sino syawandiikiwa mu weeni waye ni sisoma siiti: EBYEKISA BBABBILOONI SIKHULUTU MAMA WA BAMALAYA KHANDI NO’WUWEMU WE’SYAALO. ⁶ Nawona nti omukhasi kali nanyweye nameeye amabaanga ka bolerefu, amabanga kabo abali no’wujulisi khu Yesu. Ni namuwona, nesindukha lukali lwene. ⁷ Awo malayika kamboola atti, “Lwasina wesindukha? Nicha okhukhwekesa esyama esyakisiwa esyo’mukhasi nende okusolo kukekhayekho okulikho emitwe musaanfu ne’njika ekhumi. ⁸ Okusolo, kuwawona kwaliwo, wunanu kuwumawo, khandi kulitula muliina litakama ni kumala kucha mu khusikhirisiwa khwakwo. Manu abaatu bamenya khu syalo abali na’metta akatawandiikiwa mu sitawo esyo’wulamu okhutula esyalo sichake balyesindukha lukali nibaliwona okusolo, khulwokhuba olwamberi kwaliwo, ni wunanu sikuliwo, ne khandi kuliicha. ⁹ Sino sidakha owongo namakesi. Emitwe musaanfu nje engulu musanfu omukhasi khukekhala. ¹⁰ Yiriyo abene’ngo bosi musaanfu. Bataanu bakwiiye, mulala aliwo, owundi asiri okhwicha; ne namala kecha atekwa okhubawo esikha sitono. ¹¹ No’kusolo okwaliwo olwamberi, ne wunanu sikuliwo, nje omwen’engo wo munana. Ali mulala khu musaanfu khandi yesi alinda okhusikhirisiwa khwaye. ¹² Enjika ekhumi chiwawoona nje abene’ngo ekhumi abatafuna owene’ngo, naye khulwe’mbaka ye’saawa ndala abalifuna owunyala wo’wutuki nga bene’ngo alala no’kusolo. ¹³ Bali ne’sigendererwa sirala khandi baliyeresewa amaani kawe no’wunyala wawe okusolo. ¹⁴ Bacha okhukhola eye nibalwanisa Akhakondi, naye Akhakoondi khalibayingira khulwokhuba nje Omwami wa baami khandi Omwene’ngo wa bene’ngo__ khandi ni naye balibawo abaaye balange, abadoole khandi abafukirisi besikwa. ¹⁵ Khandi malayika kamboola atti, “Amaachi kawawona, Malaya yikekhala, nje abaatu, ebidiikha, ebyalo ne’nimi. ¹⁶ Okusolo nenjika ekhumi biwawona birisyuula Malaya. Birimwosa khu khusikhirira byamulekha machula; birirya omubiri kwaye khandi byamusamba no’muliro. ¹⁷ Khuba Weere abiteeye mu myoyo chawe okhwoseresa esigendererwa syaye olwokhufukirira okhuwa okusolo owunyala okhufuka, okhwosa emboosi cha Weere lu chilyolerera. ¹⁸ Omukhasi yiwawona nje esiko sikhongo esifuka amukulu wa benengo bo’khu syaalo.