¹ Khandi newunja, ne mumoni change aliwo omwaana wekoondi, nikemire khu lugulu lwa Sayuni, ne alala naye aliwo 144,000, abali neriita lyaye ne’rita lya simwana niryawandikiwa khu weeni wawe. ² Khandi nawulira okhuwuuma okhutulira mukulu nikhuworoota nga okhuworoota khwa’maachi kerukha lukali khandi nga okhwadulukha khwenkhubba. Okhuwuuma khuno khunawulira khwali nga abakhubbi bamalere nibakhubba amalere kawe. ³ Khandi bemba olwembo luyakha nga bembera esisala syo’wutuki khandi nga bembera ne bilonge biramu bine na bakhuluutu. Awumawo omutu yeesi owanyala okhweka olwembo okhutusakho bano 144,000 abali nibawonesewe okhutula khu syalo. ⁴ Bano nje abo abali nibatanyasikha olwo khwekhubbaniya nabakhasi, khuba berinda ni bali endikho. Balonda omwaana wekoondi wuli yikachanga. Bakuliwa okhutula mu basaacha khandi baweresewayo nga ebyamo bisokha eyiri Weere nende omwaana wekoondi. ⁵ Mu minwa chawe mwawumamo owubacha; bawumakho esyo’khubolobya. 1. Ba Malayika Badatu ⁶ Manu nawona malayika wundi nabburukha akati mu mbewo, ne kali nenjiri yitawawo eyo’khuwuulira eyiri abo abamenya khu syalo__ eyiri wuli syalo, khu ebikha, enimi nabaatu. ⁷ Kawoola mu kono khongo, ati, “Tya Weere khandi muwe oluyaali, khulwokhuba esaawa yo’khukhengerwa emisango yolire. Mwinamire oyo owakhola ekulu, esyalo, okuyanja ne’nsulo cha’maachi.” ⁸ Malayika wo’khubiri kalondakho khandi kawoola ati, “Yikwiye! Yikwiye nje Bbabbulooni Ngali, eyakhola ebyalo byoosi okhunywa omwenge okukwisakho elalu olw’owudaamba wasyo.” ⁹ Malayika wo’khudatu kabalondakho kabawola mukono khongo ati: “Ni abawo omutu yeesi owinamira okusolo n’esifanani syakwo khandi kamala kafuna akhawonero khu weeni oba khu mukhono, ¹⁰ ye, yesi, alinywa khu malwa aketima lya Weere, akachukhiwa mu maani matufu mu sikombe syetima lyaye. Alisandisiwa no’muliro kwadukha mu moni chaba malayika bolerefu nende omwaana wekoondi. ¹¹ N’omwosi kutula khunsando yawe kuliniina endaalo ne’ndaalo. Awuma okhuwumula esiro nesideete eyiri abo abenamira okusolo nesifananyi syakwo, oba eyiri omutu yeesi ofuna akhawonero khe’rita lyakwo.” ¹² Sino sidakha okhuba abagumu okhwesimirisa khu luwande lwa’bolerefu abawulira ebiragiro bya Weere manu basikala mu nfukiirira eyiri Yesu. ¹³ Khandi nawulira ekono okhutula mukulu niriwoola liiti, “Wandiika oti: Baweresewa enkhabi abafu abafwira mu mwami okhutula wunanu no’khuchanakana.” “Eee, Nje awoola omwoyo, “Baliwulukha mu mirimo chawe, khu lwokhuba ebikholwa byawe biribalondakho.” Okhukesa Khwe Syalo ¹⁴ Newunja, khandi assi wange aliwo esireesi sirafu, ne khusireesi khwali khwikhayekho omutu owali nga “omwana wo’mutu” nali nengule ye ssabbu khu mutwe kwaye ne’ngeso njoki mu mukhono kwaye. ¹⁵ Khandi malayika wundi katula mu nyumba ya Weere kalanga mu kono khongo oyo owali nikekhaye khu sireesi ati, “Wukula engeso yawo okese, khulwokhuba ebikha byo’khukesa byolire, ebyo’khukesa khwe’syalo bilabire.” ¹⁶ Sakira oyo owali kekhaye khu sireesi kawuuba engeso yaye amukulu we’syalo ne’syalo sya’kesewa. ¹⁷ Malayika wundi kecha katula mu nyumba ya Weere mukulu, khandi yesi kali ne’ngeso enjoki. ¹⁸ Lundi malayika wundi, nga nje olinda omuliro, katula khu alutari kalanga mu kono khongo oyo owali ne’ngeso enjoki ati, “Wukula engeso yawo enjoki owuse ebiwaku bye’misabbibbu che’syalo, khuba emisabbibbu chakwo chilabire.” ¹⁹ Malayika kawuuba engeso yaye enjoki khu syalo, kawuusa emisabbibbu chasyo kachisukuna mu sikhunyiro sya’maani esyetima lya Weere. ²⁰ Chasenakirwa mu sikhunyiro erwanyi wesiko, na’mabaanga kasulula nikatula mu sikhunyiro, nikanina nga ebikhandakiro by’ensukhiri olukendo oba owubambali efuti 1600 okhunina amukulu.