¹ Khandi okuyokha kwema khu ntulo wo’kuyanja. Okusolo Erwanyi wo’kuyanja. Khandi nawona okusolo nikwicha nikutula mu kuyanja. Kwali nenjika ekhumi ne’mitwe musaanfu, ne’ngule ekhumi khu njika chakwo, ne khunawuli mutwe khwalikho eriita lyo’khufotokheresa. ² Okusolo kunawona kwali kufwana ne’ngwe, ne kwali namakulu kafana nakenani no’munwa nga okweddalaηi. Okuyokha kwaweresa okusolo owunyala wakwo nesisaala syo’wutuki no’wunyala wubitirifu. ³ Mulala khu mitwe cho’kusolo kwali ngo'kulikho ekonjo lya nawakhwaku, ne ekonjo lya nawakhwaku lyali kawona. Esyalo syosi syoosi syecha syawuka khandi syalonda okusolo. ⁴ Abaatu benamira okuyokha khu lwokhuba kwali kuweye okusolo owunyala, khandi bosi benamira okusolo khandi bateeba baati, “Nanu oli nga okusolo? Nanu onyala kakulwanisa mu’ye?” ⁵ Okusolo kwaweresewa omunwa okhufucha emboosi cho khwepaakha necho’khufwotokheresa khandi no’khukhosesa owunyala wakwo okhumala embaka ye’myeesi kane nachibiri. ⁶ Kwasama omunwa kwakwo okhufwotokheresa Weere, nesifwo sikamenyamo abamenya mukulu. ⁷ Kwayeresewa amaani okhukhola eye nga kulwanisa abolerefu no’khubawangula. Khandi kwayeresewa owunyala khu wuli gwanga, baatu, enimi, nende nawuli syalo. ⁸ Wuli mu menyi w’okhu syalo alinamira okusolo__ abo boosi abatali na meta kawe nikatawandikiwa mu sitawo syo’wulamu esyo'mwaana wekoondi owetewa okhutula mu khulongewa khwe’syalo. 9 Oyo oli no’khutwi, awulire. ¹⁰ Nisiba mbo omutu akhoyire ayiriwe mu wuwaambe, mu wuwambe aliyiriwa. Ni abawo mbo wo’khwitiwa n’okukhande, no’kukhande alitiwa. Sino siba sidakha okhuba akhwekhalirikha, okhwesimirisa ne’ nfukirira khuluwande lwabolerefu. Okusolo kutula mu Loba ¹¹ Awo khandi nawona okusolo kundi, nikutula mu loba. Kwali ne njika chibiri ngomwaana wekoondi, ne nga alomaloma ngo okuyokha. ¹² Kwekesa owunyala woosi nga owo’okusolo kwasokha mu sifwo syakula, khandi kwayinga esyalo nabasimenyakho okhwinamira okusolo kwasokha, okwene konjo lya nawakhwaku elyali ni lyawona. ¹³ Khandi kwakhola owuwonero wuwukya lukali, khandi nga kukhola omuliro nikukwa khu syalo okhutula mukulu abaatu boosi nibakuwona mu wichufu. ¹⁴ Khulwo wuwonero kwaweresewa amaani okhukhola mu sifwo syo’kusolo kwasokha, kabachirisa abamenyi bo khu syalo. Kabalagira okhutekekhawo esifananyi syo’luyaali lwo’kusolo nikwatewakho embala no’kukhande naye nga kusiiri kulamu. ¹⁵ Kwaweresewa amaani okhuwa omuuya kwo’wulamu eyiri esifananyi esyo’kusolo kwasokha, kho kunyale okhulomaloma no’khukhola boosi abakhaya okhwinamira esifananyi okhwitiwa. ¹⁶ Okhumeeda khwisyo kwayinga wuli mulala, omutono no’mukali, omuyiinda no’muwati, omulekhule no’muwaambe, okhufuna akhawonero khu mukhono mulungi oba mu weeni, ¹⁷ kho sibe mbo awumawo yeesi onyala okhukula oba okhukusa okhutusakho nga alikho akhawonero, nga nje eriita lyo’kusolo oba nj’enamba ye’riita lyakwo. ¹⁸ . Bino bidakha amakesi. Ni aliwo omutu yeesi owamakesi, akesekho abale enamba echo’kusolo, khulwokhuba enamba chakwo cho’mutu. Enamba chakwo chiri 666.