¹ . “Baana befwe nende ba Bbabba, mutekerese khu khwewosakho khwange.” ² . Nibawulira nalomaloma mu lulimi lwe’Bbulaniya, boosi bawulera chi. Awo Paulo kawoola ati: ³ “Ndi mu Yudaaya, owewulwa mu Ttaaluso esyo mu Kirukiya nakhulira musiko sinno. Asi wa Gamalyeri, owasomesewa wulayi mu malako kaba kuka yefwe, naye nali omulwani wa Weere nga mwesi lumuli lero. ⁴ . Nasandyanga abalondi be ngira yinno nimbosa khukhufwa’ nadiiranga abasaacha nabakhasi nimbasukuna mu ma jjera, ⁵ nga bosi omulamusi mukhulutu nenkhikho chaliwo chinyala okhujjulira. Ni khandi nafunaanga ebaruwa nichibatulamo nichichira bamwanaηηina mu Damasiko, khandi nachanga okhubenda nga bawowe nimbayira e Yerusalemu okhuwoneresewa mu jeera. ⁶ “Ambi we’ssawa mukaga chesidete nga lunali nolerera Damasiko, wangu wene owulafu wamaani okhutula mukulu wambonekhera wanewodokhaniya. ⁷ . Nakwa assi, nawulira ekkono nirimboola liiti, ‘Saulo! Saulo! Lwasi wumboniyawoniya?’ ⁸ . Nateeba nti, “’Niwe nanu, Omwami?’ “’Nise Yesu owe’Nazalesi, yoli okhusandiya,’ kakowoolamo. ⁹ Abali bamberekesa bawona owulaffu, ne sibategeera ekono lyoyo owali nalomaloma nange. ¹⁰ . Namuteeba nti, “’Nkhole si, Omwami?’ Omwami kakowolamo ati, “’Singira weme,’ oche mu Damasiko. Eyo banakhuwolere byoosi byolagiywe okhukhola.’ ¹¹ . Abali bamberekesa bantangisamo nibandiye khu’mukhono banjosa e Damasiko, olwokhuba owulafu nga luwali owubitirira wanjofusa emmoni. ¹² . “Omusaacha yibalanganga Ananiya kecha okhumbona. Kali omusaacha odakha lukali Weere khandi nga alonda amalako khandi nga atewamo oluyaali lungi nende aba Bayudaaya abali bamenya eyo. ¹³ . Kema khuntulo anali kawoola ati, ‘Mwaana wefwe Saulo, limbula!’ Awenawo nanyala okhumuwona. ¹⁴ “Manu kawoola ati: “Weere wa ba’Bbabba akhudooye ewe okhumanya esilaamo syaye nokhuwona amakira kaye makololofu nokhuwulira emboosi chitula mumunwa kwaye. ¹⁵ . Wicha okhuwa omujjulisi eyiri abatu khu byowene nende byowuliye. ¹⁶ . Ni wunanu sina syolindire? Singira weme, bakhubatise khandi weyoke ebibi bikhuwekho,” no’langa erita lyaye. ¹⁷ “Ninakowolayo eYerusalemu ninali ninsaba mu nyumba ya Weere, nali ngo’lota ¹⁸ ne nawoona omwami nalomaloma ati, ‘Mangu! Tuula e Yerusalemu khangu khangu, khulwokhuba sibacha okhufukiirira owujjulisi wawo khwise.’ ¹⁹ Namukowoolamo nti, “Omwami, banno basaacha bamanyire baati natula mu khunηηano linno nacha mu lira okhuwowa khandi nokhukhubba abo abakhufukiriramo. ²⁰ . Na’mabanga koyo awakhufwirira Sitefano keddikha, nemawo ninkhakhasa nininda enguwo chabo abali nibamwitta.’ ²¹ . Awenawo Weere kambola ati, ‘Cha: Nicha okhukhutuma ale eyiri abateende.’” Paulo Omwiwulanwa we’Rooma. ²² . Okubbubbu kwa batu kwatekeresa Paulo kola kalomaloma bino. Wunanu khubasingisa amakono kawe nibakhumula baati, ‘Mumumale khu syaalo sinno omutu ofwana ati! Syakhoyera khudooηηa nimulamu!” ²³ . Nga lubali nibakhumula khandi nga basukuna enguwo chawe no’khuwanya olufu amukulu, ²⁴ . omukhongo weeye kalagira Paulo okhuyiriwa mu bbarakisi. Kabalagira bamukhubbe khandi bamuteebe lwasi abatu bali bamukhumusa baatyo. ²⁵ Nibali nibamukoniya khubamukhubbe, Paulo kateeba mulala khu’bakhulutu bamaaye ati, “Siri mu malako enywe okhukhubba omwiwulanwa we’Rooma otakhengerwa musango?” ²⁶ . Omukhulutu wabasirikale emya nikawulira sinno, kacha eyiri omudumisi kamulopayo ati, “Ocha okhukholawo si?” “Ono musaacha mu Rooma.” ²⁷ Omukhongo weeye kacha eyiri Paulo khandi kamuteeba ati, “Mbolere oli mu Rooma?” Paulo kakowoolamo ati, “Yee nje lusiri.” ²⁸ . Omukhongo weeye kamukowolamo ati, “Nasasula erubia nyingi khulwokhuba mwiwulanwa we’Rooma.” Paulo kakowolamo ati, “Ese ndi lwiwulwo lwe’Rooma.” ²⁹ . Abo abali nibadakha okhumuteeba bakowolerayo wangu wene. Omukhongo weeye mwene kesindukha nikola okhusimanya ati kali ateeye Paulo, omu’Rooma khu njegere. Mu Lukhikho. ³⁰ Naye khu ludaalo lwalondakho, khulwokhuba omukhongo weeye kali adakha amanye esyene lwasi Paulo awabirwa na Bayudaya, kamulekhula kalagira bakhawona bakhulutu na bakhengi be’misango okhwewuusa. Naleta Paulo khandi amwemekha akati wawe.