¹ 1. Paulo kecha kakhadasa abakhongo bolukhikho emoni kawoola ati, “Baana befwe, noseresise omulimo kwange eyiri Weere mu khutegeera khwange khulayi okhwola olwaleero.” ² . Khu sinno omulamusi mukhulutu Ananiya kalagira abali bemire ambi nende Paulo okhumupaama omunwa. ³ . Awo Paulo kamuwoola ati, “Weere alikhukhubba, ewe esidda sibabakha erangi erafu! Wikhala awo okhunkhengera, ngo’bitira mulako, khandi omwene wesi okhalaka amalako no’laggira oti nkhubwe!” ⁴ Abo abali nibemire ambi nende Paulo bawoola bati, “Okenda otye wanyeka omusabisa wa Weere mukhulutu?” ⁵ . Paulo kabakowolamo ati, “Baana befwe, simbeye nintegeye nti nje omusabisa mukhulutu; ne syawandikiiwa siiti: ‘Otalomalomanga sibi khu mutuki wa batu bawo.’” ⁶ Naye Paulo, namanyire ati abandi khubo bali ba’Sadukayo na’bandi bali ba’Falisaayo, nga balange mu lukhikho kawoola ati, “Baana befwe, ndi Mufalisaayo, omusyani wo’mu’Falisaayo. Nemire mu khuwosesewa olwokhuba nfukirira mu khusyukhira khwa bafu.” ⁷ . Nikawoola sinno, okhuyiingana khwakwawo akati wa Falisaayo na Basadukaayo, nolukhikho lwakawukhanamo. ⁸ . (Abasadukaayo bawoola baati awuma okhusyukhira, khandi awuma ba’Malayika oba Emyoyo, naye Abafaalisaayo bafukirira byoosi.) ⁹ Abawo okhukudana okhukhongo, khandi nabasomesa bandi abamalako obolulyo lwa Bafalisaayo boosi basingira bayingana namaani baati, “Yiwuma situ sibi syoosi sikhuwona khu musaacha ono.” “Nisiba mbo omwoyo oba malayika amulomalomeyemo?” ¹⁰ . Okhuyingana no’khukudana khwemeeda lukali syoola omukhulutu weeye katya ati Paulo banyala bamutandulamo otutundu tundu. Kalagira abasirikale bekhe assi bamutuse khubatu namaani khandi bamuyire mubarakisi. ¹¹ . Esiro sirondakho Omwami kema ambi nende Paulo kawoola ati, “Wekuumye! Nga lwoweeye owujjulisi khwise mu Yerusalemu, sakira otekwa osikhole otyo nende e Rooma.” Olukhwe Lwo Khwiita Paulo ¹² Echuli yilondakho Abayudaaya bekhoba khandi bekholamo esitole nga belayira okhutalya oba okhutaηηwa okhwola nga bettire Paulo. ¹³ . Abatu abakhira amakhumi kane nje abali mulukhwe lunno. ¹⁴ Bacha eyiri omukhulutu wa bakhawona nende eyiri abakhuluu bawoola baati, “Khumalire okhwelayira owutalya situ syosi syoosi okhumalakho nga khwittire Paulo. ¹⁵ . Wunanu olwo, ewe nakhakhiikho nimusaba omukhulutu wa basirikale okhumukowosa mumoni chenywe nga simuchiririra nje okhukonyeresa owujjulisi wamawulire matufu khuye. Efwe khuli betekefu okhumwitta natola anno.” ¹⁶ Naye omwana musoliri w’omukhana wawe Paulo nikawulira ebyo’lukhwe, kacha mubarakisi kawoolera Paulo. ¹⁷ . Paulo awenawo kalanga mulala khubakhongo kamuwoolera ati, “Yira omusoliri muwere ono eyiri omukhongo weeye omuwolere oti, ‘ali nende syadakha okhumwekesa.” ¹⁸ Kamuyiira eyiri omokhongo weeye. Omukhongo weeye lye’mya kamuwoola ati, “Paulo, omuwoye, kantumiye omusoliri kamala kansaba ndete omusoliri ono yoli, olwokhuba ali nende syadakha okhukhwekesa.” ¹⁹ . Omukhongo weeye kadira omusoliri khumukhono, kamukowosa mulubafu kamuteba ati, “Siina syodakha okhumboolera?” ²⁰ Kamukowoolamo ati: “Abayudaaya bafukirisanisye okhwicha bakhusabe Paulo aletewe mu lukhikho muchuli nga bekadiya baati badakha amawulire akamudirikho akakhira ako kawawulira. ²¹ . Otafukirira ebyawe, olwokhuba abatu abakhira amakhumi kane bamukonereye khungira munyaasi. Bamalire okhulayira owutaliya oba okhunywa okhwola nga bamwittire. Betekefu wunanu, balindire owunyala wawo okhufukirira okhusaba khwawe.” ²² Omukhongo weeye kasewula omusyani khandi kamulawula ati, “Otawoolerakho omutu yeesi oti wichire wambolera binno.” Paulo Achusiwa Okhucha E’kayisaria ²³ . Manu kamala nalanga abasirikale babiri nabalagira ati, muwukule omukanda kwa basirikale emya chibiri, nsafu nga bo’khufarasi nende abandi emya chibiri abali namafumo bache a Kayisaria mu ssawa chidatu esiro syolwo. ²⁴ . Mutekekhere Paulo ensukhiri chanachirekho ewa Gafana Felikisi mumirembe awatali sibi okhumwolakho. ²⁵ Kawandiika ebaruwa eyisoma yiiti; ²⁶ . Kilaudyasi Lisia, Eyiri owo luyaali lukhongo, Gafana Felikisi Nkhukhesakho. ²⁷ . Omusaacha ono kadiiriwa na Bayudaaya khandi bali ambi okhumwiita, ne necha nabasirikale bange namuwoniya, necha nasimanya nti mwiwulanwa wa Rooma. ²⁸ Nadakha nsimanye sibamufunana, sakira namuleta mu lukhikho lwawe. ²⁹ . Necha nasimanya mbo sibamufunana syali sidirana na’malako kawe; ne kali awuma omusaango kwosi kwafunaniwa bamukhengera okwo’khufwa oba okhuwoyewa. ³⁰ . Ninekesewa olukhwe lubali batekekhire khu musaacha ono, namusindikha yooli muwangu. Nongera okhulagira abamufunana bekese ensonga chawe yooli. ³¹ Manu abasirikale, nga’boseresa ebilagiro, bayira Paulo musiro khandi bamwosera erala mu Antipatuli. ³² . Niwakhya balekha abakhubi bensukhiri bayerekesa Paulo nabo bakowola ewawe mu bbarakisi. ³³ . Abayerekesi niboola e Kayisaliya, baweresayo ebaruwa eyiri Gafana bawayo nende Paulo. ³⁴ . Gafana kasoma ebaruwa kateeba esitundu sye’syaalo sikali atulamo. Nikamanya ati atula mu Silisiya, ³⁵ kawoola ati, “Nicha okhuwulira omusango kwawo abakhufunana nibolire ano.” Awo nalagira ati Paulo alindiwe nabasirikale mudookho lya Kerode.