Okhubitira Mu Makedoni Nende Wuyonaani ¹ . Okukhero nikwawa, Paulo katumisa abeeki khandi, nikamala okhubakumya, kabasiiwula kawawo kacha e Makedoni. ² . Kakeenda nabita mu situndu esyo, nalomaloma emboosi nyingi echikumya eyiri abatu, kho khale khale koola mu wuYonaani, ³ yikamenya emyeesi chidatu. Olwokhuba Abayudaaya bamukholera olukhwe nga nikali nali ambi akhwambukha okhucha e Busuli, kakhengawo okhukowolayo nabitira e Makedoni. ⁴ Kacha nende Sopateri omusyani wa Paulo okhutula e Bereya, Alisutaluko nende Sekundo okhutula e Ssesaloniika, Gayasi okhutula e Derube, Timoseewo yesi, nende Turofwiimu okhutula mu situundu sya Asiya. ⁵ . Abasaacha bano bacha emutwe batulindira e Tulowa. ⁶ . Naye khwecha khwambukha okhutula e Filipi olunyuma lwe’mbaga ye migaati echitaasi mibbakhe, ne endaalo chitaanu nichibitirewo khweyimbaniya khu bandi mu Tulowa yikhwamala endaalo musanfu. Yutuko Asyukhisiwa Mu Bafu Etorowa ⁷ Khu ludaalo olwamberi mu Ssabbiiti khwecha alala okhukhalaka emigaati. Paulo kalomalomera abatu ne, olwokhuba kadakha awewo oludaalo oluloondakho, kachanakana nende okhulomaloma okhwolera erala musiro akati. ⁸ . Yaliyo amataara mangi kene amukulu mu biseenge bye goroofwa yikhwawukananira. ⁹ Mu dinisa mwalimo omusyaani omusiimbukha olaangiwa Yutuko, owali nakunukha endoolo lukali nga Paulo lukali nachanakana nokhulomaloma. Manu endoolo nichamuyiingira, kakwa assi okhutula khu goroofwa eyokhudatu manu bamutusawo nafwiye. ¹⁰ . Paulo kekha assi, kekhubba khu musyaani omusiimbukha kamuwodookhaniya amakhono kaye. Kawoola ati, “Mutesiindukha, mulamu niye!” ¹¹ . Kamala kaniina khu goroofwa khandi manu kamekula omugaati kaalya. Nikamala okhulomaloma owiire okhwanukha, kawawo. ¹² . Abatu bayira omusyaani omusiimbukha engo nimulamu manu bakwa emyooyo lukali. Okhusewula Khwa Paulo Eyiri Abakhulutu ba Efweso ¹³ Khwacha emutwe eyiri emeeri khwambukha khwacha Aso, yikhwali nikhucha okhubitira Paulo. Kali okholire entekekha yinno olwokhuba kali wokhuchayo namakulu. ¹⁴ . Nikatuwukaana Aso, khwamwiingisa mu meeri khwacha khwoola Emitulene. ¹⁵ Oludaalo olwalondakho khwefuka okhutula eyo manu khwoola khwakobera khu Kiyo. Khandi oludaalo lwalondakho khwambukha khwacha Samo, ne oludaalo oluloondakho khwoola mu Mireeto. ¹⁶ . Paulo kali akhengirewo okhwambukha nabitira mu Efweso kho akhaye okhunyasa ebikha mu syaalo sya Asiya, olwokhuba kali mu wangu okhwoola mu Yerusalemi, nisinyalikha, khu ludaalo olwa Pentekoti. ¹⁷ Okhutula e Mireeto, Paulo katumisa mu Efweso balete abakhuluutu be kanisa. ¹⁸ . Niboola, kabawoola ati: “Enywe mumanyiire erala endaalo choosi chinamenya nanywe, okhutula khuludaalo olwamberi lunoolera mu syaalo sya Asiya. ¹⁹ . Nakholera Omwami nende omwooyo mulonga mulala nende amasika, anakhaba ninakhemewa lukali nende enkhwe echa Bayudaaya. ²⁰ . Mumanyire muuti singanakanangakho okhuwulira esiitu syoosi esiri nowuyeedi yimuli naye nsomesiise lwatu khandi enyumba khu nyumba. ²¹ . Nalangirira eyiri Abayudaaya nende Abayonaani nti batekwa okhukalukhanira Weere mu khweyolobya khandi babe nende enfukiirira mu mwami Yesu. ²² “Ne wunanu, nyiingiwa nende Omwooyo, ndi okhucha e Yerusalemi, nga simanyire esinanekholekho eyo. ²³ . Manyire nti mu wuli siko esikhongo omwooyo omwolerefu kandawula ati ejeera nende okhusandisiwa bintingaye. ²⁴ . Nelubiba biityo, mbona nga owulamu wange sisitu yiindi, nisiba mbo nyala okhumala olukendo namalirisa omulimo Omwami Yesu kukamba__ omulimo okwokhuwa owujulisi owe’njiri ye’sisa sya Weere. ²⁵ . “Wunanu manyire nti yiwuma khwinywe bambitiremo nimbuulira Owene’ngo olimbonakho khandi. ²⁶ . Nolwesyo, nangirira yimuli olwaleero nti mbuma musango khumabanga ka batu boosi. ²⁷ . Olwokhuba singanakanire okhubatumbulira okhudakha khwa Weere khwoosi. ²⁸ Mweriinde enywe abene nebyayo omwooyo Omwolerefu sikabakholamo abakhebesi: Mube baayi abe kanisa ya Weere, yikakula nende amabaanga kaye keene. ²⁹ . Manyire nti ni nakhamala okhutulawo, ebinamiindi ebyalaba byakhabengiremo khandi yiwuma byayo bibirirekhawo. ³⁰ . Ata nende okhutula mwinywe abene abatu balisiingira okhusakuula amasima kho basalaniye abeeki enyuma waawe. ³¹ Manu mwerinde! Mwichulise muuti mu mbaka ye myaaka chidatu sinakamanga okhubalawula sya mulala esiro ne esideete mu masika. ³² . “Wunanu mbawayo eyiri Weere nende eyiri emboosi yaye eye’sisa, eyinyala yabombakha khandi yabawa owusikha mu abo boosi abalabisiwa. ³³ Sinekomba Efweesa oba Esaabu yo’mutu yeesi oba enguwo. ³⁴ . Enywe abene mumanyire muuti amakhono kange kano kamberesiise ebiitu bindakha byoosi alala nende bangenda nabo. ³⁵ . Mubiitu byoosi binakhola, nabekesa nti okhukhola na maani nga khuno khutekwa okhuyeeda abanaffu, nikhwichulisa emboosi Omwaami Yesu omweene chikawoola ati: ‘Okhukaba khwa nkhabi okhukhira okhufuna.’” ³⁶ Nikamala okhulomaloma bino, kasigama assi nabo boosi kekalikhira. ³⁷ . Boosi balira lukali nibamwewoyamo khandi nibamukwa mu sirifu. ³⁸ . Esyabadisya engisa lukali nje sikabawoola ati sibaliwona weni waye khandi. Manu bamala bamuwerekesa bacha naye khu meeri.