Paulo Mu Efweso ¹ . Manu Apolo nikali naali mu Kkoliinso, Paulo kadiira engira kabitira mu kati kati manu koola mu Efweso. Eyo kawukanayo abeeki bandi. ² . Kabateba ati, “Mwafuna Omwooyo mwolerefu nga nimwafukiirira?” Bakowolamo baati, “Bbe, khandi sikhuwuliraangakho khuuti aliwo omwooyo mwolerefu.” ³ Manu Paulo kabateba ati, “Ne wunanu khubatiisiwa siina khumwafuna?” Bakowolamo baati, “Okhubatiisiwa khwa Yokaana.” ⁴ . Paulo kawoola ati, “Okhubatiisiwa khwa Yokaana khwali khubatisiwa okhwokhweyolobya. Kawoolera abatu okhufukiiririra mu oyo owiicha enyuma waye, nje, mu Yesu.” ⁵ Nibawulira sino, becha babatiisiwa okhwingira mu liita lyo’Mwami Yesu. ⁶ . Paulo nikabesakho omukhono, omwoyo mwolerefu kabechakho, bemawo balomaloma mu nimi khandi bawoola ebicha okhubaawo. ⁷ . Bali ambi abasacha ekhumi nende babiri boosi alala. ⁸ Paulo kengira mu Sinagogi kalomalomera eyo namaani okhumala emyesi chidatu nga syatya, nayinganiya khandi nabakhobya ebiddira khu wene’ngo wa Weere. ⁹ . Naye abandi bakhaya; bakhayirira okhufukiirira khandi nga banyasa engira eya Weere alafu. Manu Paulo kabalekha. Kacha nende abeeki katesaanga nabo wuli ludaalo mu nyumba eyo’khwekeraamo mu Tulano. ¹⁰ . Sino syachanakana siityo okhumala emyaka chibiri, manu Abayudaaya boosi nende Abayonaani abamenya mu syaalo esya Asiya baawulira emboosi yo’Mwaami. ¹¹ Weere kakhola ebyamayiya ebitabangawo nga abitira mu Paulo, ¹² khandi nende ebitambaara ne enguwo chaye ebyamwegeηηangakho nibabiyiriranga abalwaye baawe, endwaaye chawe chawonaanga khandi nende emisambwa emibi chabatulaangamo. ¹³ Abayudaaya bandi ababitaanga niberusya emisambwa mibi bakesakho okhukhosesa eriita lyo mwami Yesu okhutula khwabo abaliingi nibalikho emisambwa mibi. Bawolanga baati, “Muliita lya Yesu, Paulo lyawuulira, mbalagira mutule.’’ ¹⁴ . Abasyaani musanfu aba Sekewa omu Yudaaya omukhoongo wabakhawona, bali bakholaanga sino. ¹⁵ Oludaalo lulala omusaambwa mubi kwabakowolamo kuti, “Yesu mumanyire, khandi manyire ebidiira khu Paulo, nanywe niinywe banaanu?” ¹⁶ . Manu omusaacha owalikho omusambwa mubi kabatuumirakho kabakhira boosi amaani. Kabakhubba enkhubba yeene eyabeerusya batula erwaanyi wenyumba sichula khandi nibadaacha. ¹⁷ . Sino nisyecha syamanyikha eyiri Abayudaaya nende Abayonaani abamenya mu Efweso, boosi badiiriwa owuti, khandi eriita lyo’mwami Yesu lyasingisiiwa mu luyaali olwa’mukulu. ¹⁸ Bangi khwabo abafukiirira wunanu becha mulwaatu okhweyolobya ebibi byawe. ¹⁹ . Bangi khwabo abakholaanga ebyeroko baletanga ebittawo byaawe alala nibabisaamba alafu. Nibabala ebbeeyi yabyo, byosi byoosi Efweesa elifu amakhumi kataanu. ²⁰ . Mumbeera yino emboosi yo’mwaami yasasaana lukali khandi yemeedamo amaani. ²¹ Bino byoosi nibiweeye, Paulo kakhengawo okhucha e Yerusalemi, nabitira mu Makedoni nende Akiya. Kawoola ati, “Nimalire okhubaayo,” “ntekwa okhukeniyakho e Rooma yosi.” ²² . Katuma babiri khu bayeedi baye, Timoseewo nende Erasuto, okhucha e Makedoniya, ne omwene kasikala mu syaalo sibalanga Asiya embaka eyiyerakho. ²³ . Ambi mubikha ebyo akwawo okhutawukha olwengira. ²⁴ . Omwitanyi olangiwa Demeteriyo, owakholanga owuyumba wamasawo kefeesa owa Atemi kaleteranga abetaanyi basye erubya echitali ntono. ²⁵ . Kabalanga bosi alala, na’betaanyi bandi bakali nafwananiya nabo emirimo, kabawoola ati; “Basaacha enywe, mumanyire muuti khufuna enyingisa endayi okhutula mu byasara bino. ²⁶ . Khandi muwona khandi muwulira nga omutu ono Paulo nasendaseendire khandi kakosya abatu bangi ano mu Efweso nende esyaalo syoosi esya Asiya. Awoola ati ba weere abakholewa na’batu khaba siba weere ata nawutono. ²⁷ . Esidinyu siriwo siiti enfumwa ye’byasara byefwe siniyo yoηene eyinakwe, naye nende enyumba ya weere omukhoongo Atemi yinemewe oluyaali, nende weere mukhasi omwene, owinamirwa musitundu sya Asiya nende e syaalo syoosi, acha okhunyakiwakho oluyaali lwaye olwo’wene’ngo.” ²⁸ Nibawulira sino, badiriwa ettima lukali bachaaka okhukhumula baati: “Atemi owa Efweso nje omukhoongo okhira!” ²⁹ . Wangu wene esiko esikhoongo syoosi syatawukha. Abatu badiira Gayo nende Alisitaluuko, abakendanga nende Paulo okhutula e Makedoni, bacha nga omutu mulala okhwingira mu nyumba eye misanyo. ³⁰ Paulo kadakha okhuwonekha eyiri esidiikha, naye abeeki sibamukanya. ³¹ . Ata nende abandi khu bakhoongo besituundu, abecha ba Paulo, bamutumira owubakha nibamwekweeda atakesakho okhucha kengira munyumba eye misanyo eyo. ³² . Olukhuηaano lwali mu wutawulirisaniya: Abatu bandi bali bakhumula esitu sirala, ne abandi esiindi. Abatu bakhira owungi sibamanya ata lwasiina bali eyo. ³³ Abayudaaya basiindikha Alekezanda emutwe, khandi abandi mu sidiikha bakhubba okukhero okwebiragiro yali. Kabawola bawuleere kho kewosekho eyiri abatu. ³⁴ . Naye becha bamanya baati kali Omuyudaaya, boosi bakhubbira alala okukhero okhumala ambi esawa chibiri baati: “Atemi owa ba Efweso nje omukhongo lukali!” ³⁵ Omukaraani owe siko esikhongo kawuleesa esidiikha nawoola ati: “ Enywe abatu ba Efweso, Esyaalo syoosi sisimanyire siti esiko sikhongo esya ba’Efwso nje esyaliinda enyumba ya Weere eya Atemi omukhoongo nende esifananyi syaye esyakwa okhutula mwikulu? ³⁶ . Nolwesyo, khasita ebitufu bino sibinyala byekaaniwa, muteekwa okhuwuleera khandi mutatulaniramo okhukhola esiitu syoosi esibi. ³⁷ . Muletire abasaacha bano ano, abakhaba mbo sibanyaka enyumba cha Weere oba bafwotokheresa weere wefwe omukhasi. ³⁸ Manu, nisiri mbo, Demeteriyo nende abetaanyi basye balikho no’khwekanyiisa khu mutu yeesi, enkhiikho njikule khandi abakhengi bemisango baliyo. Banyala okhuyira emisango. ³⁹ . Ni aliwo esiitu syoosi esyemedakho simudakha okhuleeta, sittekwa okhuwulirwa mulukhuηano lwa’malako. ⁴⁰ . Nga ni siri, khuli mu wudinyu owokhukhengerwa omusaango olwokhusasamasa olwebiitu ebikholirwe olwaleero. Mwisyo sibanyala okhusemba embeera embi yino, nga lumuwuma esikira.” . Nikamala okhulomaloma sino, kasiiwula olukhuηηaano.