Mu Kkoliinso ¹ . Bino nibiweye, Paulo katula mu Asene kacha mu Kkoliinso. ² . Eyo kawukaana Omuyudaaya olangiwa Akula, omwiwulanwa owo mu Ponto, owali nikakhecha okhutula mu Yitale nende omukhasi waye Pulisikira, olwokhuba Kulawudiyo kali alagiiye Abayudaaya boosi okhutula mu Rooma. Paulo kacha okhubawona, ³ khandi olwokhuba kali omukhosi owa maweema nga nibali, kamenya khandi kakholera alala nabo. ⁴ Wuli lwa Ssabbiiti kayingananga mu Sinagogi, nga akesakho okhukhobya Abayudaaya nende Abayonaani bamulonde. ⁵ . Manu Siira nende Timoseewo nibecha okhutula e Makedoni, Paulo kewayo omweene yesi okhuwuulira nga ajjulira eyiri Abayudaaya ati Yesu nje Kristo. ⁶ . Naye Abayudaaya nibayiinganiya Paulo bachaka okhunyeka, kasisimula enguwo chaye mu’khubayiinganiya nabawoola ati, “Amabanga kenywe kabe omusango, okhutula wunanu nende okhwemeedayo nja okhucha mu Bateende.” ⁷ Manu Paulo kecha katula mu Sinagogi kacha khu mulyango okulondakho mu nyumba ya Tito Yusito, omwikalikhiri wa Weere. ⁸ . Kulisupo, omutuki wa Sinagogi, nende abomudaala lyaye boosi bafukiiririra mu’Mwami; khandi nende Abakkoliinso bangi abamuwulira bafukirira khandi babatiisiwa. ⁹ Oludaalo lundi esiro Omwami kalomaloma nende Paulo mukhuwonekherwa ati: “Otatya; chanakana nende okhulomaloma, otawulera. ¹⁰ . Olwokhuba ndi nawe, khandi yiwuma mutu ocha okhukhuseeta khandi akhuwumise, olwokhuba ndi nende abatu bangi mu siko sikhoongo sino.” ¹¹ . Manu Paulo kamenya omwaka nende esitundu, nga abasomesa embosi ya’Weere. ¹² Naye Galiyo nikali ni nje owesasa lye Akaya, Abayudaaya bakholera alala baseeta Paulo bamuleta mu moni cholukhiikho. ¹³ . Bamuwabira baati, “Omusaacha ono,” ali okhukhobya abatu, “Mbo benamire Weere mu ngira echikhalaka amalako.” ¹⁴ Nga Paulo lukali nali ambi okhulomaloma, Galiyo kawoola Abayudaaya ati, “Nisiba mbo enywe Abayudaaya mwali mwekanyiisa khu siitu esitacha wulayi oba omusango okwamaani, syakhalimo amakhulutu ese okhubatekeresa. ¹⁵ . Naye nga nisidiira khubiteebo ebidiira khu mbosi nende ameeta nende amalako kenywe keene__ abeene mubimaliirise. Ese sindaabe omulamusi khu biitu nga bino. ¹⁶ Manu kecha kaberusya okhutula mu lukhiikho. ¹⁷ . Manu boosi bakalukhanira Sossene omukhulutu owa Sinagogi bamukhubbira mu moni cho’lukhiikho. Naye Galiyo sikafwayo bbe. Pulisikira, Akula Nende Apolo ¹⁸ Paulo kasikala mu Kkoliinso olwesikha esiyera. Manu kecha kalekha abafukiirisi kawanikha amatanga kacha e Busuuli, nali alala nende Pulisikira nende Akula. Natasiimbukha, kacha bamubekakho efwiiri lyaye e Kenkereya olwo’khwechuba khukali nakholire. ¹⁹ . Boola mu Efweso, yi Paulo kalekha Pulisikira nende Akula. Ye omweene kengira mu Sinagogi kayingana nende Abayudaaya. ²⁰ Nibamusaba abeekho nabo embaka ntono, kakaana. ²¹ . Ni nga nikawawo, kasuubisa ati, “Nakhakowole nikhuba okhudaha khwa Weere.” Ne awanikha amatanga okhutula mu Efweso. ²² Nikakoba mu Kayisaliya, kaniina kacha okhukheesa abafukiirisi khandi kekhirira kacha Antiyokiya. ²³ . Nikamalakho endaalo echiyera mu Antiyokiya, Paulo kasiimbukhayo kakenda mu situndu sino syosi syoosi nasiri mu syaalo sya Galatiya nende Fulugiya, nikomiisa abeeki boosi. ²⁴ . Ebyo nibisiiri awo omuYudaaya olangiwa Apolo, owiwulwa mu Alegezandereya, kecha mu Efweso. Kali omusaacha owasoma, nga amanyire lukali ebyawandiikiwa. ²⁵ . Kali kekesewa wulayi engira yo’mwami, khandi kalomalomanga nende okhudakha lukali khandi kasomesanga khu Yesu mu wulungifu, nende kali amanyirekho okhubatiisa khwa Yokaana khwoηηene. ²⁶ . Kachaka okhulomaloma nga syatya mu Sinagogi. Manu Pulisikira nende Akula nibamuwulira, bamulanga abakeniye engo waawe bamunyonyoola engira ya Weere mu wichuffu okhukhirawo. ²⁷ Apolo nikadaha okhucha mu Akaya, abafukiirisi bamukhubbirisa khandi bawandiikira abeeki beeyo bamusangalire. Mukhwoola, kali owowuyeedi wukali eyiri abo olwesisa abali nibafukiriiye. ²⁸ . Olwokhuba kayinganiyanga lukali lwene Abayudaaya akati mu batu, nga akhakhasa okhutula mu byawandikiiwa ati Yesu kali nje Kristo.