Mu Sessaloniika. ¹ Nibali nibamalire okhubita Anfwipoli nende mu Apoloniya, becha bola mu Sessaloniika, eyali esinagogi sya Bayudaaya. ² . Nga nsambo yaye luyali, Paulo kengira musinagogi, mundaalo che Sabbiiti chidatu kayingana nabo mu byawandiikiwa, ³ nanyonyoola khandi nakhakhasa ati Kristo syamukhoyera okhusandisiwa nokhusyuukhira mu bafu. Kawoola ati, “Yesu ono yindi okhubawuulirirakho nje Kristo.” ⁴ . Balala khu Bayudaaya bola bafukiirira beyimbaniya khu Paulo nende Siira, alala ne’sikaanda esya Bayonaani abatya Weere kho na’bakhasi aba’maani abatasi batono. ⁵ Naye Abayudaaya becha baba nende embalikha; manu bawukula abatu babi okhutula mu khatale, bawuusa esidiikha bachaaka okhwesasaakula mu siko sikhoongo. Bacha wangu khu nyumba ya Yasooni nibakoonya Paulo nende Siira mbo babatuse erwaanyi eyiri esidiikha. ⁶ . Naye nibatabawukaana, bakhuruudya Yasooni nende abafukiirisi bandi babayira eyiri abowunyala mu siko esikhoongo, nibakhumula baati: “Abasaacha bano abaletire akhediimo mu syaalo syoosi wunanu bechire ano, ⁷ khandi Yasooni kabasangalira kabengisa munyumba yaye. Boosi bali okhuyiinganiya amalako ka Kayisali, bawoola baati mbo aliwo omwene’ngo wundi, olangiwa Yesu.” ⁸ Nibawulira sino, esidiikha nende abo’wunyala be siko esikhoongo syoosi basambikha. ⁹ . Becha beyimirira Yasooni nende abandi bamala babalekhuula. ¹⁰ Esiro nisyola siiti, abafukiirisi batuma Paulo nende Siira okhucha e Beroya. Nibola eyo, bacha musinagogi sya Bayudaaya. ¹¹ . Aba Beroya bali balayi okhukhira abe Ssesalonika. Olwo’khuba bafuna owubakha nokhudakha lukali khandi bewunjaanga ebyawandikiwa wuli ludaalo okhuwona Paulo bikawoola nibituufu. ¹² . Bangi khuba Yudaaya bafukiirira, nasirala nga bangi khu bakhasi a Bayonaani abemeeresi nende abasaacha a Bayonaani bangi lubali. ¹³ Manu Abayudaaya mu Sessalonika nibasimanya baati Paulo kali awuulira emboosi ya Weere mu Beroya, bachayo yosi, basalaniya ebidiikha nende okhubachuuba. ¹⁴ . Abafukiirisi wangu wene batuma Paulo khu Nyanja, naye Siira nende Timoseewo basikala e Beroya. ¹⁵ . Abasaacha abayerekesa Paulo bamuyira mu Asene bamulekha nende ebiragiro mbo Siira nende Timoseewo bamwegatekho wangu nga lusinyalikha. ¹⁶ . Paulo nikali nasibaliinda mu Asene, Omwoyo kwamuchuuna lukali okhuwona ati esiko sikhoongo syali sichuuye ebifananyi ebilongalongwe. ¹⁷ . Manu kayingana nende aba Yudaaya musinagogi nende aba’Yonaani abatya Weere, alala nende mu khatale wuli ludaalo nende abo ababangayo. ¹⁸ Omukanda kwa aba Epikulyo nende aba Firosoofwo bachaaka okhuyiingana naye. Balala khu bo bateeba baati, “Omunanaakisi ono akesakho okhuwoola si?” Abandi bawoola baati, “Ali nga okholerera emisambwa emikeni wusa.” Bawoola sino olwokhuba Paulo kali awuulira emboosi endayi khu Yesu nende okhusyuukhira. ¹⁹ Manu becha bamuwukula bamuyira mu lukhiiho lwa Aleyopago, yibamuwolera baati, “Khunyala okhumanyakho okhuwuulira okhuyakha khuno nga nikhuli khwooli okhutaawo?” ²⁰ . Okhuleeta ebiitu ebiyaakha mu matwi kefwe, manu khudakha khumanye amakhulutu kabyo.” ²¹ (Aba’Asene boosi nende abateende abamenyayo bamala ebikha byawe nga bawuma sibakhola okhutusakho okhulomaloma nende okhutekeeresa emboosi njaakha.) ²² Manu Paulo kecha kema akati mu lukhiikho olwa Aleyopago kawoola ati: “Basaacha ba Asene! Mbona nti mungeri choosi muli abanadiini lukali. ²³ . Olwokhuba nga ninakenda okhwewodokhaniya natingaala wulayi ebiitu byenywe bimwinamira, nokhuwona nawona worutaari niyirikho owuwandiike wuno mbo: EYIRI WEERE OTAMANYIKHANIRE. Wunanu yimwinamira nga esitu simutamanyire nja okhulangirira yimuli. ²⁴ “Weere owaloonga esyaalo nende wuli esirimo nje Omwami owekulu nende esyaalo khandi syamenya mu byombakhe ebyombakhiwa nende amakhono ka’batu. ²⁵ . Khandi syayeresewa nende amakhono ka’batu, nga odakha esiitu syoosi, olwokhuba ye omweene awa abatu owulamu nende okhuyera nende nawuli siitu syoosi. ²⁶ Okhutula mu mutu mulala kakhola wuli syaalo esya’batu, ati banyale okhwichusa esyaalo syoosi; khandi kakhengawo ebikha byawe nende ebifwo byeene yibakhoyire okhumenya. ²⁷ . Weere kakhola sino abatu kho bamwolekho nalundi bache bamukonye, akakhaba mbo syali ale okhutula khunawuli mulala khwifwe. ²⁸ ‘Olwokhuba mu ye khuliwo khandi khukenda khandi khwabaawo.’ Nga wusa abayiiya enyembo benywe nibawoola baati, ‘Khuli baana abolwiwulo lwaye.’ ²⁹ . “Nolwesyo nga nikhuli abaana ba Weere, siehukhoya okhubaasa huuti afwana nende esabbu oba efwesa oba ekina___ ebikholewa nende amakesi no’khumanya khwo’mutu. ³⁰ Khale Weere sikafwangayo khu wutamanya nga owo, naye wunanu alagira abatu boosi woosi okhweyolobya. ³¹ . Olwokhuba katawo oludaalo lwalikhengera esyaalo omusango mu wulungifu nabitira mu mutu yikatawo kekeesa owukhakhafu eyiri abatu boosi nikamusiingisa okhumutusa mu bafu.” ³² Nibawulira ebyokhusyuukhira okhutula mu bafu, abandi bamukhomola, naye abandi bawoola baati, “Khudakha khandi okhukhuwulira khu mboosi yino.” ³³ . Khwesyo, Paulo katula mu lukhiikho. ³⁴ . Abasaacha batono balonda Paulo khandi bafukiirira. Mubo mwalimo Diyonusiyo, omunasikaanda esya Oleyopago, nende omukhasi alangiwa Damali, nende abandi alala nabo.