Timosewo Kekhubaniya khu Paulo Nende Siira ¹ Kecha koola e Deruba khandi nende Lusitula, eyali omweki olangiwa Timosewo yikamenya, yiηηina owali Omuyudaaya khandi omufukiirisi, naye nga simwana kali omu Yonaani. ² . Abafukiirisi mu Lusitula nende Ikoniyo bamulomalomakho wulayi. ³ . Paulo kadakha ache naye khu lukendo, manu kamukheba khulwa Bayudaaya abali nibamenya mu sifwo esyo, olwokhuba boosi bamanya baati simwana kali Omu Yonaani. ⁴ Nga nibali nibakenda okhutula mu siko okhucha musiindi, batusanga ebyaliingi nibikhengirwewo nende abatume nende abakhulutu mu Yerusaalemi alwa batu okhukholerakho. ⁵ . Manu amakanisa komiisiwa munfukiirira khandi kemeeda wuli ludaalo muwungi. Okhuwonekherwa Khwa Paulo Khwo’Musaacha Owe Makedoni ⁶ Paulo nende abasye bakenda mu syaalo esye Fulugiya nende Galatiya syoosi, nibamalire okhukaniwa nende Omwooyo Omwolerefu okhuwuulira emboosi mu syaalo esya Asiya. ⁷ . Niboola khu nsalo ya Musiya, bakesakho okhwingira mu Bisuniya, naye Omwooyo wa Yesu sikabafukiirira okhwingira. ⁸ . Manu babitira mu Musiya bekhirira bacha mu Tulowa. ⁹ Musiro Paulo kafuna okhuwonekherwa okhwo’musaacha owe Makedoni nikemire namwekweeda ati, “Yiicha eno e Makedoni otuyeede.” ¹⁰ . Manu Paulo nikali namalire okhuwona okhuwonekherwa, khwetekekha wangu wene okhucha e Makedoni, nikhumaliirisa khuti Weere kali atulangire okhuwuulira enjiri yibali. ¹¹ Nikhwatula e Tulowa khwengira mu’lyaato khwacha muwukololofu e Samoserakiya, khandi oludaalo olulondakho khwacha e Neyapoli. ¹² . Nikhwatula eyo khwakenda khwacha e Firipi, e situndu esya ba Rooma esyemerera Disiturikiti ya Makedoni. Manu khwaba eyo endaalo echiyerakho. ¹³ . Olwa Ssabbiiti khwatula erwaanyi wo mulyaango okwe siko khwaacha khu mwaalo, yikhwasubira okhuwukaana esifwo esyo’khwekalikhiramo. Khwekhala assi khwachaaka okhulomaloma nende abakhasi abali ni bewusise awo. ¹⁴ Mulala khwabo abatekeeresa kali mukhasi olangiwa Ludiya, owakusanga enguwo eche bbeyi okhutula mu siko sikhulutu esyo Suwatira, owali omwinamiri wa Weere. Omwami kekula omwooyo kwaye okhukowola mu wubakha wa Paulo. ¹⁵ . Ye nende abatu abo’mudaala lyaye nibabatiisiwa, katulanga engo waye. Kawoola ati, “Nimuwona muuti ndi omufukiirisi mu mwami, mwiche mumenye munyumba yange.” Kecha katwegayirira. ¹⁶ . Olundi nikhwali nikhucha mu sifwo e syo’khwekalikhiriramo, khwawukanana nende omukhana omuwambe owalikho omusambwa kukakhosesanga okhulakula ebiicha okhubawo. Kafunisa abeneye erubya nyingi chene olwokhubalakula. ¹⁷ . Omukhana ono kalonda Paulo alala nende fweesi, nakhumula ati, “Abasaacha bano bakhosi ba Weere oli amukulu lukali, ababawoolera engira eyo’khuwonesewa.” ¹⁸ . Sino kasikhola endaalo nyingi lukali. Mukhwakamyayo Paulo kawona nga simuchuna lukali manu kakalukhana kawoola omusambwa ati, “Muliita lya Yesu Kristo nkhulagira omutulemo!” Esikha syene esyo omusambwa kwamulekha. ¹⁹ Ne abene mukhaana omuwambe nibawona baati esuubi lyo’khufuna erubya liweeye, badiira Paulo nende Siira babakhuruudya babayira mu khatale eyiri abowunyala. ²⁰ . Babayira eyiri abalamusi bawoola baati, “Abasaacha bano Bayudaaya, khandi bata esiko syefwe esikhulutu mu khediimo ²¹ bali okhwekesanga ensambo embi echitafukiirirwa efwe aba Romma okhufukiirira oba okhukhola.” ²² Esidiikha syeyambaniya mu khukhubba Paulo nende Siira, manu abalamusi balagira babatusemo enguwo bakhubbwe. ²³ . Nibamala okhubanalanaala lukali, babasukuna mujeera, balagira omulindi we jeera okhubalinda namakesi mangi. ²⁴ . Olwokhuwulira ebilagiro nga ebyo, kabata mujeera eyomukati weene manu kabawowa amakulu kawe khu mayiingo. ²⁵ Ambi musiro akati Paulo nende Siira bekalikhiraanga khandi nibemba enyembo cha Weere, ne abawowe bandi babatekeresanga. ²⁶ . Awene awo echa abawo okhudenganisiwa khwe’roba okhwa’maani lukali okhwecha khwadenganiya emisiingi che’jeera. Ekhabi rala emiryango che jeera choosi chekukha, nende enjegere chiri khunawuli mutu chanyikukha. ²⁷ Omuliindi we jeera kasisimukha, manu nikawona enjiki che’jeera nichikukhire, kachowolayo okukhande kwaye atono wene keyite olwokhuba kabasa ati abawoye bali beyibire. ²⁸ . Naye Paulo kaalacha nawoola ati, “Oteyiita omweene! Fweesi khuli ano!” ²⁹ Omuliindi we’jeera kalangisa omuliro, kengira wangu natengerekha kakwa ali Paulo nende Siira. ³⁰ . Kecha kabatusa erwanyi kabateeba ati, “Abakhongo, siina sinteekwa okhukhola kho mbonisiwe?” ³¹ . Bakowolamo baati, “Fukirira mu Mwami Yesu, ocha okhuwonesewa__ ewe nende abomudaala lyawo.” ³² Manu becha balomaloma emboosi yo’Mwami yaali nende boosi mu nyumba yaye. ³³ . Mu saawa eyesiro eyo omuliindi we jeera kabayira kaboosa amawa kaawe; manu wangu wene ye nende abomudaala lyaye boosi babatiisiwa. ³⁴ . Omuliindi we jeera kabaleeta munyumba yaye kabateerawo ebyokhulya; kechula esangaalo olwokhuba kali afukiriiye mu Weere__ ye nende abomudaala lyaye boosi. ³⁵ Naye niwanuukha, abalaamusi batuma abasirikale mujeera eyiri omuliindi we’jeera nende esiragiro baati: “Muwoolole abasaacha abo.” ³⁶ . Omuliindi we’jeera kawoola Paulo ati, “Abalamusi balagiiye baati ewe nende Siira muwololwe. Wunanu munyala okhuwaawo. Muche ne mireembe.” ³⁷ Naye Paulo kaawolera abasirikale ati, “Batukhubba mu batu akaati nibataatuwosesiise, nende khuli ba Rooma. Khandi wunanu badakha okhutumalawo muwekisi? Bbe! Abeene beche batutuse batuwerekese erwanyi.” ³⁸ . Abasirikale becha bawoolera abalamusi, manu nibawulira mbo Paulo nende Siira bali batu ba Rooma, becha besindukha. ³⁹ . Becha okhubasangasa manu babayerekesa okhutula mujeera, nibabasaba batule mu siko sikhongo. ⁴⁰ Paulo nende Siira nibamalire okhutula mujeera, bacha mu nyumba ya Ludiya, yibawukaana abafukiirisi babakumya. Manu bamala bawawo.