¹ Olukhiikho e Yerusalemi Abatu bandi batula ewu’Yudaaya bacha Antiyokiya ni bali basomesa aboluganda baati: “Okhutusakho nga wakhebewa, okhwema khu’piisa Musa nga lukasomesa, sunyala khuwonisewa.’’ ² . Sino syaletawo okhuyingana no’khukawukhana khukhongo mumbaasa akati wa Balunaba nende Paulo na’basaacha batula Antiyokiya. Manu syaletta Paulo nende Balunaba badoleewa, nabafukirira bandi, bache e Yerusalemi okhuwona abatume nabakoffu olwembakha yino. ³ Ekkanisa yabatuma nibacha, khandi nga bakendire babitta Fewonisiya nende e Samalia, babawolera nga abateende bali bakalukhanire. Kano mawuliire kasangasa aboluganda. ⁴ . Niboola e Yerusalemi, basangalirwa mukkanisa nabatume nabakoffu, baboosera amawuliire ka byoosi Weere kakali abakholeyemo. ⁵ Ne abafukirira bandi abomukanda kwa ba Falisayo basingira bawoola baati, “Abeteende batekwa okhukhebewa khandi bakhoyire bachire khumaloko ka Musa.” ⁶ . Abatume na’bakoffu bekhala okhwewunja mu mboosi echo. ⁷ Nibachitoniofuye lukali, Petero kasingira kabawoola ati: “Baana befwe, musimanyire muuti mubikha bibitirekho Weere kakhengawo ati Abateende bosi banyale okhuwulira owubakha waye bamala bafukirira okhubitira mumunwa kwange. ⁸ . Weere, omanyire omwoyo, kekeesa mbo kabafukirira olwokhubawa kabawa omwoyo mwolerefu, nga fwesi lukatuwa efwe. ⁹ . Sikakawukhaniyamo effwe nabo, kalabya emyoyo chawe ngasibisya munfukirira. ¹⁰ Ne Wunanu, lwasina mukhema Weere nimuta khumakosi ka beeki ejogi eyitali yefwe ata eya bakuuka yefwe yibali nibatanyala besimirisa? ¹¹ . Khaba! Khufukirira siri sityo khulwe’sisa syo’mwami wefwe Yesu nti khwawonesewa, bosi nga lubali.” ¹² Olukhunηηana lwoosi lwa’wulera nga lubatekeresa Balunaba nende Paulo nibabawoolera ebyo’wuwonero wamayiya ne’byokhuwukiya Weere bikali akholire mu bateende nga wubabitiramo. ¹³ Nibamala, Yakobo kalomalomera amukulu ati: “Baana befwe, muntekerese. ¹⁴ . Simooni atutoniyofuliye nga Weere mukhusokha katwekesa okhufwayo khwaye nga’wukula mubateende abo abatu bakekowoseye. ¹⁵ Emboosi cha ba nabbi chifukirisaniya na sinno, nga lusyawandikiwa siti: ¹⁶ . “’Nimalire bino nicha okhukowola khandi nombakhe ewema ya Daudi yakwa. “Ebyanyasikha ndibyombakha, andi ndibikowosawo, ¹⁷ khu batu badoηηirewo banyale okhukonya omwami, khandi abateende baliba nirita lyange, omwami nje olomaloma, okhola ebitu binno’ ¹⁸ ebibeye nibimanyikhanire emyaka chemukongo. ¹⁹ “Khukhengawo khwange, no’lwesyo, khutasikhola syaba sidinyu eyiri abateende abadakha okhukalukhanira Weere. ²⁰ . Okhumalakho khubawandikire, nikhubawolera okhutalya ebyo’khulya ebinyasiwe nebilongalonge, nga bitula mu wuddamba, enyama chebisolo bimikirwe nende khu mabanga. ²¹ . Khuba Musa bamuwuuliyekho mu wuli siko okhutula mu bikha byemukongo babisomanga mu sinagogi khu wuli lwa Ssabbitii.” Ebbaruwa Yolukhikho Eyiri Abateende Bafukirira. ²² Manu abatume nabakoffu, ne Kanisa yoosi, bakhengawo okhudoolamo abatu bawe begaate khu Paulo nende Balunabba bache Antiyokiya. Badoola Yuda (Olangiwa Bbarisaba) nende Silla, abasaacha babiri abali batangirisi mu boluganda. ²³ . Ninabo batuma ebaruwa Yinno: Abatume nabakoffu, abasyeenywe, Eyiri Abatende Bafukirira Mu Antiyokiya, Siriya nende Kirukiya Amakheeso. ²⁴ Khwawulira khuuti abasyefwe bandi batutulakho atasi efwe okhubafukirira khandi khwabakhedya, khwatawula ebibaaso byenywe okhwema khubibalomaloma. ²⁵ . Fwesi fwesi khufukirisanisye okhudoola khubatu bandi khwabatuma yimuli nabecha befwe abadakhwa Balunabba nende Paulo __ ²⁶ abasaacha abewaayo owulamu wawe khu lwerita lyo’mwami Yesu Kristo. ²⁷ Nolwesyo khuli khubatumira Yuda nende Siira okhukhakhasa ne’mboosi yo’munwa bikhubawandiikira. ²⁸ . Syawonekha okhuba sirayi eyiri omwoyo mwolerefu nende yikhuli okhutabasidowera mu wuli situ syoosi okhubitira khubyetaggo binno: ²⁹ . Mukhoyiire mutadiira khu byo’khulya byemisambwa, amabaanga nenyama yebisolo bimikirwe nende owudamba. Munyale okhukhola wulayi nimulekhire binno bitu. ³⁰ Mweraba Abasaacha batumiwa becha bekha bacha Antiyokiya, yiboola bawuusa ekkanisa alala bamala babawa ebbaruwa yibayirire. ³¹ . Abatu bayisoma basangala olwemboosi yo’khubakumiya. ³² . Yuda nende Siira, abali khandi ba nabbi, bawoola bingi okhukumiya nokhwomisa abasyaawe. ³³ Nibamalirekho embaka nibaliyo, basewulwa nenkhabi ye mirembe okhukowoolayo eyiri ababatuma. ³⁴ . ³⁵ Naye Paulo nende Balunabba badoηηa mu Antiyokiya, yibasomesa khandi bangi no khuwuuliira emboosi yo’mwami. Owutafukirisaniya Akati Wa Paulo Nende Balunaba ³⁶ Olunyuma lwendaalo ntono Paulo kawoola Balunabba ati, “Khukowooleyo emukongo khukeniye abasyefwe mu biko byoosi yikhwawuulirakho emboosi yo’Mwami khuwone nga lubachanakana.” ³⁷ . Balunabba kadakha ayire Yokaana, yesi yibalanga Maako, ache nabo, ³⁸ naye Paulo sikasibasamo okhuba esya makesi okhumuyira, okhuba ye kali abekawuyekho nibali Pamufwiliya khandi sikali nachanakanire nabo mumirimo. ³⁹ Bali netafukirisaniya eyamaani akati wawe eyatulamo balekhana. Balunabba kayira Maako bachira e Kupulo mu lyato, ⁴⁰ ne Paulo kadoola Siira bawawo, abasyaawe basemba babasewula khu Siisa syo’Mwami. ⁴¹ . Kabita mu Busuli nende mu Kurukiya, nata mu makanisa amaani.