¹ Abakhasi, mu mbya nasirala mweweyo mwabeene eyiri ba wamwenywe kho sinyalikhe, mbo niwabawo khubo otafukirira emboosi, banyale okhuba nti bakalukhanisiwa nga babitire mu khwebisya khwa’bakhasi bawe, ² ne nibawona owulamu wolerefu no’luyaali lwenywe eyiri Weere. ³ Owulayi wenywe siwukhoyire okhwema khu khweteresa khwenywe okhwo’khumukulu, nga endukha y’efwiri no’khwambala otunyolo tw’efwesa nende enguwo endayi. ⁴ Esikhirakho, syakhakhoyire owulayi wawo owukhutulamo, owo’mukati, owulayi wutachuchukha owukwalafu no’mwoyo munyifu, okukhoyera khandi okw’ebbeyi engali mu moni cha Weere. ⁵ Khuba yino nje mbya abakhasi bolerefu abakhale abatanga esuubi mu Weere nga lu beyonjanga. Bewangayo eyiri bawamwawe beene, ⁶ nga Saala, owawulira Yibbulayimu kamulanga omukhongo waye. Enywe muli bakhaana baye nimukhola ebirayi nga simutya. ⁷ Abasaacha, mu mbya nasirala mube abafwayo nga lu mumenya nabakhasi benywe, nimubawa oluyaali nga musimanya nti bo bakata khandi nga basikha nanywe ng’esirawo sy’esisa mu wulamu, kho awumewo esibakayira mu khwekalikhira khwenywe. Okhusanda Olwo’khukhola Owulayi ⁸ Munjakamo, mwesi mweesi, mube abasasirana, nga mudakhana, mulala sya mulala; nga mulekhanira muwuloonga. ⁹ Mutasasulananga esibi olw’esibi, enyeko khunyeko, mukhukeraniya, sasula esibi ne’nkhabi, khulwokhuba khu sino mwalangiwa sibe mbo mukerama enkhabi. ¹⁰ Khuba, “Oyo yeesi owakhadakhire owulamu khandi awone endaalo ndayi atekwa okhulinda olulimi lwaye okhutakwa mu sibi neminwa chaawe okhutaba nenomaloma yo’wubacha. ¹¹ Atekwa okhukalukhana katula khu sibi khandi kakhola owulayi; atekwa okhukonya emirembe no’khuchiloonda. ¹² Khuba emoni ch’Omwami chiri khu bolerefu ne amatwi kaye katekeresa okhwekalikhira khwawe; naye oweeni w’Omwami siwudakhisa abakhola esibi.” ¹³ Nanu ocha okhubachuniya nimuba n’esinani esyokhukhola owulayi? ¹⁴ Nende nisiba mbo mukhoyire okhusanda olw’esirayi, muli n’enkhabi. “Mutatya bi batya; mutatiisiwa.” ¹⁵ Ne mu myoyo chenywe mwawule Kurisito ayenηene ng’Omwami. Mube abetekefu ebikha byoosi okhukowola mu oyo yeesi obateeeba esikira nimuba n’esuubi yimuli nayo. Ni naye mukholenge sino no’wuloonga no’luyaali, ¹⁶ nga mulinda okhutegeera khwenywe okhutufu, manu sibe mbo abo abalomaloma wubi khuwulayi wenywe n’episa chenywe ndayi mu Kurisito banyale okhuswala olw’enomaloma yawe yitakhoya yimuli. ¹⁷ Siba sirayi, nisiba mbo khudakha khwa Weere, okhusanda olwo’khukhola owulayi okhukhira okhukhola esibi. ¹⁸ Khuba Kurisito kafwa lulala khu lwa boosi khu lwe’sibi, omulungifu khu lwa batali balungifu, okhubaleta khu Weere. Ketewa mu mubiri naye kakholewa omulamu mu mwoyo. ¹⁹ Okhubita muye khandi kacha kawuulira emyoyo chiri mu jeera ²⁰ eyiri abali abajeemu khale Weere bakalindirira mukhwesimirisa mu ndaalo cha Nuwa ebikha ebyo eryaato nilyali liri okhwombakhiwa. Mu kati walyo abaatu batono, munana boosi alala, bawonesewa okhubitira mu maachi, ²¹ ne amaachi kano khawonero kho’khubatisiwa wunanu akhabawoniya mwesi__ owutali wo’khubatusakho owuchafu wo’mubiri naye esisubiso sy’embaasa ndayi eyiri Weere. Sikhuwoniya ewe okhubitira mu khusyukhira khwa Yesu Kurisito, ²² ochiye mukulu khandi ali khu mukhono mulungi okwa Weere__ nende ba malayika, owunyala na’maani abamuyeresa yali.