¹ Nolwesyo, mwetusemo owutadakhisa abasyenywe, khandi no’wubacha, okhulichanamo enkhwe, enkhalikhali, no’wufwolwa wa wuli nsambo. ² Nga baana bakhewulwa, muchiririre n’amabeere ako’mwoyo, kho okhukabitiramo munyale okhukhula mu khuwonesewa khwenywe, ³ wunanu nga lu mu mukhombirekho muuti Omwami mulayi. Ekina lamu n’abaatu bangale. ⁴ Nga lu mwicha yali, ekina lamu__ eryasyuliwa na’baatu ne bangaliwa nende Weere nga bo’wukusi wa’mukulu yali__ ⁵ enywe mwesi, nga’makina malamu, muli okhwombakhiwamo enyumba yo’mwoyo okhuba nga bakhawona bolerefu abawaayo ebiyanwa byo’mwoyo ebyombakhiwa nende Weere khu lwa Yesu Kurisito. ⁶ khuba mu biwandiiko biwoola biiti: “Wona, nta ekina mu Sayuni, ekina lyangaliwa khandi eryo’wukusi wukali eryo’nkhunsonda, khandi oyo omwesika syalitewa mu nsoni.” ⁷ Wunanu eyiri enywe abafukirira, lino kina ly’ebbeyi yamukulu. Ne eyiri abo abatafukirira, “Ekina abombakhi libakhaya nje erifukhire eryo’mukoona,” ⁸ Khandi, “Ekina erikira abaatu bekumula khandi olwanda olukira baakwa.” Bekumula olwokhuba bajemera owubakha__ esyali Weere sikali nabatekekheye. ⁹ Ne muli baatu bangaliwa, owuweresa wo’wenengo, egwanga lyolerefu, abaatu ba Weere, khu sinyalikhe enywe okhulangirira okhumufumiya owabalanga okhutula mu sirema okhwingira mu wulafu wa makana. ¹⁰ Mu khuchaka simwali baatu, naye wunanu muli baatu ba Weere; mu khuchaka simwali mwafuna esisa, ne wunanu mufunire esisa. ¹¹ Becha bange abadakhwa, mbakhubirisa, nga bateende khandi nga abakeni mu syalo, okhwewala owekombi we’sibi, ebilwanisa emyoyo chenywe. ¹² Mu menye mu wulamu wulayi akati wa batafukiirira, nende babayiinga baati mukhola ebibi, khu banyale okhuwona ebikolwa byenywe birayi no’khuwa Weere oluyaali khu ludaalo lwalitukeniyiira. Okhutta oluyaali mu batuki nende abo’wunyala ¹³ Mweweyo mwabene khu lwa Weere eyiri wuli mutu wo’wunyala owatewawo khu lwa’baatu: oba eyiri omwene’ngo, nga’batangirisi bo wunyala wukhirawo, ¹⁴ oba eyiri abamasasa, baba natumire naye okhuwoneresa abo abakhola owubi nende okhusiima abo abakhola owulayi. ¹⁵ Khuba khuno khudakha khwa Weere olwokhuba mukhukhola owulayi okhoya okhusimiya enomaloma yo’wutamanya ya’baatu basiru. ¹⁶ Mumenye nga balekhule, ne mutakhosesa owulekhule wenywe nge’syokhuwikha khu sibi; mubewo nga bakhosi ba Weere. ¹⁷ Mwekese wuli mutu oluyaali lwawene, okhudakha eyiri bossi abafukirira, mutye Weere, muwe omwen’engo oluyaali. ¹⁸ Abaambe, mweweyo abeene eyiri abowutuki benywe nokhutya khwosi khwoosi siyiri abalayi nabafwayo boηene, naye nende eyiri abo abawalaba . ¹⁹ Khuba sifukirirwa omutu kesimirisa awuma musango khulwokhuba ebibaaso byaye biri eyiri Weere. ²⁰ Ne siba sitye no’simiwa no’funa okhukhubbwa nokholire esisobyo ne wasigumira? Naye nisiba mbo osanda olwokhukhola esirayi ne wasigumira, sino sisimiwa mu moni cha Weere. ²¹ Eyiri sino walangiwa, khulwokhuba Kurisito kasanda khulwawo, kakhulekhera esyo’khuwonerakho, sibe mbo otekwa okhulonda mu makulu kaye. ²² “Sikakhola sibi syoosi, no’wubacha siwakaniwa mu munwa kwaye.” ²³ Ne nibamulakirisira amanyeko kawe, sikesasusa; ni kasanda, sikabatisyatisya. Okhutusakho, kesika omwene yali mu khwewayo khuyo okhenga emisango mu khwakaniya. ²⁴ Yee omwene kagumira ebibi byefwe mu mubiri kwaye khu musaala, kho khunyale okhufwa khu bibi khu khubewo abalamu olwo’wulungifu; okhubitira mu mawa kaye ewe onyalire okhuwonesewa.” ²⁵ Khuba mwali ng’amakondi akakota, ne wunanu ewe okowoye eyiri omwayi nende omulabirisi w’emyoyo chenywe.