¹ Kale bwe twaweweibwe obutuukirivu olw'okwikirirya, tubbenga n'emirembe eri Katonda ku bwa Mukama waisu Yesu Kristo, ² era eyatuweeserye olw'okwikirirya okutuuka mu kisa kino kye twemereiremu; era twenyumirizienga olw'okusuubira ekitiibwa kya Katonda. ³ So ti ekyo kyonka, era naye twenyumirizienga mu kubonaabona kwaisu, nga tumaite ng'okubonaabona kuleeta okugumiinkiriza; ⁴ ate okugumiinkiriza kuleeta okukemebwa ate okukemebwa kuleeta okusuubira: ⁵ ate okusuubira tekukwatisia nsoni, kubanga okutaka kwa Katonda kufukiibwe dala mu myoyo gyaisu, ku bw'Omwoyo Omutukuvu gwe twaweweibwe. ⁶ Kubanga bwe twabbaire nga tukaali banafu, mu ntuuko gye Kristo yafiiriire abatatya Katonda. ⁷ Kubanga kizibu omuntu okufiirira omutuukirivu; kubanga omusa koizi omuntu aguma n'okumufiirira. ⁸ Naye Katonda atenderezesia okutaka kwe iye gye tuli, kubanga bwe twabbaire nga tukaali tulina ebibbiibi Kristo n'atufiirira. ⁹ Kale okusinga einu Atyanu bwe twaweweibwe obutuukirivu olw'omusaayi gwe, twaba kulokoka mu busungu ku bubwe. ¹⁰ Kuba obanga bwe twabbaire tukaali balabe, twatabaganyiziibwe no Katonda olw'okufa kw'Omwana we, okusinga einu bwe twatabaganyiziibwe tulirokoka olw'obulamu bwe; ¹¹ so ti ekyo kyonka, era naye nga twenyumiririzia mu Katonda ku bwa Mukama waisu Yesu Kristo, atuweeserya Atyanu okutabagana. ¹² Olw'ebyo, nga ku bw'omuntu omumu ekibbiibi bwe kyayingiire mu nsi, okufa ne kuyingira olw'ekibbiibi, kityo okufa ne kubuna ku bantu bonabona kubanga bonabona baayonoonere: ¹³ kubanga Okutuusia ku mateeka ekibbiibi kyabbaire mu nsi: naye ekibbiibi tekibalibwa, awatabba mateeka. ¹⁴ Naye okufa kwafugire okuva ku Adamu Okutuusia ku Musa, era no ku abo abataasoberye ng'engeri ey'okwonoona kwa Adamu, iye niikyo ekifaananyi ky'oyo ayaba okwiza. ¹⁵ Naye ng'okwonoona kudi bwe kwabbaire, era n'ekirabo tekyabbaire kityo. Kuba obanga olw'okwonoona kw'omu abaafiire bangi, okusinga einu ekisa kya Katonda n'ekirabo olw'ekisa ky'omuntu odi omumu Yesu Kristo kyasukiriire okubuna abangi. ¹⁶ Era nga bwe kwaizire ku bw'omumu eyayonoonere, ekirabo tekyabbaire kityo: kubanga omusango gwaviire ku mumu okusinga, naye ekirabo ne kiva mu byonoono ebingi okuweesia obutuukirivu. ¹⁷ Kuba obanga olw'okwonoona kw'omumu okufa kwafugire ku bw'omumu, okusinga einu abo abaweweibwe ekisa ekisukirivu n'ekirabo eky'obutuukirivu balifugira mu bulamu ku bw'oyo omumu Yesu Kristo. ¹⁸ Kale kityo ng'olw'okwonoona kw'omumu omusango bwe gwasingire abantu bonabona kityo n'olw'obutuukirivu bw'omumu ekirabo kyabbaire ku bantu bonabona okuweesia obutuukirivu bw'obulamu. ¹⁹ Kuba ng'olw'obutawulira bw'omuntu omumu odi abangi bwe baafuukire ababbiibi, kityo n'olw'okuwulira kw'oyo omumu abangi bafuukire batuukirivu. ²⁰ Era n'amateeka ne gayingira, okwonoona kusukirire; naye ekibbiibi bwe kyasukiriire ekisa ne kisinga okusukirira ²¹ ng'ekibbiibi bwe kyafugiire mu kufa era n'ekisa kityo kaisi kifuge olw'obutuukirivu okuweesia obulamu obutawaawo, ku bwa Yesu Kristo Mukama waisu.