¹ Kale kiki kye twatumula Ibulayimu zeiza waisu mu mubiri kye yaboine. ² Kubanga Ibulayimu singa yaweweibwe obutuukirivu olw'ebikolwa, singa alina ekimwenyumirizisia; naye abula mu maiso ga Katonda. ³ Kubanga ebyawandiikibwa bitumula bitya? Ibulayimu n'aikirirya Katonda, ne kumubalirwa okubba obutuukirivu. ⁴ Kale, omukozi empeera ye temubalirwa lwe kisa, naye ng'eibbanja. ⁵ Naye atakola, kyoka n'aikirirya oyo awa obutuukirivu abatatya Katonda, okwikirirya kwe kumubalirwa okubba obutuukirivu. ⁶ Era nga Dawudi bw'ayatumwire omukisa gw'omuntu, Katonda gw'abalira obutuukirivu awabula bikolwa, nti ⁷ Baweweibwe omukisa abatoleibweku ebyonoono byabwe, Ebibbiibi byabwe byabikiibweku. ⁸ Aweweibwe omukisa omuntu Mukama gw'atalibalira kibbiibi. ⁹ Kale omukisa ogwo guli ku bakomole bonka, oba nantiki ku abo abatali bakomole? Kubanga tukobere nti okwikirirya kwe kwabailirwe Ibulayimu okubba obutuukirivu. ¹⁰ Kale kwabalirwe kutya? bwe yabbaire ng'akomoleibwe, nantiki bwe yabbaire ng'akaali kukomolebwa? ti bwe yabbaire ng'akomoleibwe, naye ng'akaali kukomolebwa: ¹¹ n'aweebwa ekyokuboneraku eky'okukomolebwa, akabonero k'obutuukirivu obw'okwikirirya kwe yabbaire ng'akaali kukomolebwa: kaisi abbe nga zeiza wabwe bonabona abaikirirya nga ti bakomole, babalirwenga obutuukirivu; ¹² era ni zeiza w'abakomole, so ti w'abo abakomole obukomoli, naye, abatambulira mu bigere by'okwikirirya kwa zeiza waisu Ibulayimu kwe yabbaire nakwo ng'akaali kukomolebwa. ¹³ Kubanga okusuubizia tekwaweibwe Ibulayimu waire eizaire lye mu mateeka, nti alibba musika we nsi gy'onagyona, wabula mu butuukirivu abw'okwikirirya. ¹⁴ Kubanga ab'omu mateeka singa niibo basika, okwikirirya singa kudibire, era n'okusuubizia singa kutooleibwewo: ¹⁵ kubanga amateeka galeeta obusungu; naye awabula mateeka, era tewabbaawo kwonoona. ¹⁶ Kyekuva kuva mu kwikirirya, kaisi kubbenga kwe kisa, okusuubizia kaisi kugume eri eizaire lyonalyona, ti eri ab'omu mateeka bonka, naye era n'eri ab'omu kwikirirya kwa Ibulayimu, niiye zeiza waisu fenafena ¹⁷ (nga bwe kyawandiikiibwe nti Nkufiire zeiza w'amawanga amangi) mu maiso g'oyo gwe yaikirirye, niiye Katonda, azikizya abafu, era ayeta ebibulawo ng'ebiriwo. ¹⁸ Eyaikirirye mu isuubi awatasuubirikika, kaisi abbenga zeiza w'amawanga amangi, nga bwe kyatumwirwe nti Eizaire lyo liribba lityo. ¹⁹ N'atanafuwa mu kwikirirya bwe yalowoozerye omubiri gwe iye nga gufiire (nga yaakamala emyaka nga kikumi), n'ekida kya Saala nga kifiire: ²⁰ naye mu kusuubiza kwa Katonda teyabuusirebuusire mu butaikirirya, naye n'afuna amaani olw'okwikirirya, ng'agulumizia Katonda, ²¹ era ng'ategeerera dala nga bye yasuubizirye era asobola n'okubikola. ²² Era kyekyaviire kumubalirwa okubba obutuukirivu. ²³ Naye tekyawandiikiibwe ku lulwe yenka nti kwabailirwe; ²⁴ naye era ne ku lwaisu, abaaba okubalirwa, abaikiriya oyo eyazukirizirye Yesu Mukama waisu mu bafu, ²⁵ eyaweweibwe olw'ebyonoono byaisu n'azuukira olw'okutuweesia obutuukirivu.