¹ Kale Omuyudaaya asinga atya? oba n'okukomolebwa kugasa ki? ² Kugasa inu mu bigambo byonabyona: eky'oluberyeberye kubanga bagisisiibwe Katonda bye yatumwire. ³ Kubanga kibba ki abamu bwe batabba no kwikirirya, obutaikirirya bwabwe bulitoolawo obwesigwa bwa Katonda? ⁴ Kitalo: Bbe, Katonda abbenga wa mazima, naye buli muntu abbenga mubbeyi; nga bwe kyawandiikiibwe nti Obbe n'obutuukirivu mu bigambo byo, Osinge bw'osalirwa omusango. ⁵ Naye obutali butuukirivu bwaisu niibwo butenderezesia obutuukirivu bwa Katonda, twatumula tutya? Katonda abula butuukirivu aleeta obusungu? (Ntumula mu buntu.) ⁶ Kitalo: kubanga, (bwe kiba kityo), Katonda alisalira atya ensi omusango? ⁷ Naye amazima ga Katonda bwe geeyongera okuboneka okw'obubbeyi bwange iye n'aweebwa ekitiibwa, nze kiki ekinsalirya omusango ate ng'omwonooni ⁸ era kiki ekituloberya okutumula (nga bwe tuwaayirizibwa, era ng'abamu bwe batumula nti tukoba) nti Tukolenga ebibbiibi, ebisa kaisi bize? abo okusalirwa omusango kwe nsonga. ⁹ Kale kiki? Ife gisangire okusinga ibo? Bbe n'akatono: kubanga tusookere okuwaabira Abayudaaya era n'Abayonaani nti bonabona bafugibwa kibbiibi; ¹⁰ nga bwe kyawandiikiibwe nti wabula mutuukirivu n'omumu; ¹¹ Wabula ategeera, Wabula asagira Katonda; ¹² Bonabona baakyama, baafuuka abatasaana wamu; Wabula akola obusa, wabula n'omumu; ¹³ Omumiro gwabwe niiyo entaana eyasaamiriire; Babbeya n'enimi gyabwe; Obusagwa bw'embalasaasa buli wansi w'eminwa gyabwe: ¹⁴ Omunwa gwabwe gwizwire okukolima n'okukaawa: ¹⁵ Ebigere byabwe byanguwa okuyiwa omusaayi; ¹⁶ Okuzikirira n'obunaku biri mu mangira gaabwe; ¹⁷ So tebamanyanga ngira y'emirembe: ¹⁸ Wabula kutya Katonda mu maiso gaabwe. ¹⁹ Naye tumaite nga byonabyona amateeka bye gatumula, gakoba abo abalina amateeka; buli munwa gwonagwona guzibibwe, n'ensi gyonagyona gibbeeku omusango eri Katonda: ²⁰ kubanga olw'ebikolwa by'amateeka alina omubiri yenayena taliweebwa butuukirivu mu maiso ge: kubanga amateeka niigo agamanyisia ekibbiiibi. ²¹ Naye atyanu awabula mateeka obutuukirivu bwa Katonda, obutegeezebwa amateeka na bannabbi, bubonesebwa; ²² niibwo butuukirivu bwa Katonda olw'okwikirirya Yesu Kristo eri bonabona abaikirirya; kubanga wabula njawulo; ²³ kubanga bonabona baayonoonere, ne batatuuka ku kitiibwa kya Katonda; ²⁴ naye baweweibwe obutuukirivu bwo buwi lwe kisa kye olw'okununulibwa okuli mu Kristo Yesu: ²⁵ Katonda gwe yateekerewo okubba omutango, olw'okwikirirya omusaayi gwe, okulaga obutuukirivu bwe, olw'okuleka ebibbiibi ebyakolebwanga eira, Katonda ng'agumiinkirizia; ²⁶ okulaga obutuukirivu bwe mu biseera bino: kaisi abbe omutuukirivu era ng'awa obutuukirivu aikirirya Yesu. ²⁷ Kale okwenyumirizia kuli waina? Kwaziyiziibwe. Kwaziyiziibwe n'amateeka gafaanana gatya? ge bikolwa? Bbe: naye n'amateeka go kwikirirya. ²⁸ Kyetuva tubala ng'omuntu aweebwa obutuukirivu lwo kwikirirya awabula bikolwa byo mu mateeka. ²⁹ Oba Katonda, Katonda wa Bayudaaya? era ti Katonda wa ba mawanga? Niiwo awo, era wa ba mawanga: ³⁰ oba nga Katonda ali mumu, aliwa obutuukirivu abakomole olw'okwikirirya, n'abatali bakomole olw'okwikirirya. ³¹ Kale amateeka tugatoolawo olw'okwikirirya? Kitalo: Bbe, tuganywezia bunywezi