¹ Awo olwatuukire Yesu bwe yamalire ebigambo ebyo byonabyona, n'akoba abayigirizwa be nti ² Mumaite nti olw'eibiri walibbaawo Okubitaku, n'Omwana w'omuntu aliweebwayo okukomererwa. ³ Awo bakabona abakulu n'abakaire b'abantu ne bakuŋaanira mu kigango kya kabona asinga obukulu, eyayeteibwe Kayaafa; ⁴ ne bateeseza wamu Yesu okumukwatisya amagezi, bamwite. ⁵ Naye ne bakoba nti Tuleke okumukwatira ku lunaku olukulu, abantu baleke okukaayana. ⁶ Naye Yesu bwe yabbaire mu Bessaniya, mu nyumba ya Simooni omugenge, ⁷ omukali n'aiza gy'ali, eyabbaire n'ecupa ey'amafuta ag'omusita ag'omuwendo omungi einu, n'agamufuka ku mutwe, ng'atyaime alya. ⁸ Naye abayigirizwa bwe baboine, ne banyiiga ne bakoba nti Gafiirire ki gano? ⁹ Kubanga gano singa gatundiibwe gandiviiremu ebintu bingi, okuwa abaavu. ¹⁰ Naye Yesu bwe yategeire n'abakoba nti Munakuwalirya ki omukali? kubanga ankolere ekigambo ekisa. ¹¹ Kubanga abaavu ibo muli nabo buliijo; naye temuli nanze buliijo. ¹² Kubanga bw'afukire amafuta gano ku mubiri gwange, angiragire okunziika. ¹³ Mazima mbakoba nti Enjiri eno buli gy'eneebuulirwanga mu nsi gyonagyona, n'ekyo omukali ono ky'akolere kyatumulwangaku okumwijukira. ¹⁴ Awo omumu ku abo eikumi n'ababiri, eyayeteibwe Yuda Isukalyoti, n'ayaba eri bakabona abakulu, ¹⁵ n'akoba nti Mwikiriirye kumpa ki, nzena ndimuwaayo gye muli? Ne bamugerera ebitundu bya feeza asatu. ¹⁶ N'asookera awo okusagira eibbanga bweyamuwaayo. ¹⁷ Naye ku lunaku olusookerwaku olw'emigaati egitazimbulukuswa, abayigirizwa ne baiza eri Yesu, ne bakoba nti Otaka tuteekereteekere waina Okubitaku gy'ewqkuliira? ¹⁸ N'akoba nti Mwabe mu kibuga ewa gundi, mumukobe nti Omuyigiriza akobere nti Ekiseera kyange kirimumpi okutuuka; ewuwo gye naaliira Okubitaku n'abayigirizwa bange. ¹⁹ Abayigirizwa ne bakola nga Yesu bw'abalagiire; ne bateekateeka Okubitaku. ²⁰ Awo obwire bwe bwawungeire, n'atyama okulya n'abayigirizwa eikumi n'ababiri; ²¹ era babbaire balya; n'akoba nti Mazima mbakoba nti omumu ku imwe yandyamu olukwe. ²² Ne banakuwala inu, ne batandiika mumu ku mumu okumukoba nti Mukama wange, niiye nze? ²³ Yeena n'airamu n'akoba nti Oyo akozerye awamu nanze mu kibya, niiye eyandyamu olukwe. ²⁴ Omwana w'omuntu ayaba, nga bwe yawandiikiirwe: naye gisangire omuntu oyo eyandyamu olukwe Omwana w'omuntu! kyandibbaire kisa eri oyo singa teyazaalibwe omuntu oyo. ²⁵ Yuda, eyamuliiremu olukwe, n'airamu n'akiba nti Labbi, niiye nze? N'amukoba nti Iwe otumwire. ²⁶ Era babbaire bakaali balya, Yesu n'atoola omugaati, ne yeebalya, n'agumenyamu; n'awa abayigirizwa, n'akoba nti Mutoole, mulye; guno niigwo mubiri gwange. ²⁷ N'atoola ekikompe, ne yeebalya, n'abawa, ng'akoba nti Munywe ku kino mwenamwena; ²⁸ kubanga kino niigwo musaayi gwange ogw'endagaanu, oguyiika ku lw'abangi olw'okutoolawo ebibbiibi. ²⁹ Naye mbakoba nti Tindinywa n'akatono okusooka atyanu ku guno ogubala ku muzabbibu, okutuusya ku lunaku ludi lwe ndigunywa omuyaaka awamu naimwe mu bwakabaka bwa Itawange. ³⁰ Bwe baamalire okwemba ne bafuluma okwaba ku lusozi olwa Zeyituuni. ³¹ Awo Yesu n'abakoba nti Imwe mwenamwena mwesitala ku lwange obwire buno: kubanga kyawandiikibwe nti Ndikubba omusumba, n'entama egy'omu kisibo girisaansaanyizibwa. ³² Naye bwe ndimala okuzuukizibwa, ndibatangira okwaba e Galiraaya. ³³ Naye Peetero n'airamu n'amukoba nti Bonabona bwe besitala ku lulwo, nze tinesitale n'akatono. ³⁴ Yesu n'amukoba nti Mazima nkukoba nti Mu bwire buno, enkoko yabba ekaali kukokolyoka, wanegaana emirundi isatu. ³⁵ Peetero n'amugamba nti waire nga kiŋwanira okufiira awamu naiwe, tinakwegaane n'akatono. N'abayigirizwa bonabona ne batumula batyo. ³⁶ Awo Yesu n'atuuka nabo mu kifo ekyetibwa Gesusemane, n'akoba abayigirizwa be nti Mutyame wano, njabe edi nsabe. ³⁷ N'atwala Peetero n'abaana ba Zebbedaayo bombiri, n'atandika okunakuwala n'okweraliikirira einu. ³⁸ Awo n'abakoba nti Omwoyo gwange guliku enaku nyingi, zigenda kungita : mubbe wano, mumoge nanze. ³⁹ N'atambulaku katono, n'avuunama, n'asaba, n'akoba nti Ai Itawange, ekikompe kino kinveeku, oba kisoboka: naye ti nga nze bwe ntaka wabula nga Iwe bw’otaka. ⁴⁰ Naira eri abayigirizwa, n'abasanga nga bagonere, n'akoba Peetero nti Koizi temusoboire kumoga nanze n'esaawa eimu? ⁴¹ Mumoge musabe, muleke okuyingira mu kukemebwa: omwoyo niigwo gutaka naye omubiri niigwo munafu. ⁴² Ate n'ayaba omulundi ogw'okubiri, n'asaba, ng'akoba nti Ai Itawange, oba nga kino tekisobola kunvaaku, wabula nze okukinywa, ky'otaka kikolebwe. ⁴³ N'aiza ate n'abasanga nga bagonere, kubanga amaiso gaabwe gabbaire gakambaaga. ⁴⁴ N'abaleka ate, n'ayaba, n'asaba omulundi ogw'okusatu, n'atumula ate ebigambo bimu ne bidi. ⁴⁵ Awo n'aiza eri abayigirizwa, n'abakoba nti Mugonere dala atyanu, muwumule: bona, ekiseera kiri kimpi okutuuka, n'Omwana w'omuntu aweweibweyo mu mikono gy'abalina ebibbiibi. ⁴⁶ Muyimuke twabe: bona, andyamu olukwe alikumpi okutuuka. ⁴⁷ Yabbaire akaali atumula, bona, Yuda, omumu ku ikumi n'ababiri, n'aiza, ng'alina ebibiina bingi ebirina ebitala n'emiigo, nga bava eri bakabona abakulu n'abakaire b'abantu. ⁴⁸ Naye oyo amulyamu olukwe yabawaire akabonero, ng'akoba nti Gwe naanywegera, nga niiye oyo: mumukwate. ⁴⁹ Amangu ago n'aiza awali Yesu, n'akoba nti Mirembe, Labbi; n'amunywegera inu. ⁵⁰ Yesu n'amukoba nti Munange, kola ky'oiziriire. Awo ne baiza, Yesu ne bamuteekaku emikono, ne bamukwata. ⁵¹ bona, omumu ku abo ababbaire no Yesu, n'agolola omukono, n'asowola ekitala kye, n'atema omwidu wa kabona asinga obukulu, n'amusalaku okitu. ⁵² Awo Yesu n'amukoba nti Ekitala kyo kiirye mu kifo kyakyo: kubanga abo bonabona abakwata ekitala balifa kitala. ⁵³ Oba olowooza nti tinsobola kwegayirira Itawange, yeena n'ampeererya atyanu bamalayika okusinga liigyoni eikumi n'eibiri? ⁵⁴ Kale byatuukirira bitya ebyawandiikiibwe nti kigwanira okubba bityo? ⁵⁵ Mu kiseera ekyo Yesu n'akoba ebibiina nti Muli ng'abaizirire omunyagi n'ebitala n'emiigo okunkwata? Natyamanga buli lunaku mu yeekaalu nga njegeresya, ne mutankwata. ⁵⁶ Naye kino kyonakyona kitukire, banabbi bye baawandiikire era bituukirizibwe. Awo abayigirizwa bonabona ne bamwabulira, ne bairuka. ⁵⁷ Ne badi abaakwaite Yesu, ne bamutwala ewa Kayaafa kabona asinga obukulu, abawandiiki n'abakaire gye baakuŋaaniire. ⁵⁸ Naye Peetero n'amuvaaku enyuma wala, okutuuka mu kigangu kya kabona asinga obukulu, n'ayingira mukati, n'atyama n'abaweereza, abone we byaikira. ⁵⁹ Naye bakabona abakulu n'ab'omu lukiiko bonabona ne basagira obujulirwa obw'obubeeyi ku Yesu, kaisi bamwite; ⁶⁰ ne batabubona, waire ng'abajulizi ab'obubbeyi bangi abaizire. Naye oluvannyuma ne baiza babiri, ⁶¹ ne bakoba nti Ono yakobere nti Nsobola okumenya yeekaalu ya Katonda, n'okugizimbira enaku isatu. ⁶² Kabona asinga obukulu n'ayemerera, n'amukoba nti Toiramu n'akatono? kigambo ki bano kye bakulumirirya? ⁶³ Naye Yesu n'asirika. Kabona asinga obukulu n'amukoba nti Nkulayirya Katonda omulamu, tukobere oba nga niiwe Kristo, Omwana wa Katonda. ⁶⁴ Yesu n'amukoba nti Otumwire: naye mbakoba nti Okusooka atyanu mulibona Omwana w'omuntu ng'atyaime ku mukono omuliiro ogw'amaani, ng'aizira ku bireri eby'eigulu. ⁶⁵ Awo kabona asinga obukulu n'akanula ebivaalo bye, n'akoba nti Avoire Katonda: tutakira ki ate abajulirwa? bona, muwuliire atyanu obuvooli bwe: ⁶⁶ mulowooza mutya? Ne bairamu ne bakoba nti Agwaniire kufa. ⁶⁷ Awo ne bamufujira amatanta mu maiso ge, ne bamukubba ebikonde: abandi ne bamukubba empi ⁶⁸ nga bakoba nti Tulagule Kristo: yani akukubbire? ⁶⁹ Naye Peetero yabbaire atyaime wanza mu kigangu: omuwala n'aiza gy'ali, n'akoba nti Weena wabbaire wamu no Yesu Omugaliraaya. ⁷⁰ Naye ne yeegaanira mu maiso ga bonabona ng'akoba nti Ky'okoba tinkimaite. ⁷¹ Naye bwe yafulumire okutuuka mu kisasi, omuwala ogondi n'amubona n'akoba abantu abbaire awo nti N'ono yabbaire wamu no Yesu Omunazaaleesi. ⁷² Ne yeegaana ate, n'alayira nti Omuntu oyo timumaite. ⁷³ Ne wabitawo eibba nga itono, ababbaire bemereire awo ne baiza ne bakoba Peetero nti Mazima weena oli mwinaabwe; kubanga entumula yo ekutegeezerye. ⁷⁴ Awo n'amoga okukolima n'okulayira nti Omuntu oyo timumaite. Amangu ago enkoko n'ekolyooka. ⁷⁵ Peetero n'aijukira ekigambo Yesu kye yakobere nti Enkoko yabba ekaali okukolyooka waneegaanira emirundi isatu. N'afuluma ewanza, n'akunga inu amaliga.