¹ Naye obwire bwe bwakyeire bakabona abakulu bonabona n'a bakaire b'abantu ne bateesya wamu ebya Yesu okumwita: ² ne bamusiba, ne bamutwala, ne bamuwaayo eri Piraato ow'eisaza. ³ Awo Yuda, eyamuliiremu olukwe, bwe yaboine ng'omusango gumusingire, ne yejusa, n'airirya bakabona abakulu n'abakadde ebitundu ebyo asatu ebya feeza ⁴ ng'akoba nti Nayonoonere okulyamu olukwe omusaayi ogwabula kabbiibi. Naye ibo ne bamukoba nti Guno guli ku niife? musango gwo. ⁵ Efeeza n'agisuula mu yeekaalu n'afuluma, n'ayaba neyeetuga. ⁶ Naye bakabona abakulu ne batwala ebitundu bidi ebya feeza, ne bakoba nti Kyo muzizo okubiteeka mu igwanika lya Katonda, kubanga muwendo gwo musaayi. ⁷ Ne bateesya, ne bagigulamu olusuku lw’omubbumbi, okuziikangamu abagenni. ⁸ Olusuku ludi kyeruva luyitebwa olusuku lw'omusaayi, ne atyanu. ⁹ Awo lwe kyatuukiriIre ekyatumuliirwe mu nabbi Yeremiya, ng'akoba nti Ne batwala ebitundu ebya feeza asatu, omuwendo gw'oyo gwe baalamwiire omuwendo, abantu ku baana ba Isiraeri gwe baalamwiire; ¹⁰ ne babitoolamu olusuku lw'omubbumbi, nga Mukama bwe yandagiire. ¹¹ Awo Yesu n'ayemerera mu maiso g'ow'eisaza: ow'eisaza n'amubuulya ng'akoba nti Niiwe Kabaka w'Abayudaaya? Yesu n'amukoba nti Otumwire. ¹² Bakabona abakulu n'abakaire bwe baamuloopere, n'atairamu n'akatono. ¹³ Awo Piraato n'amukoba nti Towulira bigambo bino bye bakulumirirya bwe biri? ¹⁴ Naye teyairiremu ne kigambo ne kimu: ow'eisaza n'okwewuunya ne yeewuunya inu. ¹⁵ Naye ku mbaga ow'eisaza yabbaire n'empisa okusumululiranga ekibiina omusibe mumu, gwe batakanga. ¹⁶ Era mu biseera ebyo babbaire n'omusibe omumanyi, ayetebwa Balaba. ¹⁷ Awo bwe baakuŋaanire, Piraato n'abakoba nti Aluwa gwe mutaka mubasuwundulire? Balaba, oba Yesu ayetebwa Kristo? ¹⁸ Kubanga yamanyire nga bamuweeseryaayo iyali. ¹⁹ Naye bwe yatyaime ku ntebe ey'emisango, mukaali we n'amutumira, ng'akoba nti Omuntu oyo omutuukirivu tomukola kintu n'akatono: kubanga nalumiirwe atyanu bingi mu kirooto ku lulwe. ²⁰ Naye bakabona abakulu n'abakaire ne babuulirira ebibiina okusaba Balaba, bazikirizye Yesu. ²¹ Naye ow'eisaza n'airamu n'abakoba nti Ku abo bombiri aliwa gwe mutaka mubasuwundulire? Ne bakoba nti Balaba. ²² Piraato n'abakoba nti Kale naakola ntya Yesu ayetebwa Kristo? Bonabona ne bakoba nti Akomererwe. ²³ Yeena n'akoba nti Lwaki? ekibbiibi ky'akolere kiruwa? Naye ne bakaayana inu, ne bakoba nti Akonererwe. ²⁴ Naye Piraato bwe yaboine nga taasobole n'akatono, era nga bayingire okukaayana, n'akwata amaizi,n'anaaba mu ngalo mu maiso g'ekibiina ng'akoba nti Nze mbulaku kabbiibi olw'omusaayi gw'omuntu ono omutuukirivu: musango gwanyu. ²⁵ Abantu bonabona ne bairamu ne Bakoba nti Omusaayi gwe gubbe ku niife, no ku baana baisu. ²⁶ Awo n'abasuwundulira Balaba : naye Yesu n'amukubba enkoba kaisi amuwaayo okukomererwa. ²⁷ Awo basirikale b'ow'eisaza ne batwala Yesu mu kigango eky'emisango, ne bamukuŋaanyiziryeku ekitongole kyonakyoa. ²⁸ Ne bamwambula, ne bamuvaalisya olugoye olumyufu. ²⁹ Ne baluka engule ey'amawa, ne bagiteeka ku mutwe gwe, n'olugada mu mukono gwe omuliiro; ne bafukamira mu maiso ge, ne bamuduulira, nga bakoba nti Mirembe, Kabaka w'Abayudaaya! ³⁰ Ne bamufujiira amatanta, ne batoola olugada ludi ne bamukubba mu mutwe. ³¹ Awo bwe baamalire okumuduulira, ne bamwambulaku olugoye, ne bamuvaalisya ebivaalo bye, ne bamutwala okumukomerera. ³² Naye bwe babbaire bafuluma, ne basisinkana omumu Omukuleene, eriina lye Simooni: ne bamuwalirizia oyo yeetikke omusalaba gwe. ³³ Bwe baatuukire mu kifo ekyetebwa Gologoosa, amakulu gaakyo kifo kya kiwanga, ³⁴ ne bamuwa omwenge okunywa ogutabwirwemu omususa: naye bwe yalegereku, n'atataka kunywa. ³⁵ Bwe baamalire okumukomerera, ne bagabana ebivaalo bye, nga bakubba akalulu; ³⁶ ne batyama awo ne bamulingirira. ³⁷ Ne bateeka waigulu ku mutwe gwe omusango gwe oguwandiikiibwe nti ONO NIIYE YESU KABAKA W'ABAYUDAAYA. ³⁸ Awo abanyagi babiri ne bakomererwa naye, omumu ku mukono omuliiro, ogondi ku mukono omugooda . ³⁹ N'ababbaire babita ne bamuvuma, nga basisikya emitwe gyabwe, ⁴⁰ nga bakoba nti Niiwe amenya yeekaalu, agizimbira enaku eisatu, weerokole: oba nga oli Mwana wa Katonda, va ku musalaba oike. ⁴¹ Bakabona abakulu n'abawandiiki n'abakaire ne baduula batyo, nga bakoba nti ⁴² Yalokoire bandi; tasobola kwerokola yenka. Niiye Kabaka wa Isiraeri; ave atyanu ku musalaba, feena twamwikirirya. ⁴³ Yeesiga Katonda; amulokole atyanu, oba amutaka: kubanga yakobere nti Ndi Mwana wa Katonda. ⁴⁴ Abanyagi abaakomereirwe naye era boona ne bamuvuma batyo. ⁴⁵ Naye okuva ku saawa ey'omukaaga yabbaire ndikirirya ku nsi yonayona okutuuka ku ssaawa ey'omwenda. ⁴⁶ Obwire bwe bwatuukire ng'essaawa ey'omwenda Yesu n'atumulira waigulu n'eidoboozi inene, ng'akoba nti Eri, Eri, lama sabakusaani? amakulu gaakyo nti Katonda wange, Katonda wange, kiki ekikundekeserye? ⁴⁷ Naye abandi ababbaire bemereirewo, bwe baawuliire, ne bakoba nti Ono ayeta Eriya. ⁴⁸ Amangu ago mwinaabwe omumu n'airuka, n'atoola ekisuumwa, n'akizulya omwenge omukaatuuki, n'akiteeka ku lugada, n'amunywisya. ⁴⁹ Naye abandi ne bakoba nti Leka tubone nga Eriya yaiza okumulokola. ⁵⁰ Naye Yesu n'atumulira ate waigulu n'eidoboozi inene, n'alekula omwoyo gwe. ⁵¹ Bona, eigigi lya yeekaalu ne rikanukamu wabiri okuva waigulu okutuuka wansi; ensi n'ekankana; enjazi ne gyatika: ⁵² entaana ne gibikuka; emirambo mingi egy'abatukuvu ababbaire bagonere ne gizuukizibwa; ⁵³ ne bava mu ntaana bwe yamalire okuzuukira, ne bayingira mu kibuga ekitukuvu, bangi ne bababona. ⁵⁴ Naye omwami w'ekitongole, na badi ababbaire naye nga balingirira Yesu, bwe baboine ekikankanu, n'ebigambo ebibbairewo, ne batya inu, ne bakoba nti Mazima ono abbaire Mwana wa Katonda. ⁵⁵ Wabbairewo n'abakazi bangi abayemereire ewala nga balengera, abaabitanga no Yesu okuva e Galiraaya, abaamuweerezanga: ⁵⁶ mu abo mwabbairemu Malyamu Magudaleene, no Malyamu maye wa Yakobo ne Yose, no maye w'abaana ba Zebbedaayo. ⁵⁷ Naye obwire bwabbaire buwungeera, n'aiza omuntu omugaiga, eyaviire Alimasaya, eriina lye Yusufu, era yeena yabbaire muyigirizwa wa Yesu: ⁵⁸ oyo n'ayaba eri Piraato, n'asaba omulambo gwa Yesu. Awo Piraato n'alagira okugumuwa. ⁵⁹ Yusufu n'atwala omulambo, n'aguzinga mu bafuta enjeru, ⁶⁰ n'aguteeka mu ntaana ye enjaaka, gye yasimire mu lwazi: n'ayiringisya eibbaale einene n'aliteeka ku mulyango gw'entaana, n'ayaba. ⁶¹ Wabbairewo Malyamu Magudaleene, no Malyamu ow'okubiri, nga batyaime mu maiso g'entaana. ⁶² Naye amakeeri, niilwo lunaku olwaiririire olw'Okuteekateeka, bakabona abakulu n'Abafalisaayo ne bakuŋaanira ewa Piraato, ⁶³ ne bakoba nti Omwami, twijukiire omubbeyi oyo eyagamba ng'akaali mulamu nti Enaku bwe giribitawo eisatu ndizuukira. ⁶⁴ Kale lagira bakuumire dala amalaalo okutuusya ku lunaku olw'okusatu, abayigirizwa be batera okwiza okumwibba, bakobe abantu nti Azuukiire mu bafu: era okukyama okw'oluvanyuma kulisinga kuli okwasookere. ⁶⁵ Piraato n'abakoba nti Mulina abakuumi: mwabe, mugakuumire dala nga bwe muyinza. ⁶⁶ Boina ne baaba, ne bagakuumira dala amalaalo, eibbaale ne baliteekaku akabonero, n'abakuumi nga baliwo.