¹ Mu biseera ebyo obwakabaka obw'omu igulu bulifaananyizibwa abawala eikumi, abaatwaire etabaaza gyabwe, ne baaba okusisinkana eyakwa omugole. ² Naye bainaabwe abataanu babbaire basirusiru, n'abataanu niibo babbaire n'amagezi. ³ Kubanga abasirusiru, bwe baatwaire etabaaza zaabwe, ne bateetwalira mafuta: ⁴ naye abalina amagezi ne batwala amafuta mu macupa gyabwe wamu n'etabaaza guabwe. ⁵ Naye eyakwa omugole bwe yalwireyo, bonabona ne bawongera ne bagona. ⁶ Naye obwire mu itumbi ne wabba oluyoogaanu nti bona, eyakwa omugole aiza! Mufulume okumusisinkana. ⁷ Abawala badi bonabona ne kaisi n'ebagolokoka, ne balongoosya etabaaza gyabwe. ⁸ Abasirusiru ne bakoba abalina amagezi nti Mutuwe ku mafuta gangyu; kubanga etabaaza gyaisu giweerera. ⁹ Naye abaalina amagezi ne bairamu, ne bakoba nti koizi tegaatumale fenafena naimwe: waakiri mwabe eri abatunda, mwegulire. ¹⁰ Bwe babbaire baaba okugula, eyakwa omugole n'aiza: n'abo ababbaire beeteekereteekere ne bayingira naye mu mbaga ey'obugole: olwigi ne lwigalwawo. ¹¹ Oluvannyuma abawala badi abandi boona ne baiza, ne bakoba nti Mukama waisu, mukama waisu, twigulirewo. ¹² Naye n'airamu n'akoba Mazima mbakoba nti timbamaite: ¹³ Kale mumoge, kubanga temumanyi lunaku waire ekiseera. ¹⁴ Kubanga buli ng'omuntu eyabbaire ayaba okutambula mu nsi egendi, n'ayeta abaidu be, n'abalekera ebintu bye. ¹⁵ N'awa omumu etalanta itaanu, ogondi ibiri, ogondi imu; buli muntu ng'obuyinza bwe bwe bwabbaire; n'ayaba, ¹⁶ Amangu ago odi eyaweweibwe etalanta eitaanu n'ayaba n'agisuubuzisia n'aviisiamu etalanta itaanu egindi. ¹⁷ Atyo n'odi eyaweweibwe etalanta eibiri n'aviisiamu ibiri egindi. ¹⁸ Naye odi eyaweweibwe eimu n'ayaba n'asima mu itakali, n'agisa efeeza ya mukama we. ¹⁹ Awo ebiseera bingi bwe byabitire, mukama w'abaidu bali n'ajja, n'abala nabo omuwendo. ²⁰ N'odi eyaweeibwe etalanta eitaano n'aiza n'aleeta etalanta itaano egindi, n'akoba nti Mukama wange, wandekeire etalanta itaano: bona, naviisiryemu etalanta itaanu egindi. ²¹ Mukama we n'amukoba nti Weebale, oli muddu musa mwesigwa: wabbaire mwesigwa mu bitono, ndikusigira ebingi: yingira mu isanyu lya mukama wo. ²² N'odi eyaweibwe etalanta eibiri n'aiza n'akoba nti Mukama wange, wandekeire etalanta ibiri: bona, naviisiryemu etalanta ibiri egindi. ²³ Mukama we n'amukoba nti Weebale, oli mwidu musa mwesigwa; wabbaire mwesigwa mu bitono, ndikusigira ebingi: yingira mu isanyu lya mukama wo. ²⁴ N'odi eyawewebwe etalanta eimu n'aiza n'akoba nti Mukama wange, nakumanyire ng'oli muntu mukakanyali ng'okungulira gy’otaasigiire, ng'okuŋaanyirya gy’otaayiyiirire: ²⁵ ne ntya, ne njaba, ne ngigisa mu itaka etalanta yo: bona, eyiyo oli nayo. ²⁶ Naye mukama we n'airamu n'amukoba nti Oli mwidu mubbiibi mugayaavu, wamanyire nti nkungulira gye ntasigiire, nkuŋaanyirya gye ntayiiriire; ²⁷ kale kyakugwaniire okugiwa abasuubuzi efeeza yange, nzeena bwe nandizire nandiweweibwe eyange n'amagoba gaamu. ²⁸ Kale mumutooleku etalanta, mugiwe odi alina etalanta eikumi. ²⁹ Kubanga buli muntu alina aliweebwa, era alibba na bingi: naye abula, alitoolebwaku na kidi ky'ali nakyo. ³⁰ N'omwidu oyo abulaku ky'agasa mumusuule mu ndikirirya ey'ewanza: niimwo mulibba okukunga n'okuluma ensaya. ³¹ Naye Omwana w'omuntu bw'aliizira mu kitiibwa kye, na bamalayika bonabona nga bali naye, awo bw'alityama ku ntebe ey'ekitiibwa kye: ³² n'amawanga gonagona galikuŋaanyizibwa mu maiso ge; naye alibawulamu ng'omusumba bw'ayawulamu entama n'embuli: ³³ entama aligiteeka ku mukono gwe omuliiro, naye embuli ku mukono omugooda. ³⁴ Awo Kabaka alikoba abali ku mukono gwe omuliiro nti Mwize, imwe Itawange be yawaire omukisa, musikire obwakabaka obwabateekeirweteekeirwe okuva ku kutonda ensi: ³⁵ kubanga nabbaire njala ne mumpa ekyokulya: nabbaire enyonta ne munywesya: nabbaire mugenyi ne mungonia; ³⁶ nabbaire bwereere ne munvaalya: nabbaire mulwairwe ne munambula: nabbaire mu nvuba, ne mwiza mumbona. ³⁷ Awo abatuukirivu balimwiramu nga bakoba nti Mukama waisu, twakuboine di ng'olina enjala ne tukuliisia? oba ng'olina enyonta ne tukunywisya? ³⁸ Era twakuboine di ng'oli mugeni ne tukugonia? oba ng'oli bwereere ne tukuvaalisia? ³⁹ Era twakuboine di ng'oli mulwaire, oba mu nvuba, ne twiza tukubona? ⁴⁰ No Kabaka aliramu alibakoba nti Mazima mbakoba nti Nga bwe mwakokere omumu ku abo bagande bange abasinga obutotobuto, mwakikolere ninze. ⁴¹ Awo libakoba boona abali ku mukono gwe omugooda nti Muveewo we ndi, imwe abaakolimiurwe, mwabe mu musyo ogutawaawo ogwateekeirweteekeirwe Setaani na bamalayika be: ⁴² kubanga nabbaire enjala, temwampaire kyokulya: nabbaire enyonta, temwanywisirye: ⁴³ nabbaire mugeni, temwangonerye: nabbaire bweeere, temwanvalisirye: mullwaire, no mu nvuba, temwanambwire. ⁴⁴ Awo boona baliiramu, nga bakoba nti Mukama waisu, twakuboine di ng'olina enjala, oba ng'olina enyonta, oba mugeni, oba bweeere, oba mulwaire, oba mu nvuba, ne tutakuweererya? ⁴⁵ Awo alibaramu, ng'agamba nti Mazima nbagamba nti Nga bwe mutaakolere omumu ku abo abasinga obutotobuto, temwakikolere niinze. ⁴⁶ Ne bano balyaba mu kibonerezo ekitawaawo; naye abatuukirivu baligenda mu bulamu obutawaawo.