¹ Yesu n'afuluma mu yeekaalu; yabbaire ng'atambula, abayigirizwa be ne baiza okumulaga amazimba ga yeekaalu: ² Naye n'airamu n'abakoba nti Temubo bino byonabyona? mazima mbagamba nti Tewalisigala wano ebbaale eriri kungulu ku ibbaale eritalisuulibwa wansi. ³ Bwe yabbaire atyaime ku lusozi olwa Zeyituuni, abayigirizwa ne baiza gy'ali kyama, ne bakoba nti Tukobere bino we biribbeererawo n'akabonero ak'okwiza kwo bwe kalibba, n'ak'emirembe gino okuwaawo? ⁴ Yesu n'airamu n'abagamba nti Mubone omuntu yenayena tabakyamyanga. ⁵ Kubanga bangi abaliiza mu liina lyange, nga bakoba nti Niinze Kristo; balikyamya bangi. ⁶ Muliwulira entalo n'eitutumu ly'entalo: mubone temweraliikiriranga: kubanga tebirirema kubbaawo; naye enkomerero ng'ekaali. ⁷ Kubanga eigwanga liritabaala egwanga no kabaka alitabaala kabaka: walibbaawo enjala n'ebikankanu mu bifo ebitali bimu. ⁸ Naye ebyo byonabyona niilwo luberyeberye lw'okulumwa. ⁹ Lwe balibawaayo imwe mubonyebonyezebwe, balibaita: mweena mulikyayibwa amawanga gonagona okubalanga eriina lyange. ¹⁰ Mu biseera ebyo bangi abalyesitala, baliwaŋanayo, balikyawagana. ¹¹ Ne banabbi bangi ab'obubbeyi balijja, balikyamya bangi. ¹² Era kubanga obujeemu buliyinga obungi, okutaka kw'abasinga obungi kuliwola. ¹³ Naye agumiinkiriza okutuuka ku nkomerero, niiye alirokolebwa. ¹⁴ N'enjiri eno ey'obwakabaka eribuulirwa mu nsi gyonagyona, okubba omujulirwa mu mawanga gonagona; awo enkomerero kaisi neiza. ¹⁵ Kale bwe mulibona eky'omuzizo ekizikiririzia, Danyeri nabbi kye yatumwireku, nga kyemereire mu kifo ekitukuvu, (asomamu ategeere), ¹⁶ kale abali mu Buyudaaya bairukiranga ku nsozi: ¹⁷ ali waigulu ku nyumba taikanga kutoolamu bintu ebiri mu nyumba ye: ¹⁸ ali mu lusuku tairanga ate kutwala kivaalo kye. ¹⁹ Naye giribasanga abali ebida n'abayonkya mu naku egyo! ²⁰ Mweena musabe ekiruko kyanyu kireke okubba mu biseera eby'empewo, waire ku sabbiiti: ²¹ kubanga mu biseera ebyo waliba ekibonyoobonyo ekinene, nga tekibbangawo kasookeire ensi ebbaawo okutuusia atyanu, era tekiribbaawo ate. ²² Enaku egyo singa tegyasaliibweku, tewandirokokere buli alina omubiri: naye olw'abalonde enaku egyo girisalibwaku. ²³ Mu biseera ebyo omuntu bw'abakobanga nti bona, Kristo ali wano, oba nti Wano; temwikiriryanga. ²⁴ Kubanga waliiza bakristo ab'obubbeyi, ne banabbi ab'obubbeyi, boona balikola obubonero obukulu n'eby'amagero; n'okukyamya bakyamye n'abalonde, oba nga kisoboka. ²⁵ Bona, mbakobeire. ²⁶ Kale bwe mbakobanga nti Bona, ali mu idungu; temufulumanga: bona, ali mu bisenge mukati; temwikiriryanga. ²⁷ Kubanga ng'okumyansia bwe kuva ebuvaisana, ne kubonekera ebugwaisana; kutyo bwe kulibba okwiza kw'Omwana w'omuntu. ²⁸ Awabba omulambo wonawona, awo ensega we gikuŋaanira. ²⁹ Naye amangu ago, oluvanyuma lw'ekibonyoobonyo eky'omu naku egyo eisana erifuuka endikirirya, n'omwezi tegulyolesia musana gwagwo, n'emunyenye zirigwa okuva mu igulu, n'amaani ag'omu igulu galisiisiikibwa: ³⁰ awo lwe kaliboneka akabonero ak'Omwana w'omuntu mu igulu: n'ebika byonabyona eby'ensi lwe birikubba ebiwoobe, biribona Omwana w'omuntu ng'aiza ku bireri eby'eigulu n'amaani n'ekitiibwa ekinene. ³¹ Era alituma bamalayika be n'eidoboozi inene ery'eikondeere, boona balikuŋaanya abalonde be mu mpewo eina, okuva ku nkomerero y'eigulu n'okutuusia ku nkomerero yaalyo. ³² Era mwegere ku mutiini olugero lwagwo: eitabi lyagwo bwe rigeiza, amakoola ne gatojera, mutegeera ng'omwaka guli kumpi; ³³ mutyo mweena, bwe mulibona ebigambo ebyonabyona, mutegeere nti ali kumpi, ku lwigi. ³⁴ Mazima mbagamba nti Emirembe gino tegiriwaawo, okutuusia ebyo byonabyona lwe birikolebwa. ³⁵ Eigulu n'ensi biriwaawo, naye ebigambo byange tebiriweerawo dala. ³⁶ Naye eby'olunaku ludi n'ekiseera wabula abimaite, waire bamalayika ab'omu igulu, waire Omwana, wabula Itawange yenka. ³⁷ Naye ng'enaku gya Nuuwa bwe gyabbaire, bwe kutyo bwe kulibba okwiza kw'Omwana w'omuntu. ³⁸ Kuba nga bwe babbaire ku naku egyo egyasookere amataba nga balya nga banywa, nga bakwa nga babairya, okutuuka ku lunaku Nuuwa lwe yayingiire mu lyato, ³⁹ ne batamanya okutuusia amataba lwe gaizire, ne gabatwala bonabona; kutyo bwe kulibba okwiza kw'Omwana w'omuntu. ⁴⁰ Mu biseera ebyo abasaiza babiri balibba mu kyalo; omumu alitwalibwa, n'ogondi alirekebwa: ⁴¹ abakali babiri balibba nga basya ku lubengo; omumu alitwalibwa, n'ogondi alirekebwa. ⁴² Kale mumoge; kubanga temumaite lunaku bwe luli Mukama wanyu lw'aiziraku. ⁴³ Naye kino mukitegeere nti Alina enyumba ye singa yamaite ekisisimuko bwe kiri omubbiibi ky'eyaziiramu, yanditmogere, teyandirekere nyumba ye kusimibwa. ⁴⁴ Kale mweena mweteeketeeke: kubanga mu kiseera kye mutalowoozeryamu Omwana w'omuntu ky'aiziramu. ⁴⁵ Kale aluwa ate omwidu oyo omwesigwa ow'amagezi, mukama we gwe yasigira ab'omu nyumba ye, okubawanga emere yaabwe mu kiseera kyayo? ⁴⁶ Omuddu oyo alina omukisa, mukama we gw'alisanga ng'aizire ngakola atyo. ⁴⁷ Mazima mbakoba nti alimusigira ebintu bye byonabyona. ⁴⁸ Naye omwidu oyo omubbiibi bw'alikoba mu mumwoyo gwe nti Mukama wange alwire; ⁴⁹ era bw'alisooka okukubba baidu bainaye, kaisi n'okunywira awamu n'abatamiivu; ⁵⁰ mukama w'omwidu oyo aliizira ku lunaku lw'atalindiririramu, ne mu kiseera ky'atamaite, ⁵¹ alimutemamu ebitundu bibiri, alimuwa omugabo gwe wamu na bananfuusi: niimwo mulibba okukunga n'okuluma ensaya.