¹ Awo Yesu n'ayogera n'ebibiina n'abayigirizwa be, ² ng'akoba nti Abawandiiki n'Abafalisaayo batyaime ku ntebe ya Musa: ³ kale ebigambo byonabyona bye babakoba, mubikole mubikwate: naye temukola nga ibo bwe bakola; kubanga boogera naye tebakola. ⁴ Era basiba emigugu egizitowa egiteetikkika, bagitika abantu ku kibebega; naye ibo beene tebataka kugisisiikya n'engalo yaabwe. ⁵ Naye ebikolwa byabwe byonabyona babikola era abantu babibone, kubanga bagaziya fulakuteri gyabwe, era bongeraku amatanvuwa, ⁶ era bataka ebifo eby'omu maiso ku mbaga, n'entebe egy'ekitiibwa mu makuŋaaniro, ⁷ n'okusugiribwa mu butale, n'okuyitibwa abantu nti Labbi. ⁸ Naye imwe temwetebwanga Labbi: kubanga, Omwegeresya wanyu ali omumu, mweena mwenna muli bo luganda. ⁹ Era temwetanga muntu ku nsi itawanyu: kubanga Kitawanyu ali mumu, ali mu igulu. ¹⁰ So temwetebwanga balagirizi: kubanga omulagirizi wanyu ali mumu, niiye Kristo. ¹¹ Naye mu imwe abasinga obukulu yabbanga muweereza wanyu. ¹² Na buli eyegulumizyanga yaikakanyizibwanga; na buli eyeikakanyanga yagulumizibwanga. ¹³ Naye giribasanga imwe, Abawandiiki n'Abafalisaayo, bannanfuusi kubanga mugalira obwakabaka obw'omu gulu mu maiso g'abantu; kubanga imwe temuyingira, n'abo ababba bayingira temubaganya kuyingira. ¹⁴ Giribasanga mwe, Abawandiiki n'Abafalisaayo, bananfuusi Kubanga mulya enyumba gya banamwandu, era ne mwefuula abasaba einu: n'olwekyo mulibaaku omusango ogusinga obunene. ¹⁵ Ziribasanga imwe, Abawandiiki n'Abafalisaayo, bananfuusi kubanga mwetooloola mu nyanza no ku itale okukyusa omuntu omumu naye bw'aboneka, mumufuula mwana we Geyeena emirundi ibiri okusinga imwe. ¹⁶ Giribasanga mwe, abasaale abazibe b'amaiso, abakoba nti Buli anaalayiranga yeekaalu, nga ti kintu; naye buli eyalayiranga ezaabu ey'omu yeekaalu, ng'akolere omusango. ¹⁷ Imwe abasiru era abazibe b'amaiso; kubanga ekikira obukulu kiruwa, ezaabu, oba yeekaalu etukuza ezaabu? ¹⁸ Oba mugamba nti Omuntu bweyalayiranga ekyoto, nga ti kintu; naye buli eyalayiranga ekitone ekiriku, ng'akolere omusango. ¹⁹ Imwe abazibe b'amaiso: kubanga ekisinga obukulu kiruwa, ekitone, oba ekyoto ekitukuzya ekitone? ²⁰ Naye alayira ekyoto, alayira ikyo, ne byonabyona ebiriku. ²¹ Naye alayira yeekaalu alayira iyo, n'oyo atyama omwo. ²² Naye alayira eigulu, alayira ntebe ya Katonda, n'oyo agityamaku. ²³ Giribasanga imwe, Abawandiiki n'Abafalisaayo, bananfuusi! kubanga muwa ekitundu eky'eikumi ekya nabugira no aneta no kumino, ne mulekayo ebigambo ebikulu eby'amateeka, obutalyanga nsonga, n'ekisa, n'okwikirizanga: naye bino byabagwaniire okubikola, era ne bidi obutabirekayo. ²⁴ Imwe abasaale abazibe b'amaiso abasengeja ensiri, ne mumira eŋamira. ²⁵ Giribasanga imwe, Abawandiiki n'Abafalisaayo, bananfuusi! kubanga munaabua kungulu ku kikompe n'ekibya, naye mukati mwizwire obunyagi n'obuteegenderezya. ²⁶ Iwe Omufalisaayo omuzibe w'amaiso, sooka onabye mukati mu kikompe n’ekibya, no kungulu kwakyo kaisi kubbe kusa ²⁷ Giribasanga imwe, Abawandiiki n'Abafalisaayo, bananfuusi kubanga mufaanana amalaalo agasiigibwa okutukula, agaboneka kungulu nga gawoomere, naye mukati mwizwire amagumba g'abafu, n'empitambibbi yonayona. ²⁸ Mutyo mweena kungulu muboneka mu bantu nga muli batuukirivu, naye mukati mwizwire obunanfuusi n'obujeemu. ²⁹ Giribasanga imwe, Abawandiiki n'Abafalisaayo, bananfuusi! kubanga muzimba amalaalo ga banabbi, muwoomya ebigya by'abatuukirvu, ³⁰ ne mukoba nti Singa twabbairewo mu biseera bya Bazeiza baisu tetwandikiriirye kimu nabo mu musaayi gwa banabbi. ³¹ Mutyo mwetegeezya mwenka nti muli baana baabwe abaita banabbi. ³² Kale mwizulye ekigera kya Bazeiza. ³³ Imwe emisota, abaana b'embalasaasa, muliruka mutya omusango ogwa Geyeena? ³⁴ Bona, kyenva mbatumira banabbi, n'ab'amagezi, n'abawandiiki: n'abamu ku ibo mulibaita mulibakomerera; n'abandi mulibakubba emiigo mu makuŋaaniro ganyu mulibayiganya mu byalo byonabyona: ³⁵ kaisi mwizirwe omusaayi gwonagwona omutuukirivu ogwayiikire ku nsi, okusookera ku musaayi gwa Abiri oyo omutuukirivu okutuusya ku musaayi gwa Zaakaliya omwana wa Balakiya, gwe mwaitiire wakati we yeekaalu n'ekyoto. ³⁶ Mazima mbakoba nti Ebigambo bino byonabyona birituukirira ab'emirembe gino. ³⁷ Yerusaalemi, Yerusaalemi, aita banabbi, akasuukirira amabbaale abantu abatumibwa gy'ali! emirundi imeka gye natakiire dala okukuŋaanya abaana bo, ng'enkoko bw'ekuŋaanya obwana bwayo mukati w'ebiwawa byayo, ne mutataka! ³⁸ Bona, enyumba yanyu ebalekeirwe kifulukwa. ³⁹ Kubanga mbakoba nti Temulimbonaku n'akatono okusooka Atyanu, okutuusia lwe mulitumula nti Aweweibwe omukisa aiza mu liina lya Mukama.