¹ Yesu n'airamu n'atumula nabo ate mu ngero, ng'akoba nti ² Obwakabaka obw'omu igulu bufaananyizibwa omuntu eyabbaire kabaka, eyamufumbiire omwana we embaga ey'obugole, ³ n'atuma abaidu be okweta abaayeteirwe embaga ey'obugole: ne batataka kwiza. ⁴ N'atuma ate abaidu abandi, ng'akoba nti Mukobere abantu abaayetebwe nti Bona, nfumbire embaga yange; ente gyange n'eza sava gitiitiibwe, ne byonabyona byeteekereteekere: mwize ku mbaga ey'obugole. ⁵ Naye ibo ne batateekayo mwoyo ne baaba, ogondi mu kyalo kye, ogondi mu buguli bwe: ⁶ abaasigairewo ne bakwata abaidu be, ne babakolera ekyeju, ne babaita. ⁷ Kabaka n'akwatibwa obusungu; n'agaba eigye lye, n'azikirirya abaiti abo, n'ayokya ekibuga kyabwe. ⁸ Awo n'agamba abaidu be nti Obugole bweteekereteekere, naye abo abaayitiibwe tebasaaniire. ⁹ Kale mwabe mu masaŋangira g'enguudo, bonabona be mwabonayo mubeete ku mbaga ey'obugole: ¹⁰ Abaidu badi ne baaba mu nguudo, ne bakuŋaanya bonabona be baboine, ababbiibi n'abasa: obugole ne bwizula abageni. ¹¹ Naye kabaka bwe yayingiire okulaba abageni, n'abonamu omuntu atavaire kivaalo kyo bugole: ¹² n'amukoba nti Munange, oyingiire otya wano nga obula kivaalo kyobugole? n'abunira. ¹³ Awo kabaka n'akoba abaweereza be nti Mumusibe emikono n'amagulu, mumusuule mu ndikirirya eky'ewanza; niimwo mulibba okukunga n'okuluma ensaya. ¹⁴ Kubanga bangi abayeteibwe, naye abalondemu batono. ¹⁵ Awo Abafalisaayo ne baaba, ne bateesya wamu bwe bamutega mu bigambo. ¹⁶ Ne bamutumira abayigirizwa baabwe, wamu n'Abakerodiyaani, ne bakoba nti Omwegeresya, tumaite ng'oli wa mazima, era ng'oyegeresya mu mazima engira ya Katonda, so ebigambo by'omuntu yenayena tobiteekaku mwoyo: kubanga tososola mu bantu. ¹⁷ Kale tukobere, olowooza otya? Kisa okuwa Kayisaali omusolo, oba ti niiwo awo? ¹⁸ Naye Yesu n'ategeera Obubbiibi bwabwe, n'akoa nti Munkemera ki, imwe bannanfuusi? ¹⁹ Mundage efeeza ey'omusolo. Ne bamuleetera edinaali. ²⁰ N'abakoba nti Ekifaananyi kino n'obuwandiikeku by'ani? ²¹ Ne bamukoba nti Bya Kayisaali. Awo n'abakoba nti Kale musasule Kayisaali ebya Kayisaali; no Katonda ebya Katonda. ²² Bwe baawuliire, ne beewuunya, ne bamuleka, ne baaba. ²³ Ku lunaku olwo ne baiza gy'ali Abasadukaayo, abakoba nti wabula kuzuukira: ne bamubuulya, ²⁴ nga bakoba nti Omwegeresya, Musa yakobere nti Omuntu bw'afanga, nga abula baana, omugande airengawo akwe omukali we, azaalire omugande eizaire. ²⁵ Awo ewaisu yabbaireyo ab'oluganda musanvu: ow'oluberyeberye n'akwa n'afa, naye nga bw'abula eizaire n'alekera omugande omukali we; ²⁶ atyo n'ow'okubiri, n'ow'okusatu, okutuusya bonabona omusanvu. ²⁷ Oluvanyuma, bonabona nga baweirewo, omukali n'afa. ²⁸ Kale mu kuzuukira alibba mukali waani ku abo omusanvu? kubanga bonabona baabunire okumukwa. ²⁹ Naye Yesu n'airamu n'abakoba nti Mukyama olw'obutamanya ebyawandiikiibwe, waire amaani ga Katonda. ³⁰ Kubanga mu kuzuukira tebakwa, so tebafumbirwa, naye bali oti bamalayika mu igulu. ³¹ Naye eby'okuzuukira kw'abafu, temwasomere Katonda kye yabakobere nti ³² Nze ndi Katonda wa Ibulaimu, era Katonda wa Isaaka, era Katonda wa Yakobo? Si Katonda wa bafu, naye wa balamu. ³³ Ebibiina bwe byawuliire ne byewuunya okwegeresya kwe. ³⁴ Naye Abafalisaayo bwe baawuliire nti asirikirye Abasadukaayo, ne bakuŋaanira wamu. ³⁵ Omumu ku ibo, ow'amateeka, n'amubuulya ng'amukema nti ³⁶ Omwegeresya ekiragiro ekikulu mu mateeka kiruwa? ³⁷ Naye n'amukoba nti Takanga Mukama Katonda wo n'omwoyo gwo gwonagwona, n'obulamu bwo bwonabwona, n'amagezi go gonagona. ³⁸ Kino niikyo kiragiro ekikulu eky'oluberyeberye. ³⁹ N'eky'okubiri ekikifaanana niikyo kino nti Takanga muliraanwa wo nga bwe wetakala wetaka. ⁴⁰ Mu biragiro bino byombiri amateeka gonagona mwe gasinziira, era na banabbi. ⁴¹ Abafalisaayo bwe baakuŋaanire, Yesu n'ababuulya, ⁴² ng'agamba nti Kristo mumulowooza mutya? niiye mwana w'ani? Ne bamukoba nti Wa Dawudi. ⁴³ N'abakoba nti Kale, Dawudi mu Mwoyo kiki ekimwetesya Mukama we, ng'akoba nti ⁴⁴ Mukama yakobere Mukama wange nti Tyama ku mukono gwange omuliiro, Okutuusya lwe nditeeka abalabe bo wansi w'ebigere byo? ⁴⁵ Kale oba nga Dawudi amweta Mukama we, ali atya omwana we? ⁴⁶ Ne watabba muntu eyasoboire okumwiramu ekigambo, era okuva ku lunaku olwo tewabbaire muntu eyasoboire okumubuulya ekigambo ate.