¹ Bwe baasembeire okumpi ne Yerusaalemi, ne batuuka e Besufaage, ku lusozi olwa Zeyituuni awo Yesu n'atuma abayigirizwa babiri, ² n'abakoba nti Mwabe mu mbuga ebali mu maiso, amangu ago mwabona endogoyi ng'esibiibwe, n'omwana gwayo yoona; mugisuwundule, mugindeetere. ³ Naye omumu bweyabakoba ekigambo, mwakoba nti Mukama waisu niiye agitaka; yeena yagiweererya mangu ago. ⁴ Kino ky'abbaire, ekigambo kituukirire nabbi kye yatumwire, ng'akoba nti ⁵ Mukobere muwala wa Sayuuni nti Bona, Kabaka wo aiza gy'oli. Omuteefu, nga yeebagaire endogoyi, N'akayana omwana gw'endogoyi. ⁶ Abayigirizwa ne baaba, ne bakola nga Yesu bwe yabalagiire ⁷ ne baleeta endogoyi, n'omwana gwayo, ne bagiteekaku engoye gyabwe; n'agityamaku. ⁸ Abantu bangi ab'omu kibiina ne baalirira engoye gyabwe mu ngira; abandi ne batema amatabi ku misaale, ne bagaaliira mu ngira. ⁹ Ebibiina ebyamutangiire, n'ebyo ebyaviire enyuma ne bitumulira waigulu, ne bikoba nti Ozaana eri omwana wa Dawudi: Aweweibwe omukisa aiza mu liina lya Mukama: Ozaana waigulu mu igulu. ¹⁰ Awo bwe yayingiire mu Yerusaalemi, ekibuga kyonakyona ne kikankanyizibwa nga kikoba nti Yani ono? ¹¹ Ebibiina ne bikoba nti Ono nabbi, Yesu ava mu Nazaaleesi eky'e Galiraaya. ¹² Yesu n'ayingira mu yeekaalu ya Katonda, n'abbingira ewanza bonabona ababbaire batundira mu yeekaalu. n'avuunika embaawo egyabadi abawaanyisya efeeza, n'entebe ez'abadi batunda amayemba; ¹³ n'abakoba nti Kyawandiikiibwe nti Enyumba yange yayetebwanga nyumba yo kusabirangamu: naye imwe mugifiire mpuku ya banyagi. ¹⁴ Awo abazibe b'amaiso n'abaleme ne baiza gy'ali mu yeekaalu: n'abawonya. ¹⁵ Naye bakabona abakulu n'abawandiiki bwe baboine eby'amagero bye yakolere, n'abaana abatumuliire waigulu mu yeekaalu nga bakoba nti Ozaana eri omwana wa Dawudi; ne banyiiga ¹⁶ ne bamukoba nti Owulira bano bwe bakoba? Yesu n'abagamba nti Mpulira: temusomangaku nti Mu munwa gw'abaana abatobato n'abawere otukirirya eitendo? ¹⁷ N'abaleka, n'afuluma mu kibuga, n'ayaba e Bessaniya, n'agona eyo. ¹⁸ Awo amakeeri bwe yabbaire ng'airayo ku kibuga, enjala n'emuluma. ¹⁹ N'abona omusaale gumu ku mbali kw'engira, n'agutuukaku, n'asanga nga kubula kintu, wabula amakoola ameereere; n'agukoba nti Tobalanga bibala emirembe n'emirembe. Amangu ago omusaale ne guwotoka. ²⁰ Abayigirizwa bwe baboine, ne beewuunya, ne bakoba nti Omutiini guwotokere gutya amangu? ²¹ Yesu n'airamu n'abakoba nti Mazima mbakoba nti Bwe mwabbanga n'okwikirirya, nga temubuusabuusa, temwakolenga kino kyonka eky'omutiini, naye bwe mulikoba olusozi luno nti Situlibwa osuulibwe mu nyanza, kirikolebwa. ²² Ne byonabyona bye mwatakanga nga musaba, nga mwikiriirye, mwabiweebwanga. ²³ N'ayingira mu yeekaalu, bakabona abakulu n'abakaire b'abantu ne baiza gy'ali ng'ayegeresya, ne bakoba nti Buyinza ki obukukozesya bino? yani eyakuwaire obuyinza buno? ²⁴ Yesu n'airamu n'abakoba nti Nzeena ka mbabuulye ekigambo kimu, bwe mwakingiramu, era nzeena n'abakobera obuyinza bwe buli obunkozesya bino. ²⁵ Okubatiza kwa Yokaana kwaviire waina? mu igulu oba mu bantu? Ne beebuulyagana bonka na bonka, ne bakoba nti Bwe twakoba nti Mu igulu: yatukoba nti Kale kiki ekyabalobeire okumwikirirya? ²⁶ Naye bwe twakoba nti Mu bantu; tutya abantu; kubanga bonabona bamulowooza Yokaana nga nabbi. ²⁷ Ne bairamu Yesu ne bamukoba nti Tetumaite. Yeena n'abakoba nti Era nzeena tiimbakobere obuyinza bwe buli obunkozesya bino. ²⁸ Naye mulowooza mutya? Waaliwo omuntu eyabbaire abaana be babiri; n’aiza eri ow'oluberyeberye, n'akoba nti Omwana, yaba okole emirimu Atyanu mu lusuku olw'emizabbibu. ²⁹ N'airamu n'akoba nti ngaine: naye oluvanyuma ne yeenenya, n'ayaba. ³⁰ N'aiza eri ow'okubiri, n'amukoba atyo. Yeena n'airamu n'akoba nti Ka njabe, sebo: n'atayaba. ³¹ Ku abo bombiri yani eyakolere itaaye ky'ataka? Ne bakoba nti Ow'oluberyeberye. Yesu n'abakoba nti Mazima mbakoba nti abawooza n'abenzi babasooka imwe okuyingira mu bwakabaka bwa Katonda. ³² Kubanga Yokaana yaizire gye muli mu ngira ey'obutuukirivu, mweena temwamwikirirye: naye abawooza n'abenzi baamwikiriirye: mweena, bwe mwaboine mutyo, n'oluvanyuma temwenenyerye okumwikirirya. ³³ Muwulire olugero olundi: Waaliwo omuntu eyabbaire n'enyumba ye, n'asimba olusuku olw'emizabbibu, n'alukomeraku olukomera, n'alusimamu eisogolero, n'azimba ekigo, n'alusigira abalimi, n'atambula olugendo. ³⁴ Awo omwaka bwe gwabbaire guli kumpi okutuuka ebibala okwenga, n'atuma abaidu be eri abalimi, babawe ebibala bye. ³⁵ Naye abalimi ne bakwata abaidu be, omumu ne bamukubba, ogondi ne bamwita, ogondi ne bamukasuukirira Amabbaale. ³⁶ N'atuma ate abaidu abandi bangi okusinga ab'oluberyeberye: ne babakola boona batyo. ³⁷ Oluvanyuma n'abatumira omwana we, ng'akoba nti Bawulira omwana wange. ³⁸ Naye abalimi bwe baboine omwana ne bakoba bonka na bonka nti Ono niiye omusika; mwize, tumwite, tulye obusika bwe. ³⁹ Ne bamukwata, ne bamusindiikirirya mu lusuku lw’emizabibbu, ne bamwita. ⁴⁰ Kale, mukama w'olusuku olw'emizabbibu bw'aliiza, alibakola atya abalimi abo? ⁴¹ Ne bamukoba nti Abo ababbiibi alibazikirirya kubbiibi; naye olusuku olw'emizabbibu alirusigira abalimi abandi, abamuweerezanga ebibala byamu mu mwaka gwabyo. ⁴² Kale, mukama w'olusuku olw'emizabbibu bw'aliiza, alibakola atya abalimi abo? ⁴³ Kyenva mbagamba nti Obwakabaka bwa Katonda bulibatoolebwaku imwe, buliweebwa eigwanga eribala ebibala byabwo. ⁴⁴ Era agwa ku ibbaale lino alimenyekamenyeka: n'oyo gwe lirigwaku, lirimubbetenta. ⁴⁵ Awo bakabona abakulu n'Abafalisaayo bwe baawuliire engero gye, ne bategeera nti atumwire ku ibo. ⁴⁶ Nabo bwe babbaire bataka okumukwata, ne batya ebibiina, kubanga byamulowoozere okubba nabbi.