¹ Kubanga obwakabaka obw'omu igulu bufaanana omuntu alina ennyumba ye, eyawine amakeeri okupakasya abalimi balime mu lusuku lwe olw'emizabbibu. ² Bwe yamalire okulagaana n'abalimi eddinaali ey'olunaku olumu, n'abasindika mu lusuku lwe olw'emizabbibu. ³ N'afuluma esaawa nga giri isatu, n'abona abandi nga bemereire mu katale nga babulaku kye bakola; ⁴ boona n'abakoba nti Mweena mwabe mu lusuku olw'emizabbibu, nzeena naabawa ekyatuuka. Ne baaba. ⁵ N'afuluma ate esaawa nga giri mukaaga, era n'omwenda, n'akola atyo. ⁶ N'afuluma esaawa nga giri ikumi n'aimu, n'asanga abandi nga bemereire; n'abakoba nti Kiki ekibemereirye wano obwire okuziba nga mubulaku kye mukola? ⁷ Ne bamugamba nti Kubanga wabula muntu eyatupakasirye. N'abakoba nti Mweena mwabe mu lusuku olw'emizabbibu. ⁸ Obwire bwe bwawungeire, omwami w'olusuku olw'emizabbibu n'akoba omukolya we nti Beete abalimi, obawe empeera, osookere ku b'oluvanyuma, okutuusya ku b'oluberyeberye. ⁹ N'ab'omu saawa eikumi n'eimu bwe baizire, ne baweebwa buli muntu edinaali imu. ¹⁰ Boona abaasookere bwe baizire, ne balowooza nti baweebwa okusingawo; naye boona ne baweebwa buli muntu edinaali imu. ¹¹ Bwe baagiweweibwe, ne beemulugunyirya omwami. ¹² nga bagamba nti Bano ab'oluvannyuma bakoleire esaawa imu, n'obekankanya naife, abaateganire amakeeri n'eisana nga litwokya. ¹³ Yeena n'aidamu n'akoba omumu ku abo nti Munange, tikunkolere kubbiibi: tewalagaine nanze edinaali imu? ¹⁴ Twala eyiyo, oyabe; ntaka okuwa ono ow'oluvanyuma nga iwe. ¹⁵ Tinsobola kukola byange nga bwe ntaka? oba eriiso lyo ibbiibi kubanga nze ndi musa? ¹⁶ Batyo ab'oluvannyuma balibba ab'oluberyeberye, n'ab'oluberyeberye balibba ab'oluvanyuma. ¹⁷ Yesu bwe yabbaire ng'ayambuka okwaba e Yerusaalemi, n'atwala abayigirizwa eikumi n'ababiri kyama, n'abakobera mu ngira nti ¹⁸ Bona, twambuka twaba e Yerusaalemi; n'Omwana w'omuntu aliweebwayo mu bakabona abakulu n'abawandiiki; boona balimusalira omusango okumwita, ¹⁹ era balimuwaayo mu b'amawanga okumuduulira, n'okumukubba, n'okumukomerera: kaisi n'azuukizibwa ku lunaku olw'okusatu. ²⁰ Awo maye w'abaana ba Zebbedaayo n'aiza gy'ali, n'abaana be, n'amusinza, n'amusaba ekigambo. ²¹ N'amukoba nti Otaka ki? N'amukoba nti Lagira abaana bange bano bombiri batyame, omumu ku mukono gwo omuliiro, n'ogondi ku mukono gwo omugooda, mu bwakabaka bwo. ²² Naye Yesu n'airamu n'akoba nti Temumaite kye musaba. Muyinza okunywa ku kikompe nze kye njaba okunywaku? Ne bamukoba nti Tusobola. ²³ N'abakoba nti Ku kikompe kyange mulinywiraku dala: naye okutyama ku mukono gwange omuliiro, no ku mukono omugooda, ti niinze nkugaba, wabula eri abo Itawange be yakugisiire. ²⁴ Na badi eikumi bwe baawuliire, ne banyiigira ab'oluganda ababiri. ²⁵ Naye Yesu n'abeeta gy'ali, n'akoba nti Mumaite ng'abaami b'amawanga babafuga, n'abakulu baabwe babatwala n'amaani. ²⁶ Tekiibbenga kityo mu imwe: naye buli ataka okubba omukulu mu imwe yabbanga muweereza wanyu: ²⁷ na buli ataka okubba ow'oluberyeberye mu imwe yabbanga mwidu wanyu: ²⁸ nga Omwana w'omuntu bw'ataizire kuweerezebwa, wabula okuweereza, n'okuwaayo obulamu bwe ekinunulo eky'abangi. ²⁹ Bwe babbaire nga bafuluma mu Yeriko, ekibiina ekinene ne kimusengererya. ³⁰ Bona, abazibe b'amaaso babiri ababbaire batyaime ku mbali kw'engira, bwe baawuliire nti Yesu abitawo, ne batumulira waigulu; nga bakoba nti Mukama waisu, tusaasire, omwana wa Dawudi. ³¹ Ekibiina ne kibabogolera, okusirika: naye ibo ne beeyongera okutumulira waigulu, nga bakoba nti Mukama waisu, tusaasire, omwana wa Dawudi. ³² Yesu n'ayemerera, n'abeeta, n'akoba nti Mutaka mbakole ki? ³³ Ne bamukoba nti Mukama waffe, amaiso gaisu gazibuke. ³⁴ Yesu n'akwatibwa ekisa, n'akwata ku maiso gaabwe: amangu ago ne babona, ne bamugobereerya.