¹ Enaku omukaaga bwe gyabitirewo Yesu n'atwala Peetero no Yakobo no Yokaana omugande, n'abaninisya ku lusozi oluwanvu bonka: ² n'afuusibwa mu maiso gaabwe: amaiso ge ne gamasamasa ng'eisana, ebivaalo bye ne bitukula ng'omusana. ³ Bona, Musa n'Eriya ne babonekera nga batumula naye. ⁴ Peetero n'airamu n'akoba Yesu nti Mukama wange, kisa ife okubba wano: bw'otaka, nazimba wano ensiisira isatu; eimu yiyo, n'egindi ya Musa, n'egindi y'Eriya. ⁵ Bwe yabbaire ng'akaali atumula, Bona, ekireri ekimasamasa ne kibasiikirizya: bona, eidoboozi ne liva mu kireri, nga likoba nti Ono niiye Mwana wange gwe ntaka, gwe nsanyukira einu; mumuwulire. ⁶ Abayigirizwa bwe baaliwuliire, ne bagwa nga beefundikire, ne batya inu. ⁷ Yesu n'aiza n'abakwataku n'akoba nti Muyimuke, temutya. ⁸ Ne bayimusia amaiso gaabwe, ne batabona muntu, wabula Yesu yenka. ⁹ Bwe babbaire nga baika ku lusozi, Yesu n'abalagira ng'akoba nti Temukoberaku muntu bye mwoleseibwe, okutuusya Omwana w'omuntu bw'alimala okuzuukira mu bafu. ¹⁰ Abayigirizwa be ne bamubuulya, ne bakoba nti Kale kiki ekibakobesya Abawandiiki nti Eriya kimugwaniire okusooka okwiza? ¹¹ N'airamu n'akoba nti Eriya aiza dala, alirongoosya byonabyona: ¹² naye mbakoba nti Eriya amalire okwiza, boona tebaamumanyire, naye baamukolere bwe batakire. Atyo n'Omwana w'omuntu alibonyaabonyezebwa ibo. ¹³ Awo abayigirizwa ne bategeera nti yatumwire nabo ku Yokaana Omubatiza. ¹⁴ Bwe baatuukire eri ekibiina, omuntu n'aiza gy'ali, n'amufukaamirira, ng'akoba nti ¹⁵ Mukama wange, musaasire omwana wange: kubanga agwa ensimbu, gimubonyaabonya inu: kubanga emirundi mingi ng'agwa mu musyo, era emirundi mingi mu maizi. ¹⁶ Ne muleetera abayigirizwa bo, ne batasobola kumuwonya. ¹⁷ Yesu n'airamu n'akoba nti Imwe ab'emirembe egitaikirirya emikyamu, ndituukya waina okubba naimwe? ndituukya waina okubagumiinkiriza? mumundeetere wano. ¹⁸ Yesu n'amubogolera; dayimooni n'amuvaaku: omulenzi n'awona okuva mu kiseera ekyo. ¹⁹ Awo abayigirizwa ne baiza eri Yesu kyama, ne bakoba nti Kiki ekitulobeire ife okusobola okumubbinga? ²⁰ N'abakoba nti Olw'okwikirirya kwanyu okubba okutono: kubanga dala mbakoba nti Singa mulina okwikirirya okwekankana ng'akaweke ka kalidaali, bwe mulikoba olusozi luno nti Vaawo wano yaba wadi; kale lulyaba; so singa wabula kigambo kye mutasobola. ²¹ Naye kyoka eky'engeri eno tekisobola kuvaawo awabula kusaba no kusiiba. ²² Bwe babbaire nga bakaali batyaime e Galiraaya, Yesu n'abakoba nti Omwana w'omuntu ayaba kuweebwayo mu mikono gy'abantu; ²³ balimwita, no ku lunaku olw'okusatu alizuukizibwa. Ne banakuwala inu. ²⁴ Bwe baatuukire e Kaperunawumu, abantu abasoloozia ediderakima ne baiza eri Peetero, ne bakoba nti Omukama wanyu tawa diderakima? ²⁵ N'akoba nti Awa. Bwe yayingiire mu nyumba, Yesu n'amwesooka ng'akoba nti Olowooza otya, Simooni? Bakabaka b'ensi bawoozia oba basoloozia bantu ki? baana baabwe oba banaigwanga? ²⁶ N'akoba nti Banaigwanga. Yesu n'amukoba nti Kale abaana b'eidembe. ²⁷ Naye, tuleke okubesitazya, yaba ku nyanza, osuule eirobo, oinyulule ekyenyanza ekyasooka okwibbulukuka; bwewayasamya omunwa gwakyo, wabonamu esutateri: otwale eyo, ogibawe ku bwange ne ku bubwo.