¹ Abafalisaayo n'Abasadukaayo ne baiza, ne bamukema ne bamusaba okubalaga akabonero akava mu igulu. ² Naye n'airamu n'abakoba nti Bwe bubba eigulo, mukoba nti Bwabba busa: kubanga eigulu limyukire. ³ N'eizo nti Wabba omuyaga atyanu: kubanga eigulu limyukire libindabinda. Mumaite okwawula eigulu bwe lifaanana; naye temusobola kwawula bubonero bwa biseera? ⁴ Ab'emirembe embibbi era egy'obwenzi basagira akabonero; so tebaliweebwa kabonero, wabula akabonero ka Yona. N'abaleka, n'ayaba. ⁵ Abayigirizwa ne baiza eitale w'edi, ne beerabira okutwala emigaati. ⁶ Yesu n'abakoba nti Mulingirire mwekuume ekizimbulukusya eky'Abafalisaayo n'Abasadukaayo. ⁷ Ne bawakana bonka na bonka, nga bakoba nti Kubanga tetuleetere migaati. ⁸ Yesu n'amanya n'akoba nti Imwe abalina okwikirirya okutono, kiki ekibawakanya mwenka na mwenka kubanga mubula migaati? ⁹ Mukaali kutegeera, so temwijukira migaati eitaanu eri abo enkumi eitaanu, n'ebiibo bwe byabbaire bye mwakuŋaanyire ¹⁰ Era emigaati omusanvu eri abo enkumi eina, n'ebisero bwe byabbaire bye mwakuŋaanyirye? ¹¹ Ekibalobeire ki okutegeera nti timbakobereire lwe migaati? Naye mwekuume ekizimbulukusya eky'Abafalisaayo n'Abasaddukaayo. ¹² Kaisi ne bategeera nti tabakobere kwekuuma kizimbulukusya kya migaati, wabula okuyigirizya kw'Abafalisaayo n'Abasadukaayo. ¹³ Awo, Yesu bwe yaizire ku njuyi gy'e Kayisaliya ekya Firipo, n'abuulya abayigirizwa be, ng'akoba nti Omwana w'omuntu abantu bamweta batya? ¹⁴ Ne bakoba nti Abandi bamweta Yokaana Omubatiza; abandi nti Eriya: abandi nti Yeremiya, oba omumu ku banabbi. ¹⁵ N'abakoba nti Naye imwe munjeta mutya? ¹⁶ Simooni Peetero n'airadamu n'akoba nti Niiwe Kristo, Omwana wa Katonda omulamu. ¹⁷ Yesu n'airamu n'amugamba nti Olina omukisa, Simooni Ba-Yona: kubanga omubiri n'omusaayi tebyakubikuliire ekyo, wabula Itawange ali mu igulu. ¹⁸ Nzeena nkukoba nti Iwe Peetero, nzeena ndizimba ekanisa yange ku lwazi luno: so n'emiryango egy'Emagombe tegirigisobola. ¹⁹ Ndikuwa ebisulumuzo by'okwakabaka obw'omu igulu: kyonakyona ky'olisiba ku nsi kirisibibwa mu igulu: kyonakyona ky'olisuwundula ku nsi kirisuwundulwa mu igulu. ²⁰ Awo n'akuutira abayigirizwa baleke okukoberaku omuntu nti niiye Kristo. ²¹ Yesu n'asookera awo okubuulira abayigirizwa be nti kimugwanira okwaba e Yerusaalemi, okubonyaabonyezebwa einu abakaire na bakabona abakulu n'abawandiiki, n'okwitibwa, no ku lunaku olw'okusatu okuzuukizibwa. ²² Peetero n'amutwala, n'atandiika okumunenya, ng'akoba nti Bbe, Mukama wange: ekyo tekirikubbaaku n'akatono. ²³ N'akyuka, n'akoba Peetero nti Ira enyuma wange, Setaani, oli nkonge gye ndi: kubanga tolowooza bya Katonda, wabula eby'abantu. ²⁴ Awo Yesu n'akoba abayigirizwa be nti Omuntu bw'ataka okwiza enyuma wange, yeefiirize yenka yeetikke omusalaba gwe, ansengererye. ²⁵ Kubanga buli ataka okulokola obulamu bwe alibugotya: na buli aligotya obulamu bwe ku lwange alibubona. ²⁶ Kubanga omuntu kulimugasia kutya okulya ensi yonayona, naye ng'afiiriirwe obulamu bwe? oba omuntu aliwaayo ki okununula obulamu bwe? ²⁷ Kubanga Omwana w'omuntu ayaba kwizira mu kitiibwa kya Itaaye na bamalayika be; kaisi n'asasula buli muntu nga bwe yakolere. ²⁸ Dala mbakoba nti Waliwo ku bano abemereire wano, abatalirega ku kufa n'akatono, okutuusya lwe balibona Omwana w'omuntu ng'aiza mu bwakabaka bwe.