¹ Awo ne baiza eri Yesu Abafalisaayo n'abawandiiki abaviire mu Yerusaalemi, nga bakoba nti ² Abayigirizwa bo kiki ekiboonoonyesya obulombolombo bwe twaweweibwe abakaire? kubanga tebanaaba mu ngalo nga balya emere. ³ N'abairamu n'abakoba nti Mweena kiki ekiboonoonesia eiteeka lya Katonda olw'obulombolombo bwe mwaweweibwe? ⁴ Kubanga Katonda yakobere nti Otekangamu ekitiibwa Itaawo no mawo: ate nti Avumanga itaaye oba maye, bamwitanga bwiti. ⁵ Naye imwe mbakoba nti Buli alikoba itaaye oba maye nti Kyonakyona kye nandikuwaire okukugasa, nkiwaire Katonda, ⁶ alireka okuteekamu ekitiibwa itaaye. Mwadibirye ekigambo kya Katonda olw'obulombolombo bwanyu bwe mwaweweibwe. ⁷ Imwe bananfuusi, Isaaya yalagwire kusa ku imwe, ng'akoba nti ⁸ Abantu bano banteekamu ekitiibwa kyo ku minwa; Naye omwoyo gwabwe gundi wala. ⁹ Naye bansinzizia bwereere, Nga bayigiriza amateeka g'abantu nga niibyo by'okukwata. ¹⁰ N'ayeta ekibiina, n'abakoba nti Muwulire, mutegeere: ¹¹ ekiyingira mu munwa ti niikyo kyonoona omuntu; naye ekiva mu munwa, ekyo niikyo kyonoona omuntu. ¹² Awo abayigirizwa ne baiza, ne bamukoba nti Omaite Abafalisaayo nga baanyiiga, bwe baawulira ekigambo ekyo? ¹³ Naye n'airamu n'akoba nti Buli kisimbe itawange ow'omu igulu ky'atasimbire, kirisimbulibwa. ¹⁴ Mubaleke: noibo basaale abatabona. Naye omuzibe w'amaiso bw'atangira muzibe mwinaye bombiri baligwa mu kiina. ¹⁵ Peetero n'airamu n'amukoba nti Tunyonyole olugero olwo. ¹⁶ Naye n'akoba nti Era mweena mukaali kubba na magezi. ¹⁷ Temutegeera nti buli ekiyingira mu munwa kyaba mu kida, ne kisuulibwa mu kiyigo? ¹⁸ Naye ebifuluma mu munwa biva mu mwoyo; n'ebyo niibyo byonoona omuntu. ¹⁹ Kubanga mu mwoyo mu muvamu ebirowoozo Ebibbiibi, obwiti, obwenzi, obukaba, obubbiibi, okuwaayirizia, okuvuma: ²⁰ ebyo bye byonoona omuntu: naye okulya nga tanaabire mu ngalo tekwonoona muntu. ²¹ Yesu n'avaayo, n'ayaba ku njuyi gy'e Tuulo n'e Sidoni. ²² Kale, bona, omukali Omukanani n'ava ku luyi eyo, n'atumulira waigulu ng'agamba nti Onsaasire Mukama wange, omwana wa Dawudi; muwala wange alwaire inu dayimooni. ²³ Naye n'atamwiramu kigambo. Abayigirizwa be ne baiza ne bamwegayirira, nga bakoba nti Musebule; kubanga atuwowoganira enyuma. ²⁴ Naye n'airamu n'akoba nti Tinatumiibwe wabula eri entama egyagotere ez'omu nyumba ya Isiraeri. ²⁵ Naye n'aiza, n'amusinza, ng'akoba nti Mukama wange, mbeera. ²⁶ N'airamu n'akoba nti Ti kisa okukwata emere y'abaana n'okugisuulira obubbwa. ²⁷ Naye n'akoba nti Niiwo awo, Mukama wange: kubanga n'obubbwa bulya obukunkumuka obugwa okuva ku meenza ya bakama baabwo. ²⁸ Yesu kaisi nairamu n'amugamba nti iwe omukali, okwikirirya kwo kunene: kibbe gy'oli nga bw'otaka. Omuwala we n'awona okuva mu kiseera ekyo. ²⁹ Yesu n'avaayo, n'aiza ku itale ly'enyanza y'e Galiraaya; n'aniina ku lusozi, n'atyama okwo. ³⁰ Ebibiina bingi ne biiza gy'ali, nga birina abawenyera, n'abazibe b'amaiso, ne bakasiru, n'abaleme, n'abandi bangi, ne babateeka awali ebigere bye; n'abawonya: ³¹ ekibiina n'okwewuunya ne beewuunya, bwe baboine bakasiru nga batumula, abaleme nga balamu, abawenyera nga batambula, n'abazibe b'amaiso nga babona: ne bagulumiza Katonda wa Isiraeri. ³² Yesu n'ayeta abayigirizwa be, n'akoba nti Nsaasira abantu kubanga atyanu baakamala nanze enaku isatu nga tebalina kyo kulya: n'okubasebula nga balina enjala tinkitaka, koizi bazirikira mu ngira. ³³ Abayigirizwa ne bamukoba nti Twatoola waina emigaati emingi giti mu idungu, okwikutya ekibiina ekinene ekyekankana wano? ³⁴ Yesu n'abagamba nti Mulina emigaati imeka? Ne babakoba nti Musanvu, n'ebyenyanza bitono ti bingi. ³⁵ N'alagira ekibiina okutyama wansi; ³⁶ n'atoola emigaati musanvu n'ebyenyanza; ne yeebalya n'amenyamu n'awa abayigirizwa, abayigirizwa ne bagabira ebibiina. ³⁷ Ne balya bonabona, ne baikuta: ne bakuŋaanya obukunkumuka obwasigairewo, ebiibo musanvu ebyaizwire. ³⁸ Boona abaliire babbaire abasajja enkumi ina, abakali n'abaana obutabateekaku. ³⁹ N'asebula ebibiina, n'asaabala mu lyato, n'aiza mu luyi lwa Magadani.