¹ Mu biseera bidi Kerode ow'eisaza n'awulira eitutumu lya Yesu, ² n'akoba abaidu be nti Oyo niiye Yokaana Omubatiza; azuukiire mu bafu; era eby'amaani bino kyebiviire bikolera mu iye. ³ Kubanga Kerode yabbaire akwaite Yokaana, n'amusiba, n'amuteeka mu ikomera olwa Kerodiya, mukali wa Firipo omugande. ⁴ Kubanga Yokaana yamukobere nti Kyo muzizo iwe okubba naye. ⁵ Bwe yabbaire ataka okumwita, n'atya abantu, kubanga baamulowoozere nga niiye nabbi. ⁶ Bwe lwatuukire olw'okwijukira amazaalibwa ga Kerode, omuwala wa Kerodiya n'akina mu maiso gaabwe, n'asanyusya Kerode. ⁷ Awo n'alayira n'asuubizia okumuwa kyonakyona ky'eyasaba. ⁸ Naye, bwe yaweereirwe maye, n'akoba nti Mpeera wano mu lujo omutwe gwa Yokaana Omubatiza. ⁹ Kabaka n'alumwa; naye olw'ebirayiro bye, n'olw'abo ababbaire batyaime nga balya naye, n'alagira okugumuwa; ¹⁰ n'atuma, n'atemaku Yokaana omutwe mu ikomera. ¹¹ Ne baleeta omutwe gwe mu lujo, ne baguwa omuwala: n'agutwalira maye. ¹² Abayigirizwa be ne baiza, ne basitula omulambo, ne bamuziika; ne baaba ne babuulira Yesu. ¹³ Awo, Yesu bwe yawuliire, n'aviirayo mu lyato, n'ayaba awali eidungu kyama: ebibiina bwe byawuliire, ne biva mu bibuga ne bimusengererya nga bibita ku lukalu. ¹⁴ N'avaayo, n'abona ekibiina kinene, n'abasaasira, n'awonya abalwaire baabwe. ¹⁵ Bwe bwawungeire, abayigirizwa ne baiza w'ali, ne bakoba nti Wano dungu, obwire bubitire inu; siibula abantu, baabe mu bibuga, beegulire emere. ¹⁶ Naye Yesu n'abakoba nti Wabula kibairisyayo; imwe mubawe ebyokulya. ¹⁷ Ne bamukoba nti Tubula kintu wano wabula emigaati itaano, n'ebyenyanza bibiri. ¹⁸ N'akoba nti Mubindeetere wano. ¹⁹ N'alagira ebibiina okutyama ku mwido; n'atwala emigaati eitaano n'ebyenyanza ebibiri, n'alinga waigulu mu igulu, ne yeebalya, n'amenyamu emigaati n'agiwa abayigirizwa, abayigirizwa ne bagabira ebibiina. ²⁰ Ne balya bonabona, ne baikuta: ne bakuŋaanya obukunkumuka obwasigairewo, ebiibo ikumi na bibiri ebyaizwire. ²¹ Boona abaliire babbaire abasaiza ng'enkumi itaanu, abakali n'abaana obutabateekaku: ²² Amangu ago n'awalirizya abayigirizwa okusaabala, bamutangire okwaba eitale w'edi, amale okusebula ebibiina. ²³ Bwe yamalire okusebula ebibiina, n'aniina ku lusozi yenka okusaba: obwire bwe bwawungeire, yabbaireyo mumu. ²⁴ Naye eryato lyabbaire limalire okutuuka mu buliba, nga lyesunda n'amayengo, kubanga omuyaga gwabafulumire mu maiso. ²⁵ Awo obwire mu kisisimuko eky'okuna n'aiza gye bali, ng'atambula ku nyanza. ²⁶ Abayigirizwa bwe baamuboine ng'atambula ku nyanza, ne beeraliikirira, ne bakoba nti Dayimooni; ne beekanga nga batya. ²⁷ Amangu ago Yesu n'atumula nabo, n'agamba nti Mwiremu omwoyo: niinze ono; temutya. ²⁸ Peetero n'aimuramu n'agamba nti Mukama wange, oba nga niiwe oyo, ndagira ngize gy'oli ku maizi. ²⁹ N'akoba nti iza. Peetero n'ava mu lyato, n'atambulira ku maizi, okwaba eri Yesu. ³⁰ Naye, bwe yaboine omuyaga, n'atya: n'atandika okusaanawo, n'akunga, n'akoba nti Mukama wange, ndokola. ³¹ Amangu ago Yesu n'agolola omukono, n'amukwata, n'amukoba nti Iwe alina okwikirirya okutono, kiki ekikubuusiryebuusirye? ³² Bwe baniinire mu lyato, omuyaga ne guwaawo. ³³ Boona ababbaire mu lyato ne bamusinza, nga bakoba nti Mazima oli Mwana wa Katonda. ³⁴ Bwe baamalire okuwunguka, ne batuuka ku bukalu obw'e Genesaleeti. ³⁵ Abantu baayo bwe baamumanyire, ne batuma mu nsi eyo yonayona eriraanyeewo, ne bamuleetera bonabona abalwaire; ³⁶ ne bamwegayirira bakwateku bukwati ku lukugiro lw'ekivaalo kye; bonabona abakwaiteku ne bawonyezebwa dala.