¹ Mu kiseera ekyo abayigirizwa ne baiza eri Yesu, ne bakoba nti Kale yani omukulu mu bwakabaka obw'omu igulu? ² N'ayeta omwana omutomuto, n'amwemererya wakati waabwe, ³ n'akoba nti Mazima mbakoba nti Bwe mutakyuka okufuuka ng'abaana abatobato, temuliyingira n'akatono mu bwakabaka obw'omu igulu. ⁴ Kale buli eyeewombeeka ng'omwana ono omutomuto, niiye mukulu mu bwakabaka obw'omu igulu. ⁵ Na buli alisemberya omwana omutomuto ng'ono mu liina lyange ng'asembeirye niinze: ⁶ naye alyesitalya ku abo abatobato bano abanjikirirya waakiri asibibwe mu ikoti olubengo olunene, Kaisi bamusuule mu buliba bw'enyanza. ⁷ Girisanga ensi olw'ebigambo ebyesitalya! Kubanga ebisitalya tebirireka kwiza; naye zirisanga omuntu oyo aleeta ekyesitalya! ⁸ Oba ng'omukono gwo oba kugulu kwo nga kukwesitalya, kutemeku okusuule wala: niikyo ekisa oyingire mu bulamu ng'obulaku omukono oba kugulu, okusinga okusuulibwa mu musyo ogw'emirembe n'emirembe, ng'olina emikono gyombiri oba amagulu gombiri. ⁹ Era oba ng'eriiso lyo nga likwesitalya, litoolemu, olisuule wala: niikyo ekisa oyingire mu bulamu ng'oli we itulu okusinga okusuulibwa mu Geyeena ey'omusyo, ng'olina amaiso gombiri. ¹⁰ Mubone nga temunyoomanga omumu ku abo abatobato bano; kubanga mbakoba nti mu igulu bamalayika baabwe balingirira enaku gyonagyona amaaio ga itawange ali mu igulu. ¹¹ Kubanga Omwana w'omuntu yaizire okulokola ekyagotere. ¹² Mulowooza mutya? Omuntu bw'abba n'entama gye ikikumi, eimu ku egyo bwegota, taleka gidi ekyenda mu omwenda, n’ayaba ku nsozi, n’asagira eyo egotereku? ¹³ Era bw'abba ng'agiboine, mazima mbakoba nti agisanyukira eyo okusinga zidi ekyenda mu mwenda egitagotere. ¹⁴ Kityo tekitakibwa mu maiso ga Itawanyu ali mu igulu, omumu ku abo abatobato bano okuzikirira. ¹⁵ Omugande wo bw'akukola okubbiibi yaba omubuulirire iwe naye mwenka: bw'akuwulira ng'ofunire mugande wo. ¹⁶ Naye bw'atawulira, twala ogondi naiwe oba babiri era mu munwa gw'abajulizi ababiri oba basatu buli kigambo kikakate. ¹⁷ Era bw'agaana okuwulira abo kobera ekanisa: era bw'agaana okuwulira n'ekanisa, abbe gy'oli nga munaiwanga era omuwooza. ¹⁸ Mazima mbagamba nti byonabyona bye mulisiba ku nsi birisibibwa mu igulu: era byonabyona bye mulisuwundula ku nsi birisuwundulwa mu igulu. ¹⁹ Ate mbakoba nti Oba bananyu babiri bwe beetabanga ku nsi buli kigambo kyonakyona kye balisaba, kiribakolerwa itawange ali mu igulu. ²⁰ Kubanga we babba ababiri oba basatu nga bakuŋaane mu liina lyange, nzeena ndi awo wakati waabwe. ²¹ Awo Peetero n'aiza, n'amukoba nti Mukama wange, mugande wange bw'anyonoonanga, naamusonyiwanga emirundi imeka? kutuukya emirundi musanvu? ²² Yesu n'amukoba nti Tinkukoba nti Okutuukya emirundi musanvu; naye nti Okutuukya emirundi ensanvu emirundi omusanvu. ²³ Obwakabaka obw'omu igulu kyebuva bufaananyizibwa n'omuntu eyabbaire kabaka, eyatakire okubona omuwendo n'abaidu be. ²⁴ Bwe yasookere okubona, ne bamuleetera omumu, gw'abanja etalanta omutwalo. ²⁵ Naye kubanga teyabbaire ne kyo kusasula, mukama we n'alagira okumutunda, no mukali we, n'abaana be, n'ebintu byonabyona by'ali nabyo, eibanja liwe ²⁶ Awo omwidu n'agwa wansi n'amusinza, ng'akoba nti Mukama wange, manja mpola, nzeena ndikusasula byonabyona. ²⁷ Mukama w'omwidu oyo n'amusaasira, n'amulekula, n'amusonyiwa eibbanja. ²⁸ Naye omwidu oyo n'afuluma, n'asanga mwidu mwinaye, gwe yabbaire abanja edinaali ekikumi: n'amukwata, n'amugwa mu ikoti, ng'akoba nti Sasula eibbanja lyange. ²⁹ Awo mwidu mwinaye n'agwa wansi n'amwegayirira, ng'akoba, nti Manja mpola, nzeena ndikusasula. ³⁰ N'ataikirirya: naye n'ayaba n'amuteeka mu ikomera, amale okusasula eibbanja. ³¹ Awo baidu bainaye bwe baboine bwe bibbaire, ne banakuwala inu, ne baaba ne bakobera mukama waabwe ebigambo byonabyona ebibbaireyo. ³² Awo mukama we n'amweta n'amukoba nti iwe omwidu omubbiibi, nakusonyiwire eibbanja lidi lyonalyona, kubanga waneegayiriire: ³³ weena tekikugwaniire kusaasira mwidu mwinawo, nga nze bwe nakusaasiire iwe? ³⁴ Mukama we n'asunguwala, n'amuwa mu bambowa, amale okusasula eibbanja lyonalyona. ³⁵ Atyo Itawange ali mu igulu bw'alibakola, bwe mutasonyiwa mu myoyo gyanyu buli muntu mugande we.