¹ Mukama n'akoba Nuuwa nti Yingira iwe n'enyumba yo yonayona mu lyato, kubanga nkuboine ng'oli mutuukirivu mu maiso gange mu mirembe gino. ² Mu buli nsolo enongoofu twala musanvu musanvu ensaiza n'enkali yaayo; era no mu nsolo egitali nongoofu ibiri, ensaiza n'enkali yaayo; ³ era no mu bibuuka waigulu, musanvu musanvu, ekisaiza n'ekikali: eizaire kaisi libbe eiramu ku nsi yonayona. ⁴ Kubanga oluvannyuma lw'enaku omusanvu nze nditonyesya emaizi ku nsi enaku ana emisana n'obwire; nzeena ndisangula buli kintu ekiramu kye nakolere okuva mu itakali. ⁵ Nuuwa byonabona n'abikola nga Katonda bwe yamulagiire. ⁶ Naye Nuuwa yabbaire nga yaakamala emyaka lukaaga, amataba ag'amaizi bwe gabbaire ku nsi. ⁷ Nuuwa n'ayingira n’abaana be: awamu naye mu lyato olw’amaizi g'amataba. ⁸ Mu nsolo enongoofu, ne mu nsolo egitali nongoofu, no mu bibuuka, no mu buli ekyewalula ku nsi, ⁹ bibiri bibiri ne biyingira eri Nuuwa mu lyato, ekisaiza n'ekikali nga Katonda bwe yalagiire Nuuwa. ¹⁰ Awo olwatuukire oluvanyuma lw'enaku omusanvu gidi, amaizi ag'amataba ne gabba ku nsi. ¹¹ Mu mwaka ogw'olukaaga og'wobulamu bwa Nuuwa, mu mwezi ogw'okubiri, ku lunaku olw'eikumi n'omusanvu olw'omwezi, ku lunaku olwo ne gizibukuka ensulo gyonagyona, egy'omu nyanza enene, n'ebituli eby'omu igulu ne biiguka. ¹² Amaizi n'etonyera ku nsi enaku ana emisana n'obwire. ¹³ Ku lunaku olwo Nuuwa n'ayingira no Seemu no Kaamu no Yafeesi, abaana ba Nuuwa, no mukali wa Nuuwa n’abakali abasatu ab'abaana be awamu nabo, mu lyato; ¹⁴ Abo na buli nsolo mu ngeri yaayo, n'ente gyonagyona mu ngeri yagyo, na buli ekyewalula ku nsi mu ngeri yaakyo, na buli ekibuuka mu ngeri yaakyo, buli nyonyi eya buli kiwawa. ¹⁵ Ne biyingira eri Nuuwa mu lyato bibiri bibiri mu buli nyama yonayona erimu omwoka ogw'obulamu. ¹⁶ Ebyayingiire ne biyingira ekisaiza n'ekikali mu buli nyama, nga Katonda bwe yamulagiire: Mukama n'amwigalira munda. ¹⁷ Amataba ne gabba ku nsi, enaku ana; amaizi ne geeyongera ne gasitula eryato; ne liwanikibwa waigulu w’ensi. ¹⁸ Amaizi ne gafuga, ne geeyongera inu ku nsi; eryato ne liseeyeeya kungulu ku maizi. ¹⁹ Amaizi ne gayinzya inu ku nsi; ensozi gyonagyona empanvu ne zisaanikirwa egyabbaire wansi w'eigulu lyonalyona. ²⁰ Emikono ikumi n'aitaanu okwaba waigulu amaizi bwe gaayinzirye; ensozi ne gisaanikirwa. ²¹ Buli nyama etambula ku nsi n'efa, ekibuuka, n'ente, n'ensolo na buli ekyewalula ku nsi, na buli muntu yenayena: ²² byonabyona ebyabbairemu omwoka ogw'omwoyo ogw'obulamu mu nyindo gyabyo, mu byonabyona ebyabbaire mu lukalu ne bifa. ²³ N'asangula buli kintu kiramu ekyabbaire kungulu ku itakali, omuntu, n'ente, n'ekyewalula, n'ekibuuka waigulu; ne bisangulibwa ku nsi: Nuuwa n'asigalawo yenka, n'abo abbaire awamu naye mu lyato. ²⁴ Amaizi ne gayinzya ku nsi enaku kikumi mu ataanu.