¹ Awo abantu bwe baasookere okweyongera ku nsi, ne bazaala abaana ab'obuwala, ² abaana ba Katonda ne babona abawala b'abantu nga basa; ne bakwanga abakali mu bonabona be baalondere. ³ Mukama n'atumula nti Omwoyo gwange teguuwakanenga no muntu emirembe n'emirembe, kubanga yeena niigwo mubiri: naye enaku gye giribba emyaka kikumi mu abiri. ⁴ Mu biseera ebyo wabbaire Abanefuli mu nsi, era oluvannyuma, abaana ba Katonda bwe bayingiranga eri abawala b'abantu, ne babazaalira abaana: bano be b'amaite abaasookere eira, abantu abaayatiikiriire. ⁵ Mukama n'abona obubbiibi bw'omuntu nga bungi mu nsi, na buli kufumiintirizya kw'ebirowoozo eby'omu mwoyo gwe nga kubbiibi kwereere buliijo. ⁶ Mukama ne yejusa kubanga yakolere omuntu mu nsi, n'anakuwala mu mwoyo gwe. ⁷ Mukama n’atumula nti Ndisangula omuntu gwe natondere, okuva mu nsi; okusookera ku muntu, n'ensolo, n'eky'ewalula n'ekibuuka waigulu; kubanga nejusirye kubanga nabikolere. ⁸ Naye Nuuwa n’abona ekisa mu maso ga Mukama. ⁹ Kuno niikwo kuzaala kwa Nuuwa. Nuuwa yabbaire mutuukirivu, nga abula kabbiibi mu mirembe gye: Nuuwa n'atambulira wamu no Katonda. ¹⁰ Nuuwa n'azaala abaana basatu, Seemu, Kaamu, no Yafeesi. ¹¹ Ensi n'eyonooneka mu maiso ga Katonda, ensi n'eizula eiralu. ¹² Katonda n'abona ensi, ng'eyonoonekere; kubanga ekirina omubiri kyonakyona kyabbaire nga kimalire okwonoona engira yakyo ku nsi. ¹³ Katonda n'akoba Nuuwa nti Enkomerero ya buli ekirina omubiri etuuse mu maiso gange, kubanga ensi eizwire eiralu ku lwabwe; kale, bona, ndibazikirirya wamu n'ensi. ¹⁴ Weekolere eryato n'omusaale goferi; osalangamu enyumba mu lyato, osiige munda ne kungulu envumbo. ¹⁵ Otyyo bw'okolanga: emikono bisatu obuwanvu bw'eryato, n'emikono ataano obugazi bwalyo, n'emikono asatu obugulumivu bwalyo. ¹⁶ Osalangaku ekituli ku lyato, era ng'omukono gumu bw'olimala waigulu; n'omulyango gw'eryato oguteekanga mu mpete gyalyo okolanga eryato nga lirina enyumba eya wansi, n'ey'okubiri, n'ey'okusatu. ¹⁷ Nzeena, bona, nze ndireeta amataba ag'amaizi ku nsi, okuzikirirya ekirina omubiri kyonakyona ekirimu omwoka ogw'obulamu wansi w'eigulu; buli ekiri mu nsi kirifa. ¹⁸ Naye ndiragaana endagaani yange naiwe; oliyingira mu lyato, iwe n'abaana bo, ne mukali wo, n'abakali b'abaana bo wamu naiwe. ¹⁹ No mu buli kiramu mu birina omubiri byonabyona, bibiri bibiri mu buli ngeri by'olireeta mu lyato, kaisi bibbe ebiramu awamu naiwe; biribba ekisaiza n'ekikali. ²⁰ Mu bibuuka mu ngeri yaabyo, mu nte mu ngeri yagyo, mu buli ekyewalula eky'omu nsi mu ngeri yaakyo, mu buli ngeri bibiri bibiri biriiza gy'oli, bibbe ebiramu. ²¹ Naiwe weetwalire ku mere yonayona eriibwa, ogyekuŋaanyirye; eribba mere gy'oli iwe nabyo. ²² Nuuwa n'akola atyo; nga byonabyona Katonda bye yamulagiire atyo bwe yakolere.