¹ Katonda n'aijukira Nuuwa na buli kiramu na buli nte eyabbaire awamu naye mu lyato: Katonda n'aleeta empewo gibite ku nsi, amaizi ne gaweebuuka; ² era n'ensulo egy'enyanza n'ebituli eby'omu igulu ne biigalirwa, amaizi ag'omu igulu n'egaziyizibwa; ³ amaizi ne gaira okuva ku nsi obutayosya: ne gaweebuuka amaizi oluvanyuma enaku ekikumi mu ataanu bwe gybitirewo. ⁴ Mu mwezi ogw'omusanvu, ku lunaku olw'eikumi n'omusanvu olw'omwezi eryato ne lityama ku nsozi gya Alalati. ⁵ Amaizi ne gaweebuuka obutayosya okutuusya ku mwezi ogw'eikumi: mu mwezi ogw'eikumi, ku lunaku olw'oluberyeberye olw'omwezi entiiko gyensozi ne giboneka. ⁶ Awo oluvanyuma lw'enaku ana Nuuwa n’asumulula ekituli eky'eryato kye yakolere: ⁷ n'atuma waikoova n'afuluma n'airaŋananga okutuusya amaizi lwe gabonekere ku nsi. ⁸ N'atuma eiyemba okuva w'ali kaisi abone ng'amaizi gaweebuukire kungulu ku nsi; ⁹ naye eiyemba teryaboine ibbanga wo kuwummulya ekigere kyalyo, ne riira gy'ali mu lyato, kubanga amazzi gabbaire kungulu ku nsi yonayona: n'afulumya omukono gwe, n'alikwata n'aliyingirya mw'ali mu lyato. ¹⁰ N'ayosyaawo enaku musanvu ate; ate n'atuma eiyemba okuva mu lyato; ¹¹ eiyemba ne riira olw'eigulo mw'ali; bona, mu munwa gwalyo ne mubba akalagala akabisi ak'omuzeeyituuni: Nuuwa kaisi n'amanya nti amaizi gaweebuukire okuva ku nsi. ¹² N'ayosyaawo enaku musanvu ate; n'atuma eiyemba; awo oluvanyuma teryairire ate gy'ali. ¹³ Awo mu mwaka ogw'olukaaga mu gumu, mu mwezi ogw'oluberyeberye, ku lunaku olw'oluberyeberye olw'omwezi, amaizi ne gakalira ku nsi; Nuuwa n'atoolaku ekyasaanikiire eryato, n'alingirira, bona, kungulu ku nsi nga kukaliire. ¹⁴ Mu mwezi ogw'okubiri, ku lunaku olw'abiri mu musanvu olw'omwezi, ensi n'ekalira. ¹⁵ Katonda n'akoba Nuuwa nti ¹⁶ Va mu lyato, iwe, no mukali wo, n’abaana bo, n'abakali b'abaana bo, awamu naiwe. ¹⁷ Ofulumye wamu naiwe buli kiramu ekiri awamu naiwe mu buli nyama yonayona, ekibuuka n'ente na buli ekyewalula ku nsi; bizaalenga bibune mu nsi, byalenga byeyongerenga ku nsi. ¹⁸ Nuuwa n'afuluma, n'abaana be no mukali we n'abakali b'abaana be awamu naye: ¹⁹ buli nsolo, buli ekyewalula, na buli ekibuuka, buli ekitambula kyonakyona ku nsi, mu bika byabyo, ne bifuluma mu lyato. ²⁰ Nuuwa n'azimbira Mukama ekyoto; n'alonda ku nsolo gyonagyna enongoofu, no ku bibuuka byonabona ebirongoofu, n'aweerayo ebiweebwayo ebyokyebwa ku kyoto. ²¹ Mukama n'awulira eivumbe eisw; Mukama n'atumula mu mwoyo gwe nti Ensi tinkaali ngikolimira ate oluvanyuma ku lw'omuntu; kubanga okulowooza okw'omu mwoyo gw'omuntu kubbiibi okuva mu butobuto bwe; so tinkaali nkubba ate oluvannyuma buli kiramu, nga bwe nkolere. ²² Ensi ng'ekaali eriwo, okusiga n'okukungula, era empewo n'eibbugumu, era ekyeya no mutoigo, era emisana n'obwire tebiwengawo.