¹ Dina omwana wa Leeya, gwe yazaaliire Yakobo, n'afuluma n'ayaba okubona abawala ab'omu nsi. ² Sekemu omwana wa Kamoli Omukiivi, omukulu w'ensi, n'amubona; n'amutwala, n'agona naye, n'amukwata. ³ N’obulamu bwe ne bwegaita no Dina omwana wa Yakobo, n’ataka omuwala oyo, n’atumula n’omuwala n’ekisa. ⁴ Sekemu n'akoba itaaye Kamoli nti nkweire omuwala oyo. ⁵ Yakobo n'awulira nga yagwagwawazirye Dina omwana we; n'abaana be babbaire n'ensolo gye mu irisiryo: Yakobo n'asirika okutuusya lwe bairire. ⁶ Kamoli itaaye wa Sekemu n'afuluma eri Yakobo okuteesya naye. ⁷ Abaana ba Yakobo ne bava mu irisiryo ne bayingira bwe bakiwuliire: abasaiza ne banakuwala, ne basunguwala inu, kubanga yabbaire akolere eky'omuzizo mu Isiraeri bwe gonere n'omwana wa Yakobo; ekitagwanira kukola. ⁸ Kamoli n'ateesya nabo ng'atumula nti Obulamu bw'omwana wange Sekemu bulumirwa omuwala wanyu: mbeegayirira mumumuwe okumukwa. ⁹ Era mufumbirwaganenga naife: mutuwenga ife abawala banyu, era mukwenga imwe abawala baisu. ¹⁰ Era mwatyamanga wamu naife: n'ensi yabbanga mu maiso ganyu; mutyamenga omwo mugulenga mwefunirenga ebintu omwo. ¹¹ Sekemu n'akoba itaaye na bagande be nti Mboine ekisa mu maiso ganyu, era kye mwansalira kye naabawa. ¹² Eby'obuko n'ekirabo bye mwansaba bwe bwayekankana wonawona, nzeena naabawa ntyo nga bwe munkoba: naye mumpe omuwala okumukwa. ¹³ Abaana ba Yakobo ne bairamu Sekemu no Kamoli itawabwe nga bakuusa ne batumula, kubanga yabbaire agwagwawazirye Dina mwanyoko wabwe, ¹⁴ ne babakoba nti Tetuyinza kukola kino, okumuwa mwanyoko waisu atali mukomole; kubanga ekyo kyandibbaire nsoni gye tuli: ¹⁵ endagaano eno yonka niiyo eiza okubatukiririsya: bwe mwaikirirya okubba nga ife, buli musaiza mu imwe okukomolebwanga; ¹⁶ Kaisi ne tubawanga abawala baisu, naife twakwanga abawala banyu, naife tunaatuulanga wamu naimwe, era tulifuuka igwanga limu. ¹⁷ Naye bwe mutaatuwulire, okukomolebwa; olwo twatwala omuwala waisu, ne twaba. ¹⁸ Ebigambo byabwe ne bisanyusya Kamoli, no Sekemu omwana wa Kamoli. ¹⁹ Omuvubuka n'atalwawo kukola ekyo, kubanga yasanyukiire omuwala wa Yakobo: era yabbaire n'ekitiibwa okusinga enyumba yonayona eya itaaye. ²⁰ Kamoli no Sekemu omwana we ne baiza mu wankaaki w'ekibuga kyabwe, ne bateesya n'abasaiza ab'omu kibuga kyabwe, nga batumula ²¹ nti Abasaiza abo tebataka kulwana naife; kale batyamenga mu nsi bagulenga omwo; kubanga, bona, ensi ngazi, eribamala; ife tukwenga abawala baabwe, era tubawenga ibo abawala baisu, ²² Endagaanu eno yonka niiyo eyaizire okubaikiririsya abasaiza abo ife okutyama nabo, okufuuka eigwanga erimu, buli musaiza mu ife bw'alikomolebwa, nga ibo bwe bakomolebwa. ²³ Ente gyabwe n'ebintu byabwe n'ensolo gyabwe gyonagyona tebiribba byaisu? naye kyonka tubaikirirye, nabo batyamanga naife. ²⁴ No Kamoli no Sekemu omwana we bonabona abaavanga mu wankaaki w'ekibuga kye ne babawulira; buli musaiza n'akomolebwa, buli eyavanga mu wankaaki w'ekibuga. ²⁵ Awo olwatuukire ku lunaku olw'okusatu, bwe babbaire nga balumwa, abaana ba Yakobo ababiri, Simyoni no Leevi, banyoko ba Dina, ne bairira buli muntu ekitala kye, ne bazinduukirirya ekibuga, ne baita abasaiza bonabona. ²⁶ Ne baita Kamoli no Sekemu omwana we n'ekitata, ne batoola Dina mu nyumba ya Sekemu, ne bavaayo. ²⁷ Abaana ba Yakobo ne babasanga nga babaitire, ne banyaga ekibuga, kubanga bagwagwawairye mwanyoko wabwe. ²⁸ Baanyagire entama gyabwe n'embuli gyabwe n'endogoyi gyabwe, n'ebyo ebyabbaire mu kibuga, n'ebyo ebyabbaire mu nimiro: ²⁹ n'obugaiga bwabwe bwonabwona, n'abaana baabwe bonabona abatobato n'abakali baabwe, ne babasiba ne babanyaga, byonabyona dala ebyabbaire mu mayumba. ³⁰ Yakobo n'akoba Simyoni no Leevi nti Muneeraliikiriirye, okumpunyisya mu abo abatyama mu nsi, mu Bakanani no mu Baperizi: nzeena, kubanga omuwendo gwange mutono, balikuŋaana bonabona okunumba, balinkubba: nzeena ndizikirizibwa, nze n'enyumba yange. ³¹ Ne batumula nti Kisa akole mwanyoko waisu ng'omwenzi?