¹ Yakobo n'ayimusya amaiso ge, n'alinga, era, bona, Esawu ng'aiza, n'abasaiza bina wamu naye. N'agabira abaana Leeya ne Laakeeri n'abazaana bombiri. ² N'ateeka abazaana n'abaana baabwe mu maiso, n'abairirirya Leeya n'abaana be, n'aviisyaaku enyuma Laakeeri no Yusufu. ³ Naye iye mwene n'atangira mu maiso gaabwe, n'avuunama emirundi musanvu, okutuusa bwe yasembereire mugande we. ⁴ Esawu n'airuka mbiro okumusisinkana, n'amukwata mu ngalo, n'amugwa mu kifubba, n'amunywegera: ne bakunga amaliga. ⁵ N'ayimusya amaiso ge, n’abona abakali n’abaana; n'atumula nti Baani bano abali naiwe? N'atumula nti Abo niibo baana Katonda be yawaire omwidu wo olw'ekisa. ⁶ Abazaana kaisi ne basembera, ibo n'abaana baabwe, ne bavuunama. ⁷ Era no Leeya n'abaana be ne basembera, ne bavuunama: Yusufu no Laakeeri kaisi ne basembera, ne bavunama. ⁸ N'atumula nti Ekibiina ekyo kyonakyona kye nsisinkanine amakulu gaakyo kiki? N'atumula nti Okubona ekisa mu maiso ga mukama wange. ⁹ Esawu n'atumula nti Bye nina bimala; mugande wange, by'olina bibbe bibyo. ¹⁰ Yakobo n'atumula nti Bbe, nkwegayiriire, Atyanu oba nga mboine ekisa mu maiso go, ikirirya ekirabo kyange mu mukono gwange: kubanga mboine amaiso go, ng'omuntu bw'abona amaiso go Katonda, n'onsanyukira. ¹¹ Nkwegayirire, toola ekirabo kyange kye bakuleeteire; kubanga Katonda ankoleire eby'ekisa, era kubanga bye nina bimmala. N'amwegayirira, n'akitwala. ¹² N'atumula nti Tukwate engira twabe, nanze nakutangira. ¹³ N'amukoba nti Mukama wange amaite ng'abaana babula maani, era ng'entama n'ente egiri nanze giyonkya: era bwe balibibbinga einu ku lunaku olumu, ebisibo byonabyona birifa. ¹⁴ Nkwegayiriire, mukama wange atangire omwidu we: nzeena nayaba mpola, ng'okutambula kw'ensolo egiri mu maiso gange era ng'okutambula kw'abaana bwe kuli, ntuuke awali mukama wange mu Seyiri. ¹⁵ Esawu n'atumula nti Ka nkutangire atyanu ku bantu abali nanze. N'atumula nti Ti nsonga: mbone ekisa mu maiso ga mukama wange. ¹⁶ Awo Esawu n'airayo ku lunaku olwo ng'ayaba e Seyiri. ¹⁷ Yakobo n'atambula n'ayaba e Sukosi, ne yeezimbira enyumba, n'akolera ensolo gye engo; eriina ly'ekifo kyeriva lyetebwa Sukosi. ¹⁸ Yakobo n'atuuka mirembe mu kibuga kya Sekemu, ekiri mu nsi ya Kanani, bwe yaviire mu Padanalaamu; n'asiisira mu maiso g'ekibuga. ¹⁹ N'agula ekibanja, gye yasimbire eweema ye, mu mukono gw'abaana ba Kamoli, Itaaye wa Sekemu, n'ebitundu by'efeeza kikumi. ²⁰ N'asimbayo ekyoto, n'akituuma eriina lyakyo Ererokeyisiraeri.