¹ Yakobo ne yeyabira, na bamalayika ba Katonda ne bamusisinkana. ² Yakobo bwe yaboine n'atumula nti Lino niilyo eigye lya Katonda: n'atuuma ekifo ekyo eriina lyakyo Makanayimu. ³ Yakobo n'atuma ababaka okumutangira eri Esawu mugande we mu nsi ya Seyiri, niiyo enimiro ya Edomu. ⁴ N'abalagira ng'atumula nti muti bwe mulikoba mukama wange Esawu; nti Ati bw'atumula omwidu wo Yakobo nti Natyamanga no Labbaani, ne mbayo Okutuusya atyanu: ⁵ era nina ente n'endogoyi, n'ebisibo, n'abaidu n'abazaana: era ntumire okukobera mukama wange, mbone ekisa mu maiso go. ⁶ Ababaka ne baira eri Yakobo nga batumula nti Twatuukire eri muganda wo Esawu, era aiza okukusisinkana, n'abasaiza bina wamu naye. ⁷ Yakobo kaisi n'atya inu ne yeeraliikirira: n'ayawulamu abantu Ababbaire naye, n'ebisibo, n'ente, n'eŋamira, okubba ebibiina bibiri; ⁸ n'atumula nti Esawu bw'eyatuukira ku kibiina ekimu n'akikubba, ekibiina ekyasigalawo kyawona. ⁹ Yakobo n'atumula nti Ai Katonda wa zeiza wange Ibulayimu, era Katonda wa itawange Isaaka, ai Mukama, eyankobere nti Irayo mu nsi y'ewanyu era eri bagande bo, Nzena naakukolanga kusa: ¹⁰ sisaanira (waire) akatono mu kusaasira kwonakwona, n'amazima gonagona, bye wakoleranga omwidu wo; kubanga nawunguka Yoludaani guno nga nina mwigo gwonka; ne watyanu nfuukire ebibiina bibiri. ¹¹ Nkwegayirira, mponya mu mukono gwa mugande wange, mu mukono gwa Esawu: kubanga mutya, aleke okwiza okungita, ne bamawabwe n'abaana baabwe. ¹² Weena watumwire nti Tindiremenga kukukola kusa, era nafuulanga eizaire lyo ng'omusenyu ogw'oku nyanza, ogutabalika olw'obungi. ¹³ N'agona awo obwire obwo: n'atoola ku ebyo bye yabbaire nabyo okubba ekirabo kya Esawu mugande we; ¹⁴ embuli enkali bibiri n'enume abiri; entama enkali bibiri n'enume abiri; ¹⁵ eŋamira egiramulwa asatu n'abaana bagyo; ente enkali ana n'egya sedume ikumi, endogoyi enkali abiri n'abaana bagyo ikumi. ¹⁶ N'abiwa mu mukono gw'aibadu be, buli kisibo kyonka; n'akoba abaidu be nti Mutangire musomoke, muteekeewo eibbanga wakati w'ekisibo n'ekisibo. ¹⁷ N'alagira eyatangiire ng'atumula nti Esawu mugande wange bw'eyakusisinkana, n'akubuulya nti Oli w'ani? era oyaba wa? n'ebyo ebiri mu maiso go by'ani? ¹⁸ Kaisi n'okoba nti Bya mwidu wo Yakobo; niikyo ekirabo ekiweerezeibwe mukama wange Esawu; era, bona, yeen ali nyuma waisu. ¹⁹ Era n'alagira n'ow'okubiri n'ow'okusatu ne bonabona ababbingire ebisibo, ng'atumula nti Muti bwe mwakoba Esawu, bwe mwamubona. ²⁰ Era mwatumula nti Era, bona, omwidu wo Yakobo ali nyuma waisu: Kubanga yatumwire nti Naamuwooyawooya n'ekirabo ekyatangira ne kaisi mubone amaiso ge; Koizi yansangalira. ²¹ Awo ekirabo ne kimutangira ne kisomoka: naye iye n'agona obwire obwo wamu n'ekibiina. ²² N'agolokoka obwire obwo, n’airira bakali be bombiri, n'abazaana be bombiri, n'abaana be eikumi n'omumu, n'asomokera mu musomoko gw'e Yaboki. ²³ N'abatwala, n'abasomokya omwiga, n'asomokya byonabyona bye yabbaire nabyo. ²⁴ Yakobo n'asigalayo yenka; omusajja n'amegana naye Okutuusya engamba bwe yasalire. ²⁵ Era bwe yaboine nga taiza kumumega, n'akoma ku nsaanzi ye; ensanzi ya Yakobo ne yeereega, ng'amegana naye. ²⁶ N'atumula nti Ndekula, kubanga engamba esala. N'atumula nti Tinjaba kukulekula, wabula ng'ompaire omukisa. ²⁷ N'amukoba nti Eriina lyo niiwe ani? N'atumula nti Yakobo. ²⁸ N'atumula nti Eriina lyo terikaali lyetebwanga Yakobo, wabula Isiraeri: kubanga owakaine no Katonda era n’abantu, era osingire. ²⁹ Yakobo n'amubuulya n'atumula nti Nkwegayiriire, nkobera eriina lyo. N'atumula nti Kiki ekikumbuulisya eriina lyange? N'amuweera eyo omukisa. ³⁰ Yakobo n'atuuma ekifo eriina lyakyo Penieri: kubanga mbonagaine no Katonda mu maiso, n'obulamu bwange buwonere. ³¹ Eisana n'erivaayo n'erimwakaku ng'awunguka Penueri, n'awenyera olw'ekisambi kye. ³² Abaana ba Isiraeri kyebaviire baleka okulya ekinywa ky'ekisambi ekiri ku nsaanzi, okutuusya watyanu: kubanga yakomere ku nsaanzi ya Yakobo mu kinywa ky'ekisambi.