¹ N'awuliire ebigambo by'abataane ba Labbaani, nga batumula nti Yakobo byonabyona ebyabbaire ebya Itawaisu abimutoireku; era mu ebyo ebyabbaire ebya Itawaisu mw'afuniire ekitiibwa ekyo kyonakyona. ² Yakobo n'abona amaiso ga Labbaani, era bona, nga tegakaali gafaanana gy'ali ng'oluberyeberye. ³ Mukama n'akoba Yakobo nti Irayo mu nsi ya bazeiza bo, era eri bagande bo; nzeena nabbanga wamu naiwe. ⁴ Yakobo n'atuma n'ayeta Laakeeri no Leeya baize mu irundiro awali ekisibo kye, ⁵ n'abakoba nti mboine amaiso ga itawanyu nga tegakyafaanana gye ndi ng'oluberyeberye; naye Katonda wa itawange yabbanga nanze. ⁶ Era mumaite nga naweereryanga itawanyu n'amaani gange gonagona. ⁷ Era itawanyu yambeyere, n'awaanyisyanga empeera yange emirundi ikumi; naye Katonda teyamuganyirye kunkola kubbiibi. ⁸ Bwe yatumulanga ati nti Egya bujagijagi niigyo gyabbanga empeera yo; ekisibo kyonakyona ne kizaala egyo bujagijagi: era bwe yatumulanga ati nti Egya biwuuga niigyo gyabbanga empeera yo; ekisibo kyonakyona ne kizaala egye biwuuga. ⁹ Atyo Katonda ensolo gya itawanyu yagimutoireku n'agiwa nze. ¹⁰ Awo okwatuukire mu biseera ekisibo bwe kyawakire amawako, ne nyimusya amaiso gange, ne mbonera mu kirooto, era, bona, embuli enume egyaniniire ekisibo gyabbaire gye biwuuga, n'egyo bujagijagi, n'egya kiweewoweewo. ¹¹ Malayika wa Katonda n'ankobera mu kirooto nti Yakobo: ne ntumula nti Niinze ono. ¹² N'atumula nti Yimusya atyanu amaiso go, obone, embuli gyonagyona enume eginiinira ekisibo gye biwuuga, n'egyo bujagijagi, n'egya kiweewoweewo: kubanga mboine byonabyona Labbaani by'akukolera. ¹³ Niinze Katonda w'e Beseri, gye wafukiire amafuta ku mpagi, gye waneeyamiire obweyamu: atyanu golokoka, ove mu nsi eno, oireyo mu nsi gye wazaliirwemu. ¹⁴ Laakeeri no Leeya ne bairamu ne bamukoba nti Tukaali tulina omugabo oba obusika mu nyumba ya Itawaisu? ¹⁵ Tetubalibwa nga banaigwanga gy'ali? kubanga yatutundire, era n'ebintu byaisu abiriiriire dala. ¹⁶ Kubanga obugaiga bwonabona Katonda bw'atoire ku Itawaisu, niibwo bwaisu era bwa baana baisu: kale atyanu, kyonakyona Katonda ky'akukobere, kikole. ¹⁷ Yakobo kaisi 'agolokoka, ne yeebagalya abaana be na bakali be ku ŋamira; ¹⁸ n'atwala naye ebisibo bye byonabyona, n'ebintu byonabyona bye yabbaire akuŋaanyirye, ebisibo bye yabbaire afunire, bye yakuŋaanirye mu Padanalaamu, ayabe eri Isaaka itaaye mu nsi ya Kanani. ¹⁹ Labbaani yabbaire ayabire okusala ebyoya by'entama gye: Laakeeri n'aibba baterafi ba itaaye. ²⁰ Yakobo n'ayaba mu kyama Labbaani Omusuuli nga tamaite, kubanga teyamukobeire ng'airuka. ²¹ Atyo n'aiuka ne byonabyona bye yabbaire; n'agolokoka n'awunguka omwiga, n'akyusya amaiso ge eri olusozi olwa Gireyaadi. ²² Ne bakobera Labbaani ku lunaku olw'okusatu nga Yakobo yairuukire. ²³ N'atwala naye bagande be, n’amusengererya olugendo lwe naku musanvu; n'amutuukaku ku lusozi Gireyaadi. ²⁴ Katonda n'aizira Labbaani Omusuuli mu kirooto eky'obwire, n'amukoba nti Weekuume oleke okutumula no Yakobo waire okusa waire ebibbiibi. ²⁵ Labbaani n'atuuka ku Yakobo. Yakobo yabbaire asimbire eweema ye ku lusozi; no Labbaani na bagande be ne basimba ku lusozi Gireyaadi. ²⁶ Labbaani n'akoba Yakobo nti Wakolere ki, okwaba ekyama nga tiimaite, n'otwalira dala abaana bange ng'abaanyagibwa n'ekitala? ²⁷ Kiki ekyakwirukisirye ekyama ng'ongisa ng'oyaba; n'otonkobera, kaisi nkusiibule n'ekinyumu n'enyembo, n'ebitaasa n'enanga; ²⁸ n'otoŋanya kunywegera bataane bange na bawala bange? Atyanu okolere kyo busirusiru. ²⁹ Kiri mu buyinza bw'omukono gwange okukukola okubbiibi: naye Katonda wa itawanyu yatumwire nanze obwire, nti Weekuume oleke okutumula no Yakobo waire ebisa waire ebibbiibi. ³⁰ Ne Atyanu otaka inu okwaba, kubanga olumirwa inu enyumba ya itawawo, (naye) kyewaviire oibba bakatonda bange kiki? ³¹ Yakobo n'airamu n'akoba Labbaani nti Kubanga natiire: kubanga natumwire nti Oleke okuntoolaku bawala bo olw'empaka. ³² Buli gw'ewabona ng'alina bakatoada bo, taabbe mulamu: mu maiso ga bagande baisu yawulamu ebibyo ebiri ewange, obyetwalire. Kubanga Yakobo yabbaire tamaite nga Laakeeri niiye yabaibbire. ³³ Labbaani n'ayingira mu weema ya Yakobo, no mu weema ya Leeya, no mu weema ey'abazaana bombiri; naye n'atababona. N'ava mu weema ya Leeya, n'ayingira mu weema ya Laakeeri. ³⁴ Laakeeri yabbaire atwaire baterafi, n'abateeka mu matandiiko g'eŋamira, n'abatyamaku. Labbaani n'ayazya mu weema yonayona, naye n'atababona. ³⁵ N'akoba itaaye nti Mukama wange aleke okusunguwala kubanga tinsobola kukwemerera w'oli kubanga ndi mu mpisa y'abakali. N'asagira, naye n'atabona baterafi. ³⁶ Yakobo n'asunguwala, n'atongana no Labbaani: Yakobo n'airamu n'akoba Labbaani nti Nsoberye ki? Nkolere kibbiibi ki ekiknsengereserye embiro? ³⁷ Kubanga oyazirye ebintu byange byonabyona, kiki ky'oboine ku bintu byonabyona eby'omu nyumba yo? Kiteeke wano mu maiso ga bagande bange na bagande bo, batusalire omusango fembiri. ³⁸ Emyaka egyo abiri nabbanga naiwe; entama gyo n'embuli gyo enkali tegisowolanga, n'enume egy'omu kisibo kyo tingiryanga. ³⁹ Eyataagulwanga ensolo tinakuleeteranga; nze nafiirwanga eyo; wagivunaananga mu mukono gwange, obanga yaibbibwanga misana oba yaibbibwanga bwire. ⁴⁰ Bwe naabbanga ntyo; emisana omusana gwampwerangaku, n'obwire empewo; n'endoolo twangotanga mu maiso gange. ⁴¹ Emyaka egyo abiri nabbanga mu nyumba yo; nakuweerereryanga emyaka ikumi n'aina olwa bawala bo bombiri, n'emyaka mukaaga olw'ekisibo kyo; weena wawaanyisyanga empeera yange emirundi ikumi. ⁴² Singa Katonda wa itawange, Katonda wa Ibulayimu, era Entiisya ya Isaaka, teyabbanga nanze, atyanu tewandiremere kunsindika bwereere. Katonda aboine okubonaabona kwange n'okutegana kw'emikono gyange, n'akujunga obwire. ⁴³ Labbaani n'airamu n'akoba Yakobo nti Abawala niibo bawala bange, n'abaana niibo baana bange, n'ebisibo niibyo ebisibo byange, ne byonabyona by'obona niibyo ebyange: ne watyanu nsobola kukolera ki bawala bange bano, oba baana baabwe be baazaire? ⁴⁴ Kale atyanu, tulagaane endagaanu, nze naiwe; ebbenga omujulizi eri nze naiwe. ⁴⁵ Yakobo n'akwata eibbaale, n'alisimba okuba empagi. ⁴⁶ Yakobo n'akoba bagande be nti Mukuŋaanye amabbaale; ne batoola amabbaale, ne bagatuuma entuumu: ne baala awo awali entuumu. ⁴⁷ Labbaani n'agituuma eriina Yegalusakadusa: naye Yakobo n'agituuma Galeedi. ⁴⁸ Labbaani n'atumula nti Entuumu eno niiyo mujulizi eri nze naiwe atyanu. Eriina lyayo kyeryaviire libba Galeedi: ⁴⁹ era Mizupa, kubanga yatumwire nti Mukama alingenga wakati wange naiwe, bwe tulibba nga tetubonagana. ⁵⁰ Bw'ewabonyaabonyanga abaana bange, era bw'ewakwanga abandi awali abaana bange, wabula muntu ali naife; bona, Katonda niiye mujulizi wakati wange naiwe. ⁵¹ Labbaani n'akoba Yakobo nti bona entuumu eno, era bona n'empagi eno, gye nsimbire wakati wange naiwe. ⁵² Entuumu eno yabbanga mujulizi, n'empagi ebbenga omujulizi, nga nze tindibita ku ntuumu eno okwaba gy'oli, era nga naiwe tolibita ku ntuumu eno n'empagi eno okwiza gye ndi, okukola okubbiibi. ⁵³ Katonda wa Ibulayimu, era Katonda wa Nakoli, Katonda wa itawabwe, alamule wakati waisu. Yakobo n'alayira Entiisya ya itawabwe Isaaka. ⁵⁴ Yakobo n'aweerayo Sadaaka ku lusozi, n'ayeta bagande be okulya emere: ne balya emere, ne babba ku lusozi ne bakyeesya obwire. ⁵⁵ Awo amakeeri mu makeeri Labbaani n'agolokoka, n'anywegera bataane be na bawala be n'abasabira omukisa: Labbaani n'ayaba, n'airayo mu kifo kye.